Türkiyə Prezidenti Rəcəb Tayyib Ərdoğan İstanbulda keçirilən Qara dəniz İqtisadi Əməkdaşlıq Təşkilatının (QDİƏT) toplantısında Ermənistan nümayəndəsinin çıxışını tənqid edib. Trend-in məlumatına görə, iclasda iştirak edən Ermənistan xarici işlər nazirinin müavini Aşot Hovakimiyan çıxışını demək olar ki, Dağlıq Qarabağ münaqişəsinə həsr edib.
A.Hovakimiyanın çıxışını sərt tənqid edən R.T.Ərdoğan isə toplantının siyasi ittiham yeri olmadığını bildirib: "Heç bir nümayəndə nə kimisə ittiham etdi, nə də siyasi məsələlərdən danışdı. Lakin siz bütün çıxışınızı siyasi dəyərləndirməyə ayırdınız".
Türkiyə Prezidenti Rusiyanın Baş naziri Medvedevə işarə edərək məsələ ilə ATƏT-in Minsk qrupunun məşğul olduğunu xatırladıb: "Bu münaqişənin nizamlanmasında böyük fayda var".
“Bundan sonrakı əsas hədəfimiz - davamlı inkişaf olmalıdır”. APA-nın xəbərinə görə, bu sözləri də Qara Dəniz İqtisadi Əməkdaşlıq Təşkilatının İstanbulda keçirilən zirvə toplantısından sonra təşkil olunan mətbuat konfransında Türkiyə prezidenti Rəcəb Tayyib Ərdoğan deyib.
1990-cı illərin əvvəllərinin bəzi ölkələrin dağıldığı, bəzi ölkələrin müstəqillik elan etdiyi, qlobal sistemin yenidən qurulduğu bir dönəm olduğunu xatırladan prezident Ərdoğan regional münaqişələr və etnik gərginliklərin ən yüksək səviyyəyə çatdığı, dünyanın yeni sistemə, yoxsa xaosa yönəldiyinə dair mübahisələrin yaşandığı bir atmosferdə yaranan təşkilatın böyüyərək 25-ci yaş gününə çatdığını söyləyib: “Qara dəniz iqtisadi Əməkdaşlıq Təşkilatını quranda bəziləri bu qurumun yaşayacağına ehtimal vermirdi. Lakin indi təşkilatın dünyada hörmət edilən bir qurum halına gəldiyini görürük”.
2017-ci ilin əvvəlindən bəri gələcəkdəki 15 ilin əsas məsələsi olan “Davamlı inkişaf” mövzusunu sədrliklərinin əsas gündəm maddəsinə çevirdiklərini vurğulayan prezident Ərdoğan aşağıdakıları söyləyib: “Dünyanın müxtəlif bölgələrində iqtisadi qeyri-bərabərliklər davam edərkən “davamlı inkişaf”ın şüardan o tərəfə keçə bilməyəcəyini bilirik. Limitsiz istehsal ehtirası və yüksək gəlir düşüncəsi ilə əsas ərzaq maddələrinə belə təhlükəli şeylərin qarışdırıldığı bir dönəmdə bu məsələyə lazımi əhəmiyyətin verilmədiyini düşünürük. Milyardlarla insan səfalət içində yaşayarkən inkişafın davam etdirilə bilməsi üçün hamının daha çox cəhd göstərməsi lazımdır. Qara Dəniz İqtisadi Əməkdaşlıq Təşkilatının bu məsələdə qabağa düşə biləcəyinə inanırıq”.
Təşkilata üzv olan ölkələrin iqtisadiyyat nazirlərinin toplantısını 11 mayda, kənd təsərrüfatı nazirlərinin toplantısını isə 17 mayda keçirdiklərini xatırladan R. T. Ərdoğan, 21 iyunda səhiyyə nazirlərinin toplantısını keçirəcəklərini diqqətə çatdırıb. O, zirvə toplantısının yekun bəyannaməsinin qəbul edildiyini və keçən ilin dekabrında Serbiyadan təhvil aldıqları dönəm sədrliyini 29 iyunda Ukraynaya təhvil verəcəklərini bildirib.
Qara Dəniz İqtisadi Əməkdaşlıq Təşkilatının (QDİƏT) dövlət və hökumət başçılarının İstanbulda keçirilən 25-ci zirvə toplantısı başa çatıb. Toplantının sonunda iştirakçılar tərəfindən yekun bəyannamə qəbul edilib.
Bəyannamədə təşkilata üzv dövlətlərin rəhbərliyi terrorizmlə mübarizəyə və iqtisadi əməkdaşlığın genişləndirilməsinə öz töhfələrini verəcəklərini vurğulayıblar.
Sənəddə QDİƏT-ə üzv olan dövlətlər bütün mənbələrinə, motiv və məqsədlərinə baxmayaraq terrorçuluğun bütün forma və təzahürlərinin əleyhinə olduqlarını bəyan ediblər: “Biz terrorçuluğa qarşı mübarizədə ümumi beynəlxalq həmrəyliyə dəstək olacaq və bu mübarizəyə öz töhfəmizi verməkdə davam edəcəyik”.
Bəyannamədə dövlət və hökumət başçılarının əsas məqsədlər naminə əməkdaşlığın inkişaf etdirilməsi, kənd təsərrüfatı və aqrar-sənaye, bank və maliyyə, gömrük, təhsil, enerji, ətraf mühitin mühafizəsi, səhiyyə və əczaçılıq, informasiya və kommunikasiya texnologiyaları, institusional bərpa və yaxşı idarəetmə, elm və texnologiya, turizm, mədəniyyət, ticarət və iqtisadi inkişaf, nəqliyyat sahələrində nəticə əldə etmək üçün daha çox layihələrin həyata keçirilməsinə xüsusi diqqət yetirəcəkləri öz əksini tapıb.
Sənəddə da bildirilib ki, üzv dövlətlərin iqtisadiyyatlarının qlobal iqtisadiyyatda iştirakının asanlaşdırılması məqsədilə təşkilatın əhatə etdiyi dövlətlər, eləcə də Avropa və Asiya ölkələri arasında dəniz nəqliyyatı sahəsində mövcud və gələcəkdə qurulacaq nəqliyyat dəhlizlərinin təhlükəsizliyinin tam təmin olunması və etibarlı həll yollarının təmin edilməsi cəhdlərini dəstəkləyir.
Sammit iştirakçıları hesab edir ki, Qara dəniz ətrafında dairəvi avtomobil yolu və dəniz nəqliyyatı kimi digər nəqliyyat infrastrukturunun qurulmasında birgə layihələrin səmərəli reallaşdırılması regiondaxili ticarət, turizm, nəqliyyat sahələrində investisiya qoyuluşunu artıracaq və QDİƏT-in fəaliyyətinin uğuruna səbəb olacaq.