Rusiyanın forpostu olan Ermənistanda hərbi varlığını gedərək artırması indi bu ölkədə böyük təşvişlə qarşılanır. Ermənistanda hesab edirlər ki, Moskvanın bu addımları ölkəni getdikcə daha çox NATO-nun hədəfi halına gətirir. Çünki bu bazanın əsas missiyası daha çox NATO-ya qarşıdır. Amma erməniləri narahat edən təkcə bu deyil. Məlumdur ki, Rusiya Ermənistanda yerləşən 102-ci hərbi bazasından Suriyada həyata keçirdiyi hərbi əməliyyatlar üçün istifadə etməyi də planlaşdırır.
Elə bu günlərdə Rusiyanın xarici işlər naziri Sergey Lavrov belə bir açıqlama ilə çıxış etmişdi ki, İŞİD-ə qarşı mübarizədə Ermənistan, Tacikistan və Qırğısıztandakı hərbi bazalardan istifadə edilə bilər. Lavrovun bu açıqlaması Ermənistan cəmiyyətində ciddi narahatlıq yaradıb. Burada hesab edilir ki, yaranmış vəziyyətdə İŞİD Ermənistanı hədəfə alacaq.
Nəzərə almaq lazımdır ki, Qafqazda İŞİD-ə bağlı qüvvələr az deyil. Onların arasında xristianlar ad kifayət qədərdir. Belə vəziyyət Ermənistanın asanlıqla hədəfə gəlməsinə imkan verir. Bu səbəbdən Ermənistanda fikirlər səslənir ki, rəsmi İrəvan Rusiyanın istəyinə reaksiya verməli, onun niyyətinə qarşı çıxmalıdır. Amma ermənilər onu da etiraf edir ki, rusiyadan asılı olan Sarkisyan hakimiyyətinin bunu etməyə sadəcə cəsarəti çatmır. Erməni jurnalist Naira Ayrumyan yazır ki, Moskva bu gedişlə Ermənistanı tələyə salıb: "Bu, diplomatik tələdir. Ermənistan bundan rəsmən imtina edərsə, bu, ikitərəfli razılığı pozmaq deməkdir. Razılaşarsa, deməli Rusiya İrəvanı öz oyuncağına çevirib. Görünür, Ermənistan hakimiyyəti bu tələdən çıxış yolunu susmaqda görür. Lakin susmaq da razılıq əlamətidir". Ayrumyan qeyd edir ki, Ermənistan Suriyada Rusiyanın hərbi əməliyyatlarında iştirak etməklə bağlı ilkin razılığını verib: "Rusiya Ermənistanı hələ İŞİD-in suriyalı ermənilər yaşayan Kesab qəsəbəsinə hücumu zamanı bu münaqişəyə cəlb etmək istəyirdi. Həmin vaxt İrəvan qaçmağı bacardı. Daha sonra Rusiya Suriya ermənilərinə heç bir kömək etmədi və onlar Ermənistana gəldilər. İndi ABŞ-dakı ermənilər Ermənistanı Suriya qaçqınlarına yardım edən ölkələr siyahısına salmağa çalışır. Bu olarsa, onda ABŞ-dan əlavə maliyyə yardımı almaq imkanı yaranacaq. Lakin İrəvan Suriyada Rusiyanın hərbi əməliyyatlarında iştirak edəcəksə, ölkəni ciddi risq altında qoyacaq". Erməni politoloq Ruben Meqrabyan rəsmi İrəvanı Lavrovun cavabını verməməkdə ittiham edib: "Ermənistanın İŞİD-lə heç bir əlaqəsi yoxdur. Lakin rəsmi İrəvan Lavrovun dedikləri ilə bağlı susur. Heç kəs demir ki, "cənab Lavrov, ağzını bağla, bizim əlaqəmiz olmayan məsələni qaldırma". Ermənistan hakimiyyətinin susqunluğu dəhşətlidir". Erməni politoloq Qaqik Ambaryanın fikrincə də, Ermənistan ərazisindən İŞİD-ə qarşı mübarizədə istifadə edilməsi ölkəni ciddi təhlükələrlə üz-üzə qoya bilər: "Bu səbəbdən Lavrov bazanın İŞİD-ə qarşı mübarizəsi şəraitində Ermənistanın təhlükəsizliyi ilə bağlı 100 faizlik zəmanət verməlidir. Amma Lavrov bu cür zəmanət verə bilməz, çünki terrorizmlə mübarizə böyük risqlərlə bağlıdır. Suriyada müharibə aparan Rusiya hətta öz ərazisində təhlükəsizliyə zəmanət verə bilmir. Ermənistandan isə danışmağa belə dəyməz". Ambaryanın fikrincə, Ermənistan bu məsələlərdən uzaq durmalıdır, çünki Qarabağ münaqişəsi ilə bağlı çox çətin vəziyyətə düşə bilər: "Bundan əlavə, yaranacaq yeni durumda İŞİD Ermənistanı da öz xilafətinin tərkibi hesab edəcək və adekvat cavab olaraq bizim təhlükəsizliyimizə təhdid yaradacaq. Bu, Ermənistanı açıq-aşkar alovun içinə atmaqdır. Məsələn, İŞİD Ermənistanı müsəlman ermənilərin, yəni həmşinlərin əli ilə vura bilər. Dünyada 5 milyona yaxın həmşin evdə ermənicə danışmaqla yanaşı, radikal sünni müsəlmanlardır. İŞİD sıralarında onların nə qədər olduğu bəlli deyil, çünki müxtəlif ölkələrin təmsilçiləri kimi çıxış edirlər. Qarabağda, Ermənistanda bir neçə yüz İŞİD yaraqlısının olması kifayətdir. Bundan sonra Ermənistan uzun illər öhdəsindən gələ bilməyəcəyi bir problemlə üz-üzə qalacaq". Amma politoloq onu da etiraf edir ki, Ermənistanda Rusiya bazası varsa, Moskva bu siyasəti bəyan edirsə, onda Ermənistan istər-istəməz Rusiyanın bu strateji layihəsində iştirak edəcək: "Heç bu barədə Ermənistandan soruşan olmayacaq". Həqiqətən də forpost ölkə olan Ermənistanla bağlı qərar verərkən Rusiya İrəvandan nəyisə soruşmur. Sadəcə Ermənistana ona verilən göstərişləri icra etməyi tapşırır. Bu səbəbdən, Ermənistanın narazılığına baxmayaraq, Moskva lazım bildiyi anda 102-ci hərbi bazasından İŞİD-ə qarşı istifadə edəcək.
Tahir TAĞIYEV