Məhəmməd Əsədullazadə: "Erməni lobbisinin Azərbaycan əleyhinə on illərlə apardığı yalan və böhtan xarakterli siyasət fiaskoya uğrayır"
"Ermənistan Azərbaycanın antierməni siyasətini neytrallaşdırmaq üçün beynəlxalq arenada daha fəal siyasət aparmalıdır". Bunu yeni seçilmiş parlamentin birinci iclasındakı çıxışında Ermənistan prezidenti Serj Sarkisyan deyib. Onun sözlərinə görə, fəal siyasət Azərbaycan tərəfindən daim təşəbbüs göstərilən bəyannamə və layihələrin sayının azaldılması üçün lazımdır. Görünən odur ki, Azərbaycanın diplomatik üstünlüyünü qarşı tərəf də etiraf edir. Belə olmasaydı, Sarkisyan bu yöndə narahatlığını parlamentdə dilə gətirməzdi.
Digər tərəfdən, son günlər cəbhə xəttində baş verən təxribatlar onu göstərir ki, Ermənistan tərəfi destruktiv xarici siyasətindən və Dağlıq Qarabağ münaqişəsinin danışıqlar yolu ilə həllinə mane olmaqdan vaz keçmir. Ancaq Ermənistanın pozucu mövqe tutması üzündən görüşlər baş tutmur. Bu da səbəbsiz deyil. Çünki Ermənistanın haqsız mövqedə olduğu hamıya məlumdur və artıq erməni diplomatiyası tutarlı arqument gətirə bilmir. Beynəlxalq təşkilatların qəbul etdikləri sənədlərdə işğalçı erməni ordusunun Azərbaycan ərazilərindən çıxarılması vacib şərt kimi vurğulanır. Ancaq Ermənistan əsassız və həyasız formada həqiqəti ört-basdır etməyə çalışsa da, artıq çox gecdir. Azərbaycan diplomatiyası kifayət qədər konkret faktlarla nəyin nə olduğunu dünyaya sübut edib. Onlardan bəzilərini xatırlatmaq kifayətdir.
Sarkisyanın Azərbaycan diplomatiyası ilə bağlı narahatlığını şərh edən politoloq Məhəmməd Əsədullazadənin sözlərinə görə, son illər Azərbaycanın Ermənistan üzərində hərbi-siyasi və diplomatik cəbhədə üstünlüyü davam etməkdədir: "Avropa Şurasının qətnamələri və digər təşkilatlarda Azərbaycanın ərazi bütövlüyünün dəstəklənməsi, Dağlıq Qarabağ münaqişəsinin həllində Qarabağın Azərbaycanın tərkib hissəsi kimi qəbul edilməsi ilə bağlı səslənən fikirlər ölkənin diplomatik qələbəsidir. Erməni lobbisinin Azərbaycan əleyhinə on illərlə apardığı yalan və böhtan xarakterli siyasət fiaskoya uğrayır. Bunun nəticəsidir ki, Ermənistan prezidenti parlamentdəki çıxışında Azərbaycanın əleyhinə beynəlxalq arenada daha fəal olmağa çağırır. Qarabağ münaqişəsinin nizamlanması prosesində qeyri-konstruktiv mövqeyi ortaya qoyan işğalçı ölkəyə qarşı diplomatik savaş davamlı olmalıdır. Hazırda cəbhədə verdiyi itkilərlə uğursuz duruma düşən Ermənistandır. Beynəlxalq birlik tərəfindən problemə obyektiv yanaşma erməniləri məyus edib. Sarkisyanın Rusiyada Azərbaycanın böyük diaspor təşkilatı olan ÜAK-ın ləğv edildiyi indiki dönəmdə bu kimi açıqlama verməsi təsadüfi deyil. Bu, ermənilərin Moskvada Azərbaycan əleyhinə Kremllə birgə ssenarisidir. Güclü ordu ilə bərabər güclü diplomatiya, güclü informasiya siyasəti dünyada qələbəyə aparan yoldur. Azərbaycanın bu sahələrdə uğurları işğalçı ölkəni pat vəziyyətə qoymağa qadirdir.
Sarkisyan Qarabağ müharibəsindən istifadə edib öz hakimiyyətini davam etdirir. Onun hakimiyyəti regional təhlükəsizlik və sabitlik üçün risqdir. Azərbaycan bütün istiqamətlərdə işğalçı ölkənin yalan informasiya siyasətini susdurmalı, dünya birliyini Azərbaycanın haqq səsinə inandırmalıdır. Buna nail olmaq üçün kifayət qədər imkanlar var. Ermənistan düşdüyü bu çıxılmaz vəziyyətlə Rusiyanın inhisarçı siyasətinin qurbanı olub. Regionda forpost missiyasını həyata keçirir.
Qeyd edim ki, ermənilər Qarabağda böyük bir xaç ucaldıb. Onların məqsədi münaqişəyə dini don qatmaqdır. Problemi xristian-müsəlman davası kimi sırımaq niyyəti güdürlər. Bu gün Qərbdə formalaşan islamofobiyadan Azərbaycan əleyhinə istifadə etmək məqsədilə fəaliyyət göstərirlər. Azərbaycan, UNESCO və BMT Ermənistanın xaç təxribatının qarşısını almalıdır".
Vidadi ORDAHALLI