Üzeyir Cəfərov: "Əksinə, müsəlmanı müsəlmanın əlilə qırdırmaq istəyir"
Rusiya əsasən Şimali Qafqaz respublikalarının nümayəndələrindən ibarət 60 minlik "müsəlman ordusu"nu Suriyaya yeritmək üçün hazırlayıb. Bu haqda Səudiyyə Ərəbistanının "Al Watan" qəzeti "mötəbər mənbələrə" istinadla yazır. Bu ordu əsasən sünni müsəlmanlardan ibarətdir. Bildirilir ki, həmin qüvvələrin bir qismi artıq hərbi polis qismində Hələbdə xidmət keçir. Palmira yaxınlığında, Barrada vadisində isə bir sıra keçmiş sovet respublikalarından olan müsəlmanlardan ibarət muzdlu "Turan" batalyonu yaradılıb.
"Business İnsider" nəşri isə Rusiyanın Suriyadakı hərbi iştirakını getdikcə artırdığını bildirir. Nəşrin yazdığına görə, Suriyada Rusiya bazaları genişlənir, habelə Kremlin adından Bəşər Əsəd üçün döyüşən özəl hərbi şirkətlərin sayı artır. Diqqəti cəlb edən fakt budur ki, Suriyaya Çeçenistan və İnquşetiyadan yeni-yeni dəstələr göndərilir. Məqsəd İran döyüşçülərini sıxışdırmaqdır.
Xatırladaq ki, Rusiya Suriyada hava əməliyyatları ilə kifayətlənəcəyini və quruda döyüşlər aparmayacağını elan etmişdi. Lakin hava əməliyyatlarının gözlənilən nəticəni verməməsi Rusiyanı məcbur edib ki, Suriyaya həm xüsusi təyinatlılardan ibarət məhdud kontingent, həm də muzdlulardan ibarət "özəl ordular" göndərsin.
Nəşrin yazdığına görə, hazırda Moskva bütün Suriya boyu sünni müsəlmanlardan seçilmiş xüsusi təyinatlı quru qüvvələrini yerləşdirməkdədir.
Rusiyanın məhz sünni təriqətinə mənsub olan vətəndaşlarından ibarət 60 minlik ordunu Suriyaya yerləşdirmək istəməsi niyyətinin arxasında hansı maraqlar dura bilər?
Hərbi ekspert Üzeyir Cəfərov qəzetimizə açıqlamasında bildirdi ki, belə istək xoş niyyətdən xəbər vermir: "Hesab edirəm ki, bu hal həmin qaynar nöqtəyə əlavə gərginlik gətirmiş olacaq. Necə deyərlər, alovun üstünə bir az da benzin tökəcək. Bilirsiniz ki, Suriyada gedən münaqişədə din, təriqət faktoru əsasdır. Rusiya bu addımı ilə kiminsə rəğbətini qazana bilməz. Maraqlıdır ki, Rusiya həmin məsələdə Əsədi dəstəkləyir. Əsədə qarşı vuruşanların çoxu da sünni təriqətinə mənsubdur. Rusiya da həmin 60 minlik ordunu yalnız sünni vətəndaşlarından formalaşdırmaq istəyir. Bununla dini qarşıdurmanı zəiflətmiş olmur. Əksinə, müsəlmanı müsəlmanın əlilə qırdırmaq istəyir. Digər tərəfdən isə, oxuyuruq ki, ABŞ da "Müsəlman NATO"su yaratmaq istəyir. Hesab edirəm ki, islam kimi müqəddəs dinin adını belə məsələlərdə hallandırmaq doğru deyil. Çünki islam barışı, sülhü tərənnüm edən bir din kimi qəbul edilir. Onun adı ilə hərbi blok və ya ordu yaratmaq doğru deyil. Rusiya bu işdə Şimali Qafqaz faktorundan yararlanacaq. Kadırovun bu işdə Rusiyaya böyük dəstəyi olacaq. İstənilən halda, Rusiyanın bu addımını təqdir etmirəm. Çünki bu, həmin regiona əlavə gərginlik gətirmiş olacaq".
Məhəmmədəli QƏRİBLİ