Məhəmməd Əsədullazadə: "Yüzlərlə islam abidəsinin dağıdılmasını Qətər rəsmiləri görməli və buna öz münasibətini bildirməlidir"
Məlum olduğu kimi, prezident Serj Sarkisyan Ermənistan-Qətər münasibətlərinin 20-ci ildönümü münasibətilə ilk dəfə bu ölkəyə səfər edib. Sarkisyanın səfər çərçivəsində Qətər əmiri Təmim bin Hamad əl Tani, o cümlədən "Qətər Airways" şirkətinin icraçı direktoru Əkbər əl Bakri, iş adamları və yerli erməni icmasının nümayəndələri ilə görüşlər keçirməsi nəzərdə tutulur.
Qeyd edək ki, ciddi sosial-iqtisadi çətinliklər içində boğulan Ermənistanda dövlət borcunun kəskin şəkildə artması, ölkənin defolt təhlükəsindən qurtulması üçün Sarkisyan ərəb şeyxlərini tez-tez yad edir.
Ancaq o da məlumdur ki, Ermənistanın apardığı işğalçılıq siyasəti nəticəsində islam abidələri məhv edilib. Bu günlərdə İslam Əməkdaşlıq Təşkilatının rəsmi mətbuat orqanı olan "OIC Journal"da Azərbaycan Prezidenti İlham Əliyevin "İslam həmrəyliyinin gücləndirilməsi zamanın çağırışıdır" sərlövhəli məqaləsində məhz bu məqamlar xüsusi olaraq qeyd edilib: "Hesab edirəm ki, Ermənistanı açıq-aydın təcavüzkar kimi tanıyan BMT və İƏT-in qətnamələri işğalçı dövlətlə münasibətləri inkişaf etdirmək niyyətində olan bütün müsəlman ölkələri üçün əsas mesaj olmalıdır. Çünki Ermənistanın işğalçılıq siyasəti təkcə Azərbaycanın dini-mədəni sərvətlərinə qarşı deyil, həm də ümumilikdə islamın tarixi-mədəni irsinə qarşı olan hücumdur. Ermənistanın işğal etdiyi ərazilərdə islam mədəniyyətinə aid yüzlərlə abidə, məscid, ibadətgah, qəbiristanlıq və s. dağıdılmış, bütün bunlar ATƏT-in faktaraşdırıcı missiyaları tərəfindən təsdiq olunmuşdur".
Sadalanan məqamlar tamamilə doğrudur və o baxımdan Ermənistanla münasibət qurmaq istəyən İslam dövlətləri bunu nəzərə almalı və buna yol verməməlidir.
Məsələyə münasibət bildirən politoloq Məhəmməd Əsədullazadənin sözlərinə görə, Sarkisyanın Qətərə səfəri iki ölkə arasında əlaqələrin 20 illiyinə həsr olunsa da, məqsəd burada Qətər investorlarını Ermənistana cəlb etmək, turizm sahəsində əlaqələr qurmaqdır: "Qətər körfəz ölkəsi olaraq, inkişaf etmiş maliyyə qaynaqlarına malikdir. Sarkisyanın fikri ərəb iş adamlarını müflis olmuş Ermənistan iqtisadiyyatına sərmayə yatırmağa cəlb etməkdir. Azərbaycanın son illər ərəb ölkələrilə sıx əlaqələri Ermənistan tərəfindən izlənilir və Azərbaycanın addımını təkrar edirlər. Qeyd edim ki, Ermənistan cəlbedici iqtisadi mənfəət olmayan bir ölkədir. Bütün ölkə iqtisadiyyatı Rusiyanın inhisarındadır. Ola bilər ki, Ermənistan Qətərdə Qarabağa turizm turlarını reklam etsin, investisiya layihələrini qabartsın. Azərbaycan Qətərlə əlaqələri genişləndirməli, Ermənistanın ərəb ölkələri ilə əməkdaşlığına imkan verməməlidir. Ermənistanın işğalçı siyasəti nəticəsində yüzlərlə islam abidəsinin dağıdılmasını Qətər rəsmiləri görməli və buna öz münasibətini bildirməlidir.
Dövlət başçısının BMT qətnamələri ilə bağlı qeyd etdiklərinə müsəlman ölkələri həmrəylik nümayiş etdirməlidir. Ermənistanın işğalçı ölkə olması ərəb ölkələrinin, xüsusilə də körfəz sahili ölkələrin diqqətinə çatdırılmalıdır. Hesab edirəm ki, bu ölkələrlə əməkdaşlığı səmərəli qurub inkişaf etdirsək, Ermənistanla diplomatik əlaqələri kəsə bilərlər. Səudiyyə Ərəbistanını da bu işə cəlb etmək olar. Səudiyyə Ermənistanla diplomatik əlaqəsi olmayan ölkəmizin müttəfiqidir. Körfəzdə lider statusuna malik bir ölkədir. Çalışmalıyıq ki, Ermənistanın körfəz ölkələri ilə turizm və iqtisadi əlaqələrinə imkan verməyək. İslam abidələri bütün İslam dünyasına məxsusdur. Hesab edirəm ki, Qətər və digər ölkələrin ictimaiyyəti erməni vandalizmi barədə geniş məlumatlandırılmalıdır".
Vidadi ORDAHALLI