"Təbii ki, ermənilərə sərf etməyəndə kimə istəsən diktator deyə bilərlər"
Lapşinin Azərbaycana ekstradisiya olunması Ermənistanda böyük rezonansa səbəb olub. Hətta bu hadisəni Sarkisyanın və Nalbandyanın üzünə vurulan "tərs şillə" kimi xarakterizə edən erməni siyasətçiləri də tapıldı.
Ölkəni isə Lapşinin Bakıya ayaq basması ilə aksiyalar bürüdü. Bu aksiyaların iştirakçılarının tələbləri əsasən Belarus səfirinin ölkədən qovulması, bu ölkə ilə diplomatik əlaqələrin kəsilməsi və Sarkisyanın istefasıdır. Bu günlərdə isə Fransa Strateji Tədqiqatlar Mərkəzinin erməni eksperti Kays Minasyan ölkə saytına verdiyi müsahibədə fərqli mövqe ortaya qoyub. Deyib ki, Ermənistan bu məsələdə radikal çıxışlar etməli deyil. Onun sözlərinə görə, guya Azərbaycan Lapşinin Belarusdan ekstradisiya edilməsinə nail olmaqla çox böyük səhvə (!) yol verib və Ermənistan məhz bu "səhvin" üzərindən yeriyərək məsələnin üstünə getməlidir. Erməni ekspert bu "səhvi" isə onunla əsaslandırmağa çalışır ki, guya Azərbaycan Belarusla bu məsələdə birgə hərəkət etməklə diktaturanın yanında olduğunu göstərib və bununla da Rusiya ilə münasibətlərinə "ziyan vurub". Əslində isə dördgünlük aprel müharibəsindən sonra bu münasibətlərin pozulması ermənilərin ən böyük arzusudur. Çünki məhz o günlərə qədər arxasını Rusiyaya söykəyib "ulduza hürən" Ermənistan tək qaldığını anladı. İndi istisna deyil ki, Lapşinin həm də Rusiya vətəndaşı olmasını əsas gətirərək, bu ölkənin bəzi qüvvələri qızışdırıcılıq fəaliyyətinə başlasın. Minasyanın sözügedən müsahibədəki fikirlərini də elə bu yöndə çağırış kimi xarakterizə etmək olar.
Sözügedən müsahibəsində erməni ekspert həm də ABŞ və Avropaya səslənir, onları guya Azərbaycanın Qarabağa səfərlərin qarşısını almaqla insan haqlarının pozulmasına yol verdiyinə inandırmağa çalışır. Lakin unudur ki, elə insan haqlarının pozulması üzündən Ermənistan getdikcə boşalmaqdadır və elə ermənilərin öz mətbuatının bu yaxınlarda yazdığı kimi, ermənilər adıçəkilən ölkələrə ya qanunsuz pullar mənimsəməyə, ya da oğurluq etməyə gedir...
Lapşin hadisəsinə reaksiya ilə Ermənistan hansı iç üzünü açmış oldu?
Ekspert Elşən Mustafayev qəzetimizə bildirdi ki, bununla Ermənistan özünü beynəlxalq arenada bir daha ifşa etdi: "Ermənistan Dağlıq Qarabağla bağlı illər uzunu təbliğatını belə qurub ki, güya qondarma qurumun ərazisində yaşayan əhali öz müqəddəratını həll edib. Ermənistan sözdə olsa da, həmin proseslərə qarışmadığını iddia edir. Hətta qondarma qurumun müstəqilliyini belə tanımayıb. Lapşin məsələsində Azərbaycan BMT tərəfindən müəyyən olunan sənədlərə, beynəlxalq hüquqa istinad edir. Məhz bu səbəbdəndir ki, Lapşinin vətəndaşı olduğu ölkələr məsələyə səthi yanaşdılar. Ermənistan isə özünü "həlak" etməklə işğalçı olduğunu büruzə verdi. Sübut olundu ki, həmin ölkə birbaşa işğalçıdır və başqa ölkənin sərhədlərini qanunsuz yolla keçən adamı dəstəkləyir. Bu əməllərilə Ermənistan həm də Belarusla onsuz da yaxşı olmayan münasibətlərini bir qədər də korladı. Artıq erməni əsilli ekspertlər belə Lapşin məsələsinə reaksiya verməklə Ermənistanın özünü ifşa etdiyini, çox çətin durumda olduğunu ifadə edirlər. Azərbaycan Lapşini ekstradisiya etməklə hansısa diktaturanın yanında olduğunu deyil, güclü olduğunu sübut etdi. Təbii ki, ermənilərə sərf etməyəndə kimə istəsən diktator deyə bilərlər. Onda niyə Belarusla eyni qurumlarda təmsil olunurlar? Deməli, bu iddialar heç bir normal məntiqə əsaslanmır".
Məhəmmədəli QƏRİBLİ