Rusiya üçün Qafqazda forpost ölkə olan Ermənistan beynəlxalq miqyasda yeni təzyiqlərlə üz-üzə qalıb. Bunun əsas səbəblərindən biri də Ermənistan ərazisində Rusiya hərbi bazalarının olması və onların bu ölkəni hədəf halına gətirməsidir. Hadisələrin gedişi ABŞ və Rusiya arasında ziddiyyətlərin artmasının Ermənistan üçün ciddi problemlər yaratdığını üzə çıxarır. Belə ki, bu durumda Ermənistan avtomatik olaraq NATO üçün hədəfə çevrilir. Amma Rusiyanın məlum bazalardan İŞİD-ə qarşı da istifadə etmək niyyəti erməni tərəfinin həm də sözügedən təşkilatın hədəfində olacağını aydın şəkildə meydana qoyur. Brüsseldə fəaliyyət göstərən "Avropa Siyasəti Mərkəzi"nin siyasi analitiki Amanda Pol bu fonda diqqəti ona yönəldir ki,
rəsmi İrəvan Moskvanın nəzarətindədir, lakin Ermənistana böyük təsir imkanlarına malik olan erməni diasporu Vaşinqtona yaxındır. Belə vəziyyt isə Ermənistana qarşı təzyiqlərin miqyasının artmasını qaçılmaz edir. Bununla yanaşı, Amanda Pol hesab edir ki, Rusiya Gümrüdəki 102-ci hərbi bazadan Suriyadakı əməliyyatları üçün istifadə edəcək və İŞİD-i vuracaqsa, bu bütün regiona ciddi təhlükə yaradacaq: "Çünki İŞİD Ermənistanı hədəfə alacaq və bundan da ən çox region əziyyət çəkəcək. Moskva bununla öz hərbi üstünlüyünü göstərəcək, lakin bu, təhlükəli oyundur". Onun sözlərinə görə, Gümrüdəki baza Suriyaya yaxındır və Rusiyanın bu bazadan istifadə edəcəyi ehtimalı böyükdür. Hazırda belə vəziyyətdə Ermənistanı İŞİD qorxusu bürüməkdədir. Bundan çıxış yollarından biri kimi düşmən ölkədə İŞİD-lə əməkdaşlıq məsələsi gündəmə gətirilir. Belə ki, Ermənistanın 90-cı illərin əvvəllərində Qarabağa göndərdiyi ilk kəşfiyyat-diversiya dəstəsinin komandiri Vova Vartanov həm İŞİD-lə əməkdaşlığı təklif edir, həm də mümkün olarsa, Azərbaycana qarşı bu terror qruplaşmasının xidmətindən istifadə etməyi məsləhət görür. O hesab edir ki, bu durumda Ermənistan üçün İŞİD təhlükəsi sovrulacaq: "Rusiya bizim üçün, əlbəttə ki, saxta tərəfdaş deyil. Lakin nəzərə alanda ki, o, Azərbaycanın da müttəfiqidir, sonda iki stulda eyni vaxtda oturmağa çalışacaq və bərabərlik işarəsi qoyacaq. Lakin Rusiya Azərbaycana müttəfiq olmasa da, ən azından bizə Türkiyədən qorunmaq üçün lazımdır. İŞİD-ə gəldikdə isə, əlbəttə, biz onunla kağız üzərində müttəfiqlik müqaviləsi bağlamalı deyilik, ancaq bu təşkilat bizim üçün yaxşı şeylər edə bilər". Beləliklə, burada erməni tərəfi həm də terrorçu mahiyyətini bir daha ortaya qoymuş olur və İŞİD kimi terror fəaliyyəti ilə məşğul olan qurumla əməkdaşlığa gedə biləcəyini açıq şəkildə bəyan edir. Bununla, qeyd olunduğu kimi, düşmən tərəf İŞİD zərbələrindən qorunmaq istəyir. Lakin məsələ təkcə İŞİD təhlükəsi yox, Ermənistanın ABŞ-a qarşı cəbhədə yer almasıdır. Rusiya Gümrüdəki bazadan Suriyadakı əməliyyatlarda istifadə edəcəksə, bu, Ermənistanın da Moskvanın dəstək verdiyi Bəşər Əsədin yanında yer alması deməkdir. Bununla əlaqədar Amanda Pol da hesab edir ki, Rusiya Ermənistanı ABŞ-a qarşı cəbhəyə sürükləyir və bu olduqca təhlkəli oyundur.
Elə erməni ekspert Aram Amatuni də bildirib ki, ABŞ-ın Ermənistandakı parlament seçkiləri ilə bağlı hakimiyyət nümayəndələrinə sanksiyaların tətbiqini gündəmə gətirməsi dolayısı ilə İrəvana Rusiyanın yanında olmasının mesajıdır. Xatırladaq ki, bu günlərdə Ermənistanın "Jamanak" qəzeti bir neçə gün sonra ABŞ-ın parlament seçkilərinin saxtalaşdırılmasında iştirak edən erməni məmurlara qarşı sanksiyaların tətbiqi prosesinə başladığını yazmışdı. Qəzet qeyd edirdi ki, parlament seçkilərini saxtalaşdırmaqda şübhəli bilinən hakim Respublika Partiyasının bir sıra üzvünün ABŞ hökumətinin maliyyələşdirdiyi layihələrdə iştirakına qadağa qoyulacaq. Sanksiyalar tətbiq ediləcək şəxslərin adı "qara siyahı"ya salınacaq və onların ABŞ-a girişi qadağan olunacaq: "Ermənistan Prezident Administrasiyası ABŞ səfirliyindən kimlərin adının "qara siyahı"ya salındığı haqda dəqiq informasiya öyrənməyə çalışır. Lakin ABŞ bu şəxslərə təkcə sanksiyalar tətbiq etməklə kifayətlənməyəcək, həmçinin, onların qohumlarının da adını "qara siyahı"ya salacaq. İstisna deyil ki, ABŞ şirkətləri öz investisiyalarının bir hissəsini də Ermənistandan çıxaracaq". Aram Amatuni bu durumda Ermənistanın son şansının hələ də qaldığını açıqlayıb: "ABŞ Konqresi Avropada Rusiyanın təsirinin zəiflədilməsi üçün 100 milyon dollar vəsait ayırdı. Vaşinqtonun bu planına Şərq əməkdaşlığı ölkələri, o cümlədən Ermənistan daxildir. Həmçinin, böyük ehtimalla, əsas hədəfdə Qafqaz regionu da var. Beləliklə, Ermənistan ciddi seçim qarşısındadır. Yəni bu prosesə qoşularsa, ABŞ-ın hücumundan yayına bilər. Lakin İrəvandakı hakimiyyətin Kremlin əleyhinə heç nə etməyəcəyi də dəqiqdir. Bu isə Ermənistanın gələcəyi üçün ciddi təhlükələrdən xəbər verir".
Tahir TAĞIYEV