Arzuxan Əlizadə: "Azərbaycanın yaşayış məntəqələri atəşə tutulanda nədənsə həmsədrlər belə narahat olmur"
Məlum olduğu kimi, mayın 15-də cəbhənin Füzuli-Xocavənd istiqamətində Ermənistan hava hücumundan müdafiə qoşunlarına məxsus "OSA" zenit-raket kompleksi hərbi qulluqçular tərəfindən müdafiənin ön xəttində yeni mövqeyə çıxarılaraq hava məkanını nəzarətə götürməyə cəhd göstərərkən məhv edilib.
Bu arada "ənənəsinə" sadiq qalan Ermənistan mətbuatı yaranan vəziyyətlə bağlı ATƏT-in Minsk Qrupunun bəyanatını birtərəfli şəkildə təqdim edib. Ermənilər iddia edir ki, guya həmsədrlər və Rusiya Xarici İşlər Nazirliyi baş verənlərə görə məhz Azərbaycanı ittiham edib. Guya ki, hər iki tərəf atəşkəsin Azərbaycan tərəfindən pozulmasını fiksə edib. Düzdür, buna görə hər iki tərəf reaksiya verib. Ancaq bu bəyanatlar ümumi ifadələrdən ibarətdir və ermənilərin dediyi kimi deyil. Məsələn, ATƏT-in Minsk Qrupunun həmsədrləri son günlər cəhbə xəttində atəşkəsin pozulması məlumatlarına görə tərəfləri gərginliyin artmasının qarşısını almaq üçün zəruri tədbirlər görməyə çağırıb. Bəyanatda deyilir: "Bir neçə etibarlı mənbədən toplanmış məlumata görə, mayın 15-də Azərbaycanın Silahlı Qüvvələri təmas xətti boyunca hərbi texnikanı hədəf alaraq raket zərbəsi endirib. 16 may axşamı və 17 mayda Ermənistan silahlı qüvvələri müxtəlif çaplı minaatan atəşi ilə cavab veriblər. Hər iki tərəfdən belə hərəkətlər atəşkəs rejiminin pozulmasına əhəmiyyətli təsir edir və həyəcan doğurur".
Digər tərəfdən, Rusiya XİN-i erməni jurnalistlərə Dağlıq Qarabağda "ZRK OSA"nın vurulmasını şərh edib. Nazirlik bəyan edib ki, Dağlıq Qarabağ münaqişəsinin nizamlanmasında bir vasitəçi kimi atəşkəs rejiminin pozulmasını qınayır və iki ölkə arasında gərginliyin daha da güclənməsinin qarşısını almaq üçün bütün lazımi tədbirləri görəcək.
Azərbaycan Xarici İşlər Nazirliyinin (XİN) mətbuat xidmətinin rəhbəri Hikmət Hacıyev ATƏT-in Minsk Qrupu həmsədrlərinin 18 may 2017-ci il tarixli bəyanatına tənqidi prizmadan yanaşıb. Onun fikrincə, ATƏT-in Minsk Qrupu həmsədrlərinin yalnız atəşkəs haqqında 18 may 2017-ci il tarixli standart bəyanatı simptomatik xarakter daşıyır.
Bu o deməkdir ki, tərəflər işğalçıya qarşı daha konkret mövqe sərgiləməlidir. Sözügedən məsələni "Bakı-Xəbər"ə şərh edən AMİP-in baş katibi Arzuxan Əlizadənin sözlərinə görə, ermənilərin təhrif olunmuş informasiyaya söykənərək çirkin kampaniya aparması yeni deyil: "Onlar zaman-zaman bu kimi bəyanatları özünəməxsus interpretasiya edərək öz xeyirlərinə yozub. Növbəti təhrif olunmuş kampaniya da bunun tərkib hissəsidir. Ancaq o da danılmaz reallıqdır ki, həmsədrlərin son bəyanatı ümumən obyektiv deyildi. ATƏT-in Minsk Qrupu işğal olunmuş ərazilərdə aparılan qanunsuz məskunlaşdırma siyasətinə öz etirazını bildirmək, 25 ildir Laçının işğal altında olmasına reaksiya vermək əvəzinə, atəşkəsin pozulmasından dərhal narahatlığını bildirir, özü də məhz erməni hərbi texnikası məhv ediləndə. Azərbaycanın yaşayış məntəqələri atəşə tutulanda nədənsə həmsədrlər belə narahat olmur. Əksər hallarda bunu görməzdən gəlirlər. Son bəyanatın ruhu ondan ibarətdir ki, həmsədrlər növbəti eskalasiyanın başlaya biləcəyindən narahatdır. Yəni vəziyyət belə davam etsin, təki bu kimi toqquşmalar genişmiqyaslı hərbi əməliyyatlara gətirib çıxarmasın. Ancaq son baş verənlər göstərir ki, vəziyyəti uzun müddət bu cür saxlamaq mümkün olmayacaq".
Vidadi ORDAHALLI