Aqşin Əliyev: İlqar Vəlizadə: "Moskva İrəvanın tələsinə düşməyəcək"
Məlum olduğu kimi, Ermənistan-Rusiya birləşmiş qoşun qruplaşmasının rəhbəri general Andranik Makaryan rus qoşunlarını Qarabağa yeridəcəyi barədə açıqlama verib. Bunu nə dərəcədə mümkün saymaq olar?
Ekspert Aqşin Əliyevin sözlərinə görə, Rusiyanın Ermənistandakı 102-ci hərbi bazası Moskvanın bu regiondakı maraqlarını tam təmin etməklə yanaşı, üstəlik, Ermənistanın təhlükəsizliyini də təmin edir: "Ermənistan-Rusiya birləşmiş qoşun qruplaşması 30 noyabr 2016-cı il tarixdə bağlanmış Rusiya-Ermənistan müqaviləsi əsasında yaradılıb. Qruplaşmaya Ermənistanda dislokasiya olunan Rusiya hərbi bazası və Ermənistan silahlı qüvvələrinin 5-ci korpusu daxil edilib.
Makaryan bildirib ki, onun rəhbərlik etdiyi qruplaşma, o cümlədən, Ermənistandakı Rusiya hərbi bazası yalnız Ermənistan silahlı qüvvələrinin ali baş komandanının əmri ilə hərəkət edəcək: "Sazişdə belə yazılıb. Qruplaşma Ermənistan sərhədlərinin, regionun təhlükəsizliyinin təmini üçün nəzərdə tutulub.
Erməni general Ermənistan-Rusiya birləşmiş qoşun qruplaşmasının Rusiyanın göstərişini gözləmədən Qarabağ münaqişəsi zonasına aparıla biləcəyini də vurğulayıb. Bu yalandırsa, erməni general cəzalandırılmalıdır. Əgər doğrudursa, Azərbaycan Rusiyadan izahat tələb etməlidir".
Politoloq İlqar Vəlizadə isə hesab edir ki,
Ermənistan hərbi rəhbərliyinin rus-erməni birgə qruplaşması ilə bağlı açıqlamaları spekulyativ xarakter daşıyır: "Çünki səsləndirilən fikirlərə gərək Rusiya da şərik olsun. İrəvan rus-erməni qruplaşmasından Bakıya qarşı istifadə etməyə çalışır, Moskva isə tamam başqa məqsədlər güdür. Rusiya Azərbaycanı özünə açıq düşmən etmək niyyətində deyil. Ona görə də İrəvanın maraqları ilə Moskvanınkı üst-üstə düşmür.
Bu addım Cənub-Şərqi Asiyada, Şərqi Aralıq dənizi regionunda Rusiyanın hərbi-siyasi mövcudluğunu gücləndirməyə hesablanıb. Ermənistandakı 102-ci baza koordinasiya rolunu oynayır. Çünki Rusiyanın Suriya, Abxaziyada da bazaları var. Coğrafi aspektdən yanaşsaq, Gümrüdəki baza ortada yerləşir. Rusiya isə Suriyadakı bazası ilə bu regiondakı infrastrukturları arasında sıx əlaqələr yaratmaq istəyir. 102-ci baza da vacib strateji ərazidə yerləşdiyindən, bu planda müəyyən rol oynayır. Moskva Suriyada konflikt bitəndən sonra da bu regionda öz hərbi nüfuzunu saxlamaq istəyir. Lavrov bu yaxınlarda belə bir ifadə işlətdi ki, İŞİD-lə mübarizdə Rusiyanın hüdudlarından kənarda olan bazalardan da istifadə ediləcək. Yəni Gümrüdən savayı, Qırğızıstan və Tacikistandakı rus bazaları da nəzərdə tutulub. Rusiyalı diplomatın bu frazası ermənilərin qəzəbinə səbəb olub. Bu da onu göstərir ki, əslində, 102-ci bazanın təkcə Cənubi Qafqazda deyil, daha geniş ərazilərdə istifadəsi nəzərdə tutulur".
Politoloq hesab edir ki, ermənilərin Gümrüdəki 102-ci bazanı Azərbaycan əleyhinə yönəltməyə çalışması tamamilə reallıqdan uzaqdır: "Rusiyanın daha vacib hədəfləri var. Moskva İrəvanın tələsinə düşməyəcək. Üstəlik, indiki şəraitdə Rusiyaya İŞİD-lə mübarizədə real müttəfiqlər lazımdır. Bu real müttəfiqlər sırasında Azərbaycan da yer ala bilər. Bir sözlə, Ermənistan, bütün hallarda, yenə də oyundan kənarda qalır".
Məhəmmədəli QƏRİBLİ