"Bu ideya Rusiyaya məxsusdursa, mütləq reallaşacaq"
Ermənistan prezidenti Serj Sarkisyanın "İzvestiya" qəzetində dərc edilən müəllif yazısında bildirilir ki, Gümrüdəki 102-ci hərbi baza ətrafında Ermənistanla Rusiyanın yeni hərbi-sənaye kompleksinin yaradılması müzakirə edilir. Bildirilir ki, bu planın əsası Putinin Erfmənistana 2013-cü ildə etdiyi səfər zamanı qoyulub. İdeya belə əsaslandırılır ki, bunun nəticəsində həmin ətrafda çoxlu sayda iş yerləri açıla bilər və bu da yerli əhali üçün çox sərfəlidir.
Ancaq Sarkisyanın oponentləri bu məsələnin təsadüfən meydana çıxdığını zən etmir. Onlar deyir ki, bu, Rusiyanın istəyi olub, lakin Ermənistan bir müddət gözləmə mövqeyi tutub. Hazırda Sarkisyan bu kartla seçkilərdə qələbəsinin tam rəsmiləşməsinə görə alver edir və nəticədə Rusiyaya güzəştə gedir.
Bu versiyanı nə dərəcədə əsaslı saymaq olar?
Ekspert Aqşin Əliyevin sözlərinə görə, Rusiya, faktiki olaraq, Ermənistandan necə istəyir, elə də istifadə edir: "Ermənistanın onların hansısa istəyinə yox deyə bilməsi mümkün deyil. Ölkə bütün parametrlərlə Rusiyadan asılı vəziyyətdədir. Təbii ki, Rusiya həmin ərazidə daha da möhkəmlənməsini istəyir. Hesab edirəm ki, bu ideya Rusiyaya məxsusdursa, mütləq reallaşacaq. Sarkisyan isə öz məqaləsində bunun qarşılıqlı maraqdan irəli gəldiyini qeyd edir. Ermənistan prezidentinin bu razılığın müqabilində Rusiyadan nəyisə qoparmaq istədiyilə bağlı deyilənlər bir qədər şişirdilir. Çünki Rusiyaya Sarkisyanın hakimiyyətdə qalması tam sərf edir. İstədiyi güzəşti də Ermənistandan şərtlə almır. Bunu, sadəcə, Sarkisyanın indiki məqamda hörmətinin qaldırılması üçün ortaya atıblar. Onsuz da Rusiya bütün dünyaya silah satır. Bunun üçün yeni istehsal lazımdır. Ermənistanı nisbətən razı salmaq üçün deyilən layihəyə dəstək verə bilər".
Məhəmmədəli QƏRİBLİ