Arzu Nağıyev: "Ermənilərin lobbiçilik siyasəti Şuşa ilə Xankəndiyə daha çox bağlıdır"
Ermənilər qondarma "Dağlıq Qarabağ Respublikası"nın "paytaxtı"nı Şuşaya köçürmək niyyətindədir. Rusiyanın erməniyönümlü saytları bildirib ki, Dağlıq Qarabağın separatçı hakimiyyəti uydurma "DQR" "parlamenti"nin Şuşaya köçürülməsi layihəsini müzakirə edib. Bildirilir ki, son nəticədə Xankəndi ilə birləşmə yolu ilə "DQR"in "paytaxtı" Şuşaya köçürülə bilər.
Son zamanlar ermənilərin ard-arda təxribatlarının şahidi oluruq. Danışıqlar prosesini pozmaqda və status-kvonu saxlamaqda maraqlı olan Ermənistan bunun üçün müxtəlif üsullara əl atır. Separatçı rejimin "paytaxtı"nın Şuşaya köçürülməsi, xarici ölkələrdə nümayəndəliklərinin açılması kimi fikirlərin yayılması da bu qəbildəndir.
Ermənilərin bu niyyəti nəyə hesablana bilər və Azərbaycan bununla bağlı hansı addımları atmalıdır?
Ekspert Arzu Nağıyevin sözlərinə görə, bu addım Azərbaycan Konstitusiyasına, eləcə də beynəlxalq hüquq normalarına ziddir: "Lakin Ermənistanın işğalçı rejiminin beynəlxalq hüquq normalarını tapdaladığı göz qabağındadır. Görünür, Ermənistan hakimiyyətinin işğal etdikləri Azərbaycan torpaqları ilə bağlı məkrli planları davam edir. Şuşaya köçmə işi də məhz işğal etdikləri torpaqları mənimsəmək məqsədlərindən xəbər verir.
Şuşanı "paytaxt" seçməklə ermənilər bir neçə məsələni həm siyasi, həm iqtisadi, həm də hərbi, yəni strateji baxımdan öz xeyirlərinə həll etmək istəyir. Yəni əsrlər boyu alınmaz qalaya çevrilən Şuşanı zəbt etməklə, bunlar öz "qəhrəman"lığını göstərmək niyyətini ortaya qoyur. Digər tərəfdən, bölgənin adını dəyişib Artsax qoymaqla yeniləşmə və təbii ki, özlərinin qondarma idarəçi qurumlarını ora köçürmək istəyirlər və İrəvana daha yaxın olurlar. Çünki qəflətən Dağlıq Qarabağla bağlı rayonların boşaldılması başlasa, ən son anda Şuşa və Laçın gündəmə gələ bilər. Bundan başqa, ermənilərin lobbiçilik siyasəti Şuşa ilə Xankəndiyə daha çox bağlıdır. Yəni əsas məqamlar budur və Şuşa yüksəklikdə yerləşdiyi üçün həm də strateji əhəmiyyəti daha çoxdur. Təbii ki, Azərbaycan tərəfi belə halları daim nəzərə alıb və beynəlxalq təşkilatlar da bu haqda məlumatlıdır. Bunun üçün də əsasən xarici siyasətdə mühüm addımlar atmaq lazımdır və düşünürəm ki, atılır".
Məhəmmədəli QƏRİBLİ