"Aİ üçün təmas xəttində, Ermənistan və Azərbaycanın beynəlxalq səviyyədə tanınmış sərhədlərində təhlükəsizliklə bağlı vəziyyət ciddi narahatlıq predmetidir"
Azərbaycan Çinlə Avropa İttifaqını (Aİ) bir-birinə bağlayacaq yeni "İpək yolu"nun əsas hissəsi, eləcə də energetika məsələlərində Qərb üçün perspektivli tərəfdaşdır. Bu barədə "The Greanville Post" qəzetində nəşr olunan məqaləsində Stiven Karqanoviç yazır.
Məqalədə qeyd olunur ki, Qərbin Azərbaycana daimi marağının əsas göstəricisi Aİ ilə rəsmi Bakı arasında yeni başlayan və Aİ-nin Azərbaycanla "strateji tərəfdaşlığın müasirləşdirilməsi" adlandırdığı danışıqlardır.
Müəllif yazır ki, Azərbaycanın Aİ ilə daha sıx əlaqələri üçün əlavə stimulları Dağlıq Qarabağ münaqişəsinin tənzimlənməsi prosesində rəsmi Bakının mövqeyinin qurum tərəfindən uzunmüddətli dəstəklənməsi və Azərbaycanla Aİ arasında vizasız rejimin təmin olunması perspektivləridir.
Tərəflər arasında yaxınlaşmanın Dağlıq Qarabağ probleminin həllinə təkan verəcəyinə dair səslənən fikirləri nə dərəcədə əsaslı saymaq olar?
Politoloq Yeganə Hacıyeva qəzetimizə bildirdi ki, Avropa İttifaqı ilə Azərbaycan arasında əlaqələrin dinamik inkişaf etməsi faktdır: "Hiss olunur ki, tərəflər qarşılıqlı əməkdaşlığa böyük önəm verir. İlham Əliyevin bu yaxınlarda Brüsselə səfəri və Avropa İttifaqının rəsmiləri ilə apardığı müzakirələr ikitərəfli əlaqələrin inkişafında çox ciddi rol oynayacaq. Təbii ki, Aİ güclü maliyyə-iqtisadi və siyasi mərkəz kimi bizim üçün əhəmiyyətlidir. Çünki Aİ ilə əlaqələr, nəticə etibarilə, bizim üzləşdiyimiz problemlərin, xüsusilə Dağlıq Qarabağ münaqişəsinin həllinə müsbət təsir göstərə bilər. Aİ Şərqlə Qərb, Şimalla Cənub arasında münasibətlərin intensivləşməsində Azərbaycanın əhəmiyyətini dərk edir. Eyni zamanda, Aİ ilə Azərbaycan arasında inkişaf edəcək digər münasibətlər regionda stabilliyin olmasını və təhlükəsizliyin tam təminatını tələb edir. Aİ üçün təmas xəttində, Ermənistan və Azərbaycanın beynəlxalq səviyyədə tanınmış sərhədlərində təhlükəsizliklə bağlı vəziyyət ciddi narahatlıq predmetidir. Avropa İttifaqı tərəflərə ATƏT-in rəhbərliyi ilə aparılan danışıqlarda iştirak etmək və danışıqlarda öhdəlik nümayiş etdirməklə bağlı çağırışını təkrarlayır. Aİ münaqişənin həlli məqsədilə yaradılmış ATƏT-in Minsk Qrupunun vasitəçilik missiyasına dəstəyini daim ifadə edir. Aİ Ermənistan və Azərbaycan arasında dialoqun prezidentlər səviyyəsində davam etdirilməsinə çağırır.
Bununla yanaşı, sülh razılaşması əldə edildikdən sonra Aİ sülhyaradıcı fəaliyyətləri dəstəkləməyə, münaqişədən əziyyət çəkən regionların bərpa və reabilitasiyasına yardım etməyə hazır olduğunu bəyan edib. Yəqin ki, bundan sonra biz Aİ-nin münaqişənin həlli istiqamətində göstərdiyi səylərdə daha operativlik və prinsipiallıq hiss edəcəyik".
Məhəmmədəli QƏRİBLİ