Fikrət Sadıqov: "Bizə konkret məsələlərin həlli lazımdır"
ATƏT-in Minsk Qrupunun həmsədrləri iyunda Ermənistana və Azərbaycana səfər edəcək. Həmin səfərdən sonra Azərbaycan və Ermənistan xarici işlər nazirlərinin görüşü keçirilə bilər.
Bunu mətbuata açıqlamasında Ermənistan xarici işlər naziri Edvard Nalbandyan deyib: "İyunda ATƏT-in Minsk Qrupunun həmsədrlərinin regional səfəri gözlənir. Bundan sonra, lazım olacaqsa, Ermənistan və Azərbaycan xarici işlər nazirlərinin görüşü keçirilə bilər. Danışıqların alternativi yoxdur. Onları davam etdirmək lazımdır".
Bu arada Azərbaycan xarici işlər naziri Elmar Məmmədyarov bunun prinsip etibarilə mümkün olduğunu qeyd edib. Ancaq onun fikrincə, diplomatiyada danışıq xatirinə danışıq yoxdur: "Üç ölkənin xarici işlər nazirlərinin sonuncu Moskva görüşündən sonra məndə belə təəssürat yarandı ki, qoşunların çıxarılması müqabilində sülh və ya ərazi müqabilində sülh mümkündür. Son on iki il ərzində danışıqlar prosesinin məntiqini bu təşkil edir. Amma diplomatiyada danışıqlar naminə danışıqlar mövcud deyil. Hər kəsə aydındır ki, Ermənistan öz qoşunlarını işğal olunmuş Azərbaycan ərazilərindən çıxarmalıdır".
Reallıq ondan ibarətdir ki, Ermənistan nəticəsiz danışıqlar prosesinin davam etdirilməsində maraqlıdır. Bu minvalla, mövcud status-kvonun uzadılmasını istəyir. Azərbaycanın isə bu məsələdə mövqeyi daha konkretdir. Danışıqların alternativi yoxdursa, o zaman qarşı tərəf konkret addımlar atmalıdır.
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Nalbandyan dəfələrlə belə fikirlər səsləndirib: "Ancaq reallıqda vəziyyət başqadır. Məsələ ondadır ki, Ermənistan danışıqları uzadır. Ötən il aprel döyüşlərindən sonra Ermənistan stol arxasında əyləşmək istəmirdi. Danışıqlardan ya imtina edirdilər, ya da boyun qaçırırdılar. İndi yeni bir bəyanatla çıxış edirlər ki, danışıqların alternativi yoxdur. Əslində, Nalbandyan haqlı deyil. Ona görə haqlı deyil ki, danışıqların alternativi var. Necə deyərlər, çox yaxşı alternativi var. Biz danışıqlardan heç vaxt imtina etməmişik, həmsədrlər tərəfindən təşkil olunan hər bir görüşdə iştirak etmişik. Yəni bundan imtina etməmişik. Ancaq bu heç də o demək deyil ki, Azərbaycan digər alternativdən istifadə edilməsindən imtina edir. Biz danışıqlarda danışıq, görüşlərdə görüş naminə iştirak etməkdə maraqlı deyilik. Bizə konkret məsələlərin həlli lazımdır. Biz danışıqların tərəfdarı olaraq, eyni zamanda, digər alternativə də əl ata bilərik. Çünki bizim torpaqlar işğal altındadır. O üzdən buna hüququmuz, iradəmiz, hərbi potensialımız da var".
Vidadi ORDAHALLI