Fransa prezidenti Fransua Ollandın erməni həmkarı Serj Sarkisyanı Dağlıq Qarabağ münaqişəsinin müzakirə edilməsi üçün martın 8-də Parisə dəvət etməsi və Dağlıq Qarabağ münaqişəsinin həllində xalqların öz müqəddəratını təyinetmə prinsipinin əsas götürülməsi barədə səsləndirdiyi fikirlər ölkəmizdə haqlı narazılığa səbəb olub.
Ollandın bir siyasətçi olaraq Dağlıq Qarabağla bağlı fikirlərində ciddi təzadlara rast gəlinir. Bundan əvvəl isə o, həmsədr ölkənin rəhbəri kimi, problemin həllinə yardım göstərmək yönündə açıqlamaları ilə yadda qalır, status-kvo-nun dəyişməsinin vacibliyini daim vurğulayırdı. Xüsusilə 2015-ci ildə prezidentlərin Paris görüşündən sonrakı bəyanatı bu cəhətdən hələ yaddaşlardadır. Ollandın bu qeyri-tarazlığı nə ilə izah oluna bilər?
Politoloq Qabil Hüseynlinin sözlərinə görə, Fransua Olland hakimiyyətdən getmək ərəfəsində bu cür bəyanatlar səsləndirməklə erməni lobbisi ilə münasibətlərini yaxşılaşdırmağa çalışır: "İndiyədək ATƏT-in Minsk Qrupunun həmsədr ölkələrindən biri olan Fransa Dağlıq Qarabağ münaqişəsinin konstruktiv və ədalətli həlli istiqamətində bir dəfə də müsbət addım atmayıb, hər zaman Ermənistanın tərəfini tutub. İndi isə Fransua Olland sözügedən çıxışları ilə lap ağını çıxardıb. Əvvəla "Madrid prinsipləri" Azərbaycan tərəfindən qəbul edilmir. Azərbaycan tərəfinin "Madrid prinsipləri" sənədinə 14 düzəlişi mövcuddur və onu da "yenilənmiş Madrid prinsipləri" adlandırırlar. Azərbaycan dövləti "yenilənmiş Madrid prinsipləri" əsasında Dağlıq Qarabağ münaqişəsinin həllinə çalışılmasını təklif edir.
Digər tərəfdən isə, "Madrid prinsipləri" sənədində separatçı əhali nə "Dağlıq Qarabağ Respublikası", nə də "Artsax xalqı" adlanmır. Çünki Dağlıq Qarabağda ermənilərdən daha çox azərbaycanlılar yaşayıb. Bütün bunları nəzərdən keçirərək, Fransua Ollandın guya Dağlıq Qarabağda yaşayan erməni əhalisinin öz müqəddəratını həll etdiyi ilə bağlı fikirləri riyakarlığın və ikiüzlülüyün simvoludur.
Fransa o dövlətdir ki, dünyada ikinci dəfə qondarma "erməni soyqırımı"nı tanıyıb, bu "soyqırımı" etiraf etməyən şəxslərə qarşı cəza nəzərdə tutulan qanun layihəsini Senata təqdim edib və s. Yəni Fransa açıq şəkildə erməniləri özünün bacısı adlandırır. Çox təəssüf ki, Fransa prezidenti 10 milyona yaxın vətəndaşımızın hüququnu nəzərə almadan, Azərbaycanın 20 faizdən çox torpağını işğal edən, bir milyondan çox insanımızı qaçqın və məcburi köçkün vəziyyətinə salan ermənilərə "öz müqəddəratını həll etməyi" təklif edir. Halbuki, həmin ermənilər Fransa kimi, Azərbaycan ərazilərinə də ötən əsrlərdə köçüb gəliblər. Onsuz da ermənilər bir dəfə Azərbaycan torpaqlarında öz müqəddəratını təyin edib. Dünyada çox az sayı olan kiçik bir xalqa ikinci erməni dövlətinin yaradılmasına kim imkan verər? Vaxtilə Ermənistan da Azərbaycanın tarixi torpaqlarında yaradılıb. Ollandın da davranışları məhz bu məkrli siyasətin üzərində qurulub".
Məhəmmədəli QƏRİBLİ