Məhəmməd Əsədullazadə: "Ancaq iki ölkənin əlaqələrində dərin böhran yaradan..."
Məlum olduğu kimi, ABŞ-da səfərdə olan Türkiyə prezidenti Ərdoğanla Trampın görüşü keçirilib. Ərdoğanı çox isti qarşılayan Tramp ilk əvvəl deyib ki, "Ərdoğanla uzun və çətin görüşümüz olacaq, ancaq Türkiyə ilə münasibətlərimizi daha da gücləndirəcəyik".
İki lider jurnalistlər üçün brifinq keçirib. Tramp brifinqdə Türkiyə əsgərlərinin vaxtilə Koreya ilə savaşda ABŞ-a dəstək olduqlarını hələ də unutmadıqlarını vurğulayaraq, ikitərəfli münasibətləri daha da dərinləşdirəcəklərinin mesajını verib. ABŞ prezidenti Türkiyənin narahat olduğu PKK məsələsinə də toxunub. Bildirib ki, ABŞ PKK və İŞİD kimi terror qrupları ilə mübarizədə Türkiyənin yanındadır: "YPG məsələsində də Türkiyənin narahatlığını aradan qaldırmaq üçün çalışacağıq".
Ərdoğan isə çıxışında iki dəfə Trampı prezident seçkisindəki qələbəsi münasibətilə təbrik edib. O, Yaxın Şərqdəki vəziyyətdən daha çox danışıb. Ərdoğan Suriyanın ərazi bütövlüyü, bölgədə təhlükəsizlik zolağı, İŞİD-lə mübarizə mövzularında ABŞ-la birgə yeni səhifə açacaqlarına inandığını vurğulayıb.
Ancaq o da heç kəsə sirr deyil ki, tərəflər arasında yuxarıda sadalanan məsələlərlə bağlı fikir ayrılığı var. O baxımdan bundan sonrakı proseslərlə bağlı politoloqların gözləntiləri nədən ibarətdir? Məsələyə münasibət bildirən politoloq Məhəmməd Əsədullazadənin sözlərinə görə, ABŞ və Türkiyə prezidentlərinin görüşündə ciddi nəticələr əldə olunmasa da, NATO çərçivəsində iki ölkənin müttəfiqlik əlaqələrinin qorunub saxlanması istiqamətində addımlar atılacaq: "Prezidentlər Yaxın Şərq regionunda gedən siyasi-hərbi proseslərdə ikitərəfli əməkdaşlığı davam etdirmək, İŞİD-ə qarşı mübarizədə birgə fəaliyyət göstərmək məsələlərində ortaq mövqe nümayiş etdirdilər. Ancaq iki ölkənin əlaqələrində dərin böhran yaradan ABŞ-ın Suriyada PKK-nın qolu olan YPG-yə logistik və siyasi dəstək verməsidir. ABŞ və Türkiyənin YPG üzərindən siyasi əlaqələri Tramp-Ərdoğan görüşündə öz həllini tapmadı. Görünən odur ki, ABŞ YPG-yə silah yardımını davam etdirəcək, iki ölkə arasında qeyri-müəyyənlik davam edəcək. Şimali Suriyada YPG-PKK terror təşkilatını legitimləşdirən ABŞ-ın bu siyasətindən geri çəkilməsi gözlənilmir. Kifayət qədər silah və zirehli texnika ilə təmin olunan kürd terrorçularının Rakkadan sonra əsas hədəfi Türkiyə ilə mübarizə olacaq. Ərdoğan çox çalışır ki, ABŞ Türkiyə ilə müttəfiq əlaqələrinə sadiq qalsın. Qeyd etmək lazımdır ki, Yaxın Şərqdə siyasi-hərbi proseslər Trampdan asılı deyil. Pentaqon və dərin dövlət qarşısında geri çəkilməyə məruz qalan Tramp kürd siyasətində Türkiyəyə dəstək verə bilməyəcək. Türkiyə artıq Rusiya və ABŞ-ın YPG-PKK terror təşkilatlarına dəstək verəcəyinin fərqindədir. Buna görə də Şimali İraqda hava əməliyyatları aparır. Türkiyə səbrlə Rakka əməliyyatından sonra ABŞ-ın YPG-yə dəstəyini davam etdirib-etdirməyəcəyini gözləyir".
Vidadi ORDAHALLI
p>