Qabil Hüseynli: "Bu məsələdə Azərbaycanın inciməyə haqqı var"
Məlum olduğu kimi, İslam Əməkdaşlıq Təşkilatının rəsmi mətbuat orqanı olan "OIC Journal"da Azərbaycan Respublikasının Prezidenti İlham Əliyevin "İslam həmrəyliyinin gücləndirilməsi zamanın çağırışıdır" sərlövhəli məqaləsi dərc edilib.
Məqalədə Prezident İslam ölkələri arasında həmrəylik mövzusuna da toxunub: "İƏT Azərbaycanın ərazi bütövlüyü və haqlı mövqeyini dəstəkləyən, Xocalı soyqırımını tanımağa, Ermənistanın işğalçılıq siyasətinə qarşı praktiki addımlar atmağa səsləyən çoxsaylı qətnamələr qəbul etmiş, məsələ təşkilatın Xarici İşlər Nazirləri Şurasında dəfələrlə müzakirə olunmuş, həmçinin, 2016-cı ilin sentyabrında İƏT çərçivəsində Ermənistanın Azərbaycana qarşı təcavüzünə dair Kontakt Qrupu təsis edilmiş və onun ilk iclası keçirilmişdir. Hesab edirəm ki, Ermənistanı açıq-aydın təcavüzkar kimi tanıyan BMT və İƏT-in qətnamələri işğalçı dövlətlə münasibətləri inkişaf etdirmək niyyətində olan bütün müsəlman ölkələri üçün əsas mesaj olmalıdır. Çünki Ermənistanın işğalçılıq siyasəti təkcə Azərbaycanın dini-mədəni sərvətlərinə qarşı deyil, həm də ümumilikdə islamın tarixi-mədəni irsinə qarşı olan hücumdur. Ermənistanın işğal etdiyi ərazilərdə islam mədəniyyətinə aid yüzlərlə abidə, məscid, ibadətgah, qəbiristanlıq və s. dağıdılmış, bütün bunlar ATƏT-in faktaraşdırıcı missiyaları tərəfindən təsdiq olunmuşdur. Onu da bildirmək istərdim ki, Pakistan və Səudiyyə Ərəbistanı Ermənistanı Azərbaycan torpaqlarını işğal etdiyinə görə rəsmən tanımaqdan imtina etmiş, Türkiyə isə bu ölkə ilə heç bir əlaqə qurmamışdır. Hazırda 5 müsəlman dövləti Xocalı soyqırımını rəsmən tanımışdır. Biz bütün bunları qardaş münasibəti və real dəstəyin nümunəsi hesab edirik".
Prezidentin məqaləsində İƏT-ə üzv olan 5 ölkənin Xocalı soyqırımını tanıması ilə bağlı vurğuladığı fikir doğrudan da təəccüb doğurur. Çünki 57 ölkənin üzv olduğu bir qurumdan belə nəticənin ortaya qoyulması qənaətbəxş sayıla bilməz. Bəllidir ki, Azərbaycan İslam dünyasında mövcud münaqişələrin həllinə öz töhfəsini əsirgəmir, problemlərin ədalətli həlli ilə bağlı müzakirələrdə birmənalı olaraq beynəlxalq hüququ müdafiə edir və öz prinsipial mövqeyini həmişə qoruyub saxlayır. Demək olar ki, islamla bağlı olan bütün bayram mərasimlərinə İlham Əliyev, fərq qoymadan, ölkəmizdə akkreditasiya olunan bütün müsəlman ölkələrinin səfirlərini dəvət edir. Onlara səmimi münasibətini ortaya qoyur. Bunun fonunda cəmi 5 müsəlman ölkəsinin Xocalı soyqırımını tanıması nə ilə bağlıdır?
Politoloq Qabil Hüseynlinin sözlərinə görə, bu nəticə bizi heç cür qane edə bilməz: "Martın 1-də Pakistan İslam Respublikasının paytaxtı İslamabadda İqtisadi Əməkdaşlıq Təşkilatının XIII sammiti keçirilib. Prezident İlham Əliyev sammitdə iştirak edib. Tədbirin sonunda İslamabad Bəyannaməsi qəbul edilib. Bəyannamə siyasi, iqtisadi, ticarət, nəqliyyat, informasiya və kommunikasiya, enerji və digər sahələrdə üzv ölkələrlə əməkdaşlığın inkişaf etdirilməsi baxımından yeni vəzifə və tapşırıqlar müəyyən edir. Siyasi sahədə üzv ölkələr dövlət başçıları səviyyəsində BMT Nizamnaməsində təsbit olunmuş məqsəd və prinsiplərə, xüsusilə dövlətlərin siyasi müstəqilliyi, ərazi bütövlüyü və suverenliyinə öhdəliklərini bir daha vurğulayırlar. Həmçinin, bəyannamədə İƏT regionunda həll edilməmiş münaqişələr, xüsusilə Ermənistan-Azərbaycan münaqişəsinin mövcud olmasının iqtisadi inkişaf və regionun potensialının tam şəkildə icrasına, regional və daha geniş əməkdaşlığa ciddi şəkildə maneə olmasına münasibətdə narahatlıq ifadə olunaraq, bu kimi münaqişələrin beynəlxalq hüququn norma və prinsipləri, xüsusilə dövlətlərin ərazi bütövlüyü və suverenliyi əsasında tezliklə həll edilməsi üçün səylərin artırılmasının vacibliyi qeyd olunur. Sənəddə xarici işğal amili də öz təsbitini tapıb.
İƏT Dağlıq Qarabağ məsələsində, demək olar, həm BMT-yə, həm də digər beynəlxalq təşkilatlara öz təzyiqini artırır, məsələnin obyektiv, beynəlxalq hüquq çərçivəsində həll edilməsi istiqamətində səylərini gücləndirir. Biz İƏT-in timsalında özümüzə çox böyük müttəfiq qazanmışıq. Azərbaycanın bu təşkilatla münasibətlərinin yüksək səviyyədə olması ölkəmizə çox böyük dividendlər gətirir. Azərbaycan hazırda İslam ölkələri arasında nümunəvilik, ölkənin potensialı və dünya siyasətində oynadığı çevik rol baxımından fərqlənir. Ancaq buna baxmayaraq, bəzi müsəlman ölkələrinin Dağlıq Qarabağ məsələsinə yanaşmasında fərqli münasibəti hiss edirik. Cəmi 5 ölkənin Xocalı soyqırımını tanıması olduqca zəif göstəricidir. Hesab edirəm ki, bu məsələdə Azərbaycanın inciməyə haqqı var. Yəqin ki, İƏT gələcək fəaliyyətində bu istiqamətdə ölkələrə lazımi göstərişlər verəcək ki, təşkilatın mövqeyilə ayrı-ayrı ölkələrin məsələyə münasibəti arasında disbalans olmasın".
Məhəmmədəli QƏRİBLİ