Elşən Mustafayev: "Sarkisyanın sayıqlamasına bu işlə məşğul olan qüdrətli dövlətlər ciddi reaksiya verməlidir"
Ölkənin yeni parlamentinin birinci iclasında Ermənistan prezidenti Serj Sarkisyanın çıxışı Qarabağ münaqişəsinin nizama salınmasında erməni siyasi rəhbərliyinin irticaçı mövqeyini yenidən nümayiş etdirdi. Bir daha məlum oldu ki, S.Sarkisyan güzəştlərə hazır deyil. Bundan başqa, erməni prezidenti ATƏT-in Minsk Qrupunun himayəsi altında uzunmüddətli proseslərin və danışıqların gedişatında formalaşdırılmış sülh nizamlanmasının bütün əvvəlki prinsiplərini də rədd etdi.
S.Sarkisyanın sözlərinə görə, Qarabağın işğal zonasında separatçı mübarizə "yeganə doğru yoldur": "Bu gün, 1988-ci ildə olduğu kimi, öz müqəddəratını təyin etmək üçün mübarizə ən doğru yoldur. Artsax xalqının öz müqəddəratını təyin etmə hüququnu reallaşdırmasının və təhlükəsizliyinə zəmanət yaratmasının alternativi yoxdur. Bu mövqe danışıqlar prosesində də əks olunub".
Onun sözlərinə görə, Qarabağ münaqişəsinin indiyə qədər nizama salınmamasının günahkarı Ermənistan və ya beynəlxalq vasitəçilər deyil. Guya danışıqlar prosesində mövcud status-kvonun saxlanmasını dəstəkləyən və bunu gizlətməyən Azərbaycandır.
Ermənistan prezidenti, həmçinin, deyib ki, status-kvonun dəyişməsinin yolu Dağlıq Qarabağın müstəqilliyinin Azərbaycan tərəfindən tanınması və erməni xalqının öz müqəddəratının təyinindən keçir: "Azərbaycanın antierməni siyasətini neytrallaşdırmaq üçün beynəlxalq arenada daha fəal siyasət aparılmalıdır". Onun sözlərinə görə, bu, Azərbaycan tərəfindən daim təşəbbüs göstərilən bəyannamə və layihələrin sayının azaldılması üçün lazımdır.
Sarkisyanın bu mövqeyi nəyin göstəricisidir?
Ekspert Elşən Mustafayev qəzetimizə bildirdi ki, bununla Sarkisyan iç üzünü bir daha açıb ortaya qoymuş oldu: "Azərbaycan tərəfi dəfələrlə bəyan edib ki, Sarkisyan və onun rəhbərlik etdiyi cinayətkar rejim sülh danışıqlarının keçirilməsi və status-kvonun dəyişməsində maraqlı deyil. Onun son açıqlaması bunu daha dərindən təsdiqləmiş oldu. Bu açıqlaması ilə Sarkisyan, faktiki olaraq, separatçılığa haqq qazandırdı. Əvvəllər belə mövqeləri üstüörtülü deyirdisə, hazırda açıq şəkildə bəyan edir ki, Dağlıq Qarabağ ayrıca dövlət olmayınca, hər hansı bir yenilikdən söhbət gedə bilməz. Əslində, Sarkisyanın mövqeyi bizə bəlli olub və ondan fövqəladə nəsə gözləməmişik. Yaxşı olar ki, onun son çıxışı ilə münaqişənin həllində vasitəçilik edən ölkələr tanış olsun. Görsünlər ki, belə xislətdə olan bir ölkə başçısı ilə müzakirələr aparmaq yersizdir. Sarkisyan bu açıqlaması ilə, eyni zamanda, onları ələ salmış oldu. Aydın olur ki, Sarkisyan əvvəllər qəbul edilmiş hər hansı bir prinsipdən danışmır. O, faktiki olaraq, şərt irəli sürür. Həmin məzmunda şərti isə yalnız terrorçu irəli sürə bilər. Azərbaycanın bu mövzu ilə bağlı mövqeyi bəllidir. Hesab edirəm ki, Sarkisyanın sayıqlamasına bu işlə məşğul olan qüdrətli dövlətlər ciddi reaksiya verməlidir. Fikir versəniz görərsiniz ki, Sarkisyan, eyni zamanda, özünü beynəlxalq qurumların gözünə soxmaq istəyir. Deyir ki, vəziyyətin bu hal almasında onun və beynəlxalq qurumların təqsiri yoxdur. Bu, açıq-aşkar, onun tərəfindən edilən blefdir. Çünki normalda heç bir beynəlxalq təşkilat onunla belə mövqeyi bölüşə bilməz".
Məhəmmədəli QƏRİBLİ