Vüqar Qədirov: "Artıq get-gedə sübut olunur ki, Ermənistan bütün dəyərlərini itirən bir subyektə çevrilir"
Ermənistandakı bütün seçkilərdə olduğu kimi, mer seçkiləri də kobud pozuntularla həyata keçirilir. "Yerkir Tsirani" təşkilatının lideri, İrəvan şəhər meri vəzifəsinə namizəd, müxalif lider Zaruhi Postancyan üzləşdiyi polis zorakılığından sonra təcili mətbuat konfransı keçirib.
Baş verən ədalətsizlikləri, qanun pozuntularını qeyd edən Postancyan mətbuat konfransı zamanı fəaliyyət göstərən hökuməti devirmək üçün "Milli Müqavimət Hərəkatı"nın başlanmasının lazım olduğunu bəyan edib.
O, xalqa ünvanlandığı müraciətində siyasi böhranın aradan qaldırılması üçün sosial təbəqələrin fəal iştirakını tələb edib. Postancyan Ermənistanda qanunsuz rejimin devrilməsinə çağırışlar edərək yaradılacaq hərəkatın qətnamələrini oxuyub.
Postancyana görə, "Milli Müqavimət Hərəkatı" ali qanunda dəyişikliklərə dair keçirilən referendumun nəticələrini, Serj Sarkisyan və Respublika Partiyasının qanunsuz hakimiyyətini tanımır və onlara qarşı istintaq prosesinin başlanmasını tələb edir. Öz siyasi platformasının digər detallarını vurğulayan müxalif fəal respublikaçı namizəd Taron Markaryanın bir gün sakit yaşamayacağını, ümumən hakimiyyətin həyatının cəhənnəmə çevriləcəyini bildirib.
Qeyd edək ki, Ermənistanda keçiriləm mer seçkilərinə beynəlxalq diqqət də çox zəifdir. Cəmi bir beynəlxalq qurum müşahidəçi kimi müraciət edib.
İrəvan şəhər meri vəzifəsinə keçirilən seçkilərə beynəlxalq diqqətin və marağın belə zəif olması nə ilə bağlıdır?
Ekspert Vüqar Qədirov qəzetimizə bildirdi ki, bunun başlıca səbəbi Ermənistanda diktaturanın, antidemokratik mühitin hökm sürməsidir: "Son parlament seçkiləri Ermənistanda kobud pozuntularla müşahidə olundu. Hazırda Ermənistan həmin qınaqdan çıxa bilmir. Beynəlxalq qurumlarla yanaşı, həm də aparıcı ölkələrin rəsmiləri Ermənistandakı parlament seçkilərini biabırçı adlandırdı. Bəyanatlarda qeyd edilirdi ki, Ermənistanda hakimiyyət seçkiləri pulla alıb. Ermənistan rəhbərliyi keçirdiyi mühüm seçkinin nəticələrini tam legitimləşdirə bilmədiyi halda, mer seçkisi keçirir. Bu baxımdan da beynəlxalq qurumlar keçirilən seçkiyə maraq göstərmir. Gələn bir təşkilat da elə bir nüfuza malik deyil. Dərindən araşdırılsa, məlum olacaq ki, bəlkə də sədri ermənidir. Artıq get-gedə sübut olunur ki, Ermənistan bütün dəyərlərini itirən bir subyektə çevrilir".
Məhəmmədəli QƏRİBLİ