Adil Qeybulla: "Sarkisyanla bağlı belə vəziyyət yaranırsa, deməli, ortalıqda hansısa ciddi saxtakarlıq faktoru var"
Ermənistan prezidenti Serj Sarkisyan İrəvanda keçirilən mer seçkilərində səs verib. Ancaq məsələ ondadır ki, parlament seçkilərində olduğu kimi, Sarkisyan bu dəfə də problemlə üzləşib. Belə ki, 9/18 saylı seçki məntəqəsində barmaq izinin tanınması üçün nəzərdə tutulan aparat Sarkisyanın kimliyini tanımayıb. Ermənistan prezidentinin barmaq izi götürüləndən sonra o səs verə bilib.
Bununla ikinci dəfədir erməni prezident səs verərkən pərt olur. Digər tərəfdən, İrəvanın ağsaqqallar şurasına seçkilərdə də bənzər hal yaşanıb. Belə ki, onun bütün barmaqlarını yoxlamaq məcburiyyəti yaranıb.
Maraqlıdır, hər seçkidə Sarkisyanın barmaq izlərini götürmək niyə problemə çevrilir? Bunun tibbi izahı varmı?
Məsələyə münasibət bildirən tibb elmləri doktoru, professor Adil Qeybullanın sözlərinə görə, Sarkisyanın belə kuryoz vəziyyətlə üzləşməsi başadüşülən deyil: "Ona görə ki, hər kəsin barmaq izi fərdidir. Hər bir şəxs üçün barmaq izi o dərəcədə fərdidir ki, bir barmaq izi ilə bütün məlumatlar müvafiq orqanlarda toplanır. Yəni bununla şəxsiyyətin identifikasiyası müəyyən olunur. Dünyada elə bir cihaz yoxdur ki, barmaq izini görməsin. Sarkisyanla bağlı yaranan vəziyyətə gəldikdə isə, ortada hansısa saxtalaşdırma problemi yoxdursa, o zaman gərək belə vəziyyət yaranmasın. Yaranırsa, deməli, ortalıqda hansısa ciddi saxtakarlıq faktoru var. Buna görə də tez-tez belə anlaşılmaz vəziyyət yaranır. Yaranan vəziyyətə ancaq bu adı vermək olar".
Vidadi ORDAHALLI