Əhməd Şahidov: "Aydın məsələdir ki, Rusiya Azərbaycan diasporunun fəaliyyətinə qarşı deyil və bunu qadağan edə bilməz"
Rusiya Dövlət Dumasının deputatı, Rusiya-Azərbaycan parlamentlərarası dostluq qrupunun rəhbəri Dmitri Savelyev Ümumrusiya Azərbaycanlıları Konqresinin bağlanması ilə bağlı məsələyə münasibət bildirib: "Mayın 15-də Rusiyada məhkəmənin qərarı ilə ÜAK ləğv olunub. Olduqca xoşagəlməz hadisədir. Şübhəsiz, təsirli apelyasiya şikayəti hazırlamaq, hüquqi çərçivədə qərarın dəyişdirilməsinə nail olmaq lazımdır".
Rusiya deputatı öz bəyanatında, həmçinin, yeni təşkilat yaratmağı təklif edib: "Madam ki, məsələ məhkəməyə kimi gedib, onda bu problemi Rusiya qanunvericiliyinə əsasən həll etmək lazımdır. Lakin mən bir məqamı qeyd etmək istəyirəm. İki ölkə və vətəndaşlar arasında çox yüksək səviyyədə əlaqələr mövcuddur. İllərlə, onilliklərlə, əsrlərlə qurulan, qorunan bu münasibətlərə lokal bir hadisə xələl gətirməməlidir. Məsələni həll etmək mümkün olmayacaqsa, yeni təşkilat yaratmaq, onun formalaşmasında qanunu bütün dəqiqliyi ilə əsas götürmək və tam həcmdə Rusiyada yaşayan azərbaycanlıların ictimai birliyini bərpa etmək lazımdır.
Əminəm ki, nizamlı və keyfiyyətli işi bütün Rusiya və Azərbaycan vətəndaşları istəyər. Çünki xalqlarımız arasında dostluq hamımız üçün baza dəyəri olaraq qalır".
Göründüyü kimi, rusiyalı deputat da, bir sıra digər şəxslər kimi, ÜAK-ın adının dəyişdirilməsini, yəni onun bazasında yeni təşkilatın qurulmasını təklif edir.
Bu variantın tətbiqinə getmək lazımdır, ya yox?
Rusiya Prezidenti yanında Dövlət İdarəçilik Akademiyasının məzunu, hüquq müdafiəçisi Əhməd Şahidov qəzetimizə açıqlamasında bildirdi ki, ÜAK-ın bağlanması ilə bağlı qərar onun üçün də gözlənilməz olub: "Rəsmi qurumların açıqladığı səbəblər inandırıcı görünmür. Düşünürəm ki, real səbəblərin nə olmasından asılı olmayaraq, bu istiqamətdə intensiv işlər görülməlidir. Həm Moskvadakı səfirliyimiz, həm diaspor təşkilatlarımız, həm də Rusiyada yaşayan fəallarımız bu məsələ ilə yaxından maraqlanmalıdır.
Mən 5 il Rusiya Prezidenti yanında Dövlət İdarəçilik Akademiyasında hüquq təhsili almışam və qrup yoldaşlarımın əksəriyyəti bu gün də Rusiyada yüksək vəzifələrdə çalışır. Çalışacam ki, onlarla da bu məsələ ətrafında fikir mübadiləsi aparım.
Düşünmürəm ki, bu qərar iki ölkə arasındakı münasibətlərə mənfi təsir göstərsin. Daha doğrusu, istəməzdim ki, bu məsələ Rusiya-Azərbaycan münasibətlərinə ciddi təsir göstərsin. Rusiya Federasiyası böyük ölkədir, orada çoxlu sayda millətlər yaşayır. Onlardan 3 milyonu azərbaycanlılardır. Bu qərardan sonra Bakının analoji addımlar atması münasibətləri gərginləşdirə bilər. Gərək məsələni müsbət məcrada həll etməyə yönəlik addımlar ataq və iki ölkə arasında mehriban qonşuluq və strateji tərəfdaşlıq münasibətlərinə xələl gətirə biləcək hər hansı qərarlardan çəkinək.
ÜAK, sadəcə, bir QHT-dir, onun ləğvi ilə Azərbaycana ciddi zərər gələcəyinə inanmıram. Müxtəlif adlarla yeni-yeni təşkilatlar yarana və daha güclü fəaliyyət göstərə bilər. Yenə deyirəm ki, məsələnin məğzini araşdırmaqda fayda var. Çünki bizim üçün maraqlıdır ki, Rusiya niyə məhz bu adda qurumun fəaliyyət göstərməsini istəmir? Aydın məsələdir ki, Rusiya Azərbaycan diasporunun fəaliyyətinə qarşı deyil və bunu qadağan edə bilməz.
Yeni adla fəaliyyətin onlar tərəfindən də təklif edilməsi maraqlıdır. Bu səbəbdən də məsələnin kökü dərindən araşdırılmalıdır.
Qətiyyən yol vermək olmaz ki, bu məsələ siyasiləşsin və iki ölkə arasındakı münasibətlərə xələl gəlsin. Azərbaycanı istəməyən qüvvələr, xüsusən də erməni diasporu elə məhz buna çalışır".
Bu qərarın qəbulunda Rusiyadakı erməni lobbisi və anti-Azərbaycan qüvvələrin nə dərəcədə rolunun olması ilə bağlı suala hüquq müdafiəçisi belə cavab verdi: "Mümkün variantdır. Bilirsiniz ki, erməni lobbisi dünyada güclüdür və hər vəchlə Azərbaycana qarşı təxribat xarakterli addımlar atmağa çalışır. Biz bunu Avropada mütəmadi olaraq müşahidə edirik. Rusiyada da erməni diasporu xeyli gücə malikdir. ÜAK-ın ləğvi qərarı da aşağı səviyyədə həyata keçirilmiş təxribat aktı ola bilər. İstənilən halda, Azərbaycan və azərbaycanlılar bu təxribata getməməlidir. Rusiya ilə münasibətləri gərginləşdirməməliyik".
Məhəmmədəli QƏRİBLİ