Aqşin Əliyev: "Vəziyyət heç də Zaxarovanın şərh etdiyi qədər sadə və bəsit deyil"
Rusiya XİN-in rəsmi nümayəndəsi Mariya Zaxarova brifinq zamanı Ümumrusiya Azərbaycanlıları Konqresinin (ÜAK) ləğv edilməsini şərh edərkən deyib ki, Rusiyada azərbaycanlıların maraqlarını 260-a yaxın təşkilat təmsil edir: "Rusiya Azərbaycanla strateji tərəfdaşlığa böyük önəm verir, münasibətlərin möhkəmləndirilməsi kursu hər iki ölkə rəhbərləri tərəfindən qəbul edilib".
O əmin olduğunu vurğulayıb ki, qurumun ləğv edilməsi ikitərəfli münasibətlərə xələl gətirməyəcək.
Qeyd edək ki, mayın 15-də Rusiya Ədliyyə Nazirliyinin təqdimatına əsasən Rusiya Ali Məhkəməsi ÜAK-ın qeydiyyatını ləğv edib.
Göründüyü kimi, M.Zaxarova ÜAK-ın qeydiyyatının ləğvini adi hadisə kimi qeyd edir və sözügedən qurumu Rusiyadakı 260 diaspor təşkilatından biri kimi səciyyələndirir.
Rusiya rəsmisinin bu mövqeyini necə izah etmək olar?
Ekspert Aqşin Əliyevin sözlərinə görə, M.Zaxarovanın bu fikri səmimiyyətdən irəli gəlmir: "Qurumun ləğv edilməsi ikitərəfli münasibətlərə xələl gətirməyəcək deməklə, o, üstüörtülü mesaj verib. Zaxarova vasitəsilə bizə demək istəyirlər ki, özünüzü yığışdırın, qeydiyyatın ləğvi qarşılığında Rusiyaya qarşı nəsə planlaşdırmayın.
Rusiya çoxmillətli bir dövlətdir və orada yaşayan xalqların da birləşdiyi qurumlar var. ÜAK-ın ləğvi Rusiyada hansısa bir xalqın diaspor təşkilatının bağlanması ilə nəticələnən ilk addımdır və orada yaşayan azərbaycanlıları da ciddi şəkildə narahat edən bir hadisədir. Bütün azərbaycanlılar bu qərarın siyasi bir addım olduğunu anlayır və belə deyilsə, Moskva bu qərardan vaz keçməlidir. Ümid edirəm ki, Rusiya tərəfi bu məsələləri ətraflı araşdıracaq və ÜAK-ın ləğvi ilə bağlı qərarını dəyişəcək. Rusiyanın ÜAK-ı ləğv etməsi ciddi narahatlıq, hiddət və təəssüf doğurur, Azərbaycan-Rusiya münasibətlərinə mənfi təsir edəcək. ÜAK-ın ləğvi heç də sıradan bir hadisə deyil. Zaxarova bilməlidir ki, ÜAK Rusiyada yaşayan azərbaycanlıların birləşdiyi ən böyük diaspor qurumu olub və həmin ölkənin bütün subyektlərində fəaliyyət göstərib. Bunu 300-ə yaxın qurumla eyniləşdirmək cəhdi hadisənin əsl mahiyyətindən diqqəti yayındırmaq məqsədi daşıyır. Demək istəyirəm ki, vəziyyət heç də Zaxarovanın şərh etdiyi qədər sadə və bəsit deyil".
Məhəmmədəli QƏRİBLİ