Aqşin Əliyev: "Azərbaycan üçün Avropa ilə bütün sahələr üzrə əməkdaşlıq etmək zəruridir"
Azərbaycan xarici işlər nazirinin müavini Mahmud Məmmədquliyev Brüsseldə Avropa İttifaqı ilə Azərbaycan arasında yeni tərəfdaşlıq sazişi üzrə aparılan ilkin danışıqlarda nəyin müzakirə olunduğuna aydınlıq gətirib.
O bildirib ki, sırf texniki məsələlər müzakirə olunub, substantiv heç nə danışılmayıb: "Hələ ki, bizim layihə üzrə onların mövqeyini gözləyirik. Onlar indiyə qədər bizə məlumat verməyiblər. Mən orada olanda da dedim ki, bu məlumat bizə verilməlidir ki, biz baxaq və ondan sonra substantiv danışıqlar aparaq. Mən ayrıca olaraq onların danışıqlar üzrə rəhbəri ilə də görüşdüm. İki saata yaxın görüş keçirdik. Kiçik texniki məsələləri, görüşlərin necə olması, hansı formada keçirilməsi, videokonfransların təşkili barədə müzakirələr apardıq. Lakin əsas məsələ bizim təqdim etdiyimiz layihəyə onların münasibətini öyrənməkdir. Nə qədər tez öz təkliflərini, düzəlişlərini versələr, o qədər yaxşı olar. Çünki bizə vaxt lazımdır. Azərbaycanda bütün qurumlar bu məsələdə iştirak edirlər. Biz ciddi müzakirə aparmalı və mövqelərimizi müəyyənləşdirməliyik".
Nazir müavini qeyd edib ki, Azərbaycan üçün ən həssas mövzular təhlükəsizlik, siyasi məsələlər və münaqişədir: "Qarşı tərəf də əsasən siyasi və təhlükəsizlik məsələsinə həssas yanaşır. Çünki bu məsələ həllini tapmasa, digər məsələlər çətin olacaq. Sülh, sabitlik olmasa, nədən danışa bilərik? Onlar ticarət, investisiya, sərmayə məsələlərinə də ciddi diqqət ayırırlar. Amma yenə deyirəm ki, ilk növbədə onların bizim layihə üzrə konkret təklif və düzəlişlərini görüb, ona uyğun hazırlaşmalıyıq. Bütün danışıqlar 3 blok üzrə aparılır. Birincisi, siyasi və təhlükəsizlik məsələləri, ikincisi, ticarət və sərmayələr, üçüncüsü, yerdə qalan digər iqtisadi, sosial, humanitar və sair məsələlər. Onlar təklif edir ki, müzakirələr bu 3 blokda paralel getsin. Təbii ki, biz bu təklifə baxacağıq. Lakin vurğulamışıq ki, birinci blok bizim üçün çox əhəmiyyətlidir. Təklif etmişik ki, biz bu blokdan başlayaq. Sonra ola bilsin, paralel o biri bloklara baxarıq".
Danışıqların hansı formul üzrə davamı Azərbaycan üçün daha optimaldır?
Ekspert Aqşin Əliyev qəzetimizə bildirdi ki, Mahmud Məmmədquliyev həmin danışıqlarda səlahiyyətli şəxs olaraq ətraflı məlumat verib: "Artıq bəzi razılaşmalar əldə olunub. Texiniki olsa da, bunun gələcək əməkdaşlığımız üçün böyük faydası olacaq. Avropa İttifaqı ilə Azərbaycan arasında Əməkdaşlıq Komitəsinin və Əməkdaşlıq Şurasının yığıncaqlarının bu ilin birinci yarısında keçirilməsi gözlənir. Təbii ki, Avropa hər üç blok üzrə danışıqların paralel aparılmasını təklif edir. Ancaq bu heç də o anlama gəlmir ki, Azərbaycan tərəfi bununla razılaşmalıdır. Azərbaycan üçün Avropa ilə bütün sahələr üzrə əməkdaşlıq etmək zəruridir. Ancaq bizim üçün ilkin mərhələdə siyasi və təhlükəsizlik məsələləri ətrafında danışıqların aparılması daha optimaldır. Çünki Avropanın özü də bu dəyərlərə böyük önəm verir. Ancaq, görünür, onlar təhlükəsizlik deyəndə Ermənistan faktorunu nəzərə alaraq danışıqları bütün bloklar üzrə paralel aparmaq istəyir. Azərbaycan hazırda bütün ərazisinə nəzarət etmək gücündə deyil. Yaxşı olar ki, təhlükəsizliyin tam təminatı deyəndə, birinci növbədə torpaqlarımızın işğal faktoru aradan qaldırılsın. Yəqin ki, danışıqları aparmağa səlahiyyətləri olan qurumlar bu məsələyə tam aydınlıq gətirəcək. Məmmədquliyevin açıqlamasından da belə başa düşülür ki, onun özü də müzakirələrin ayrılıqda aparılmasını istəyir".
Məhəmmədəli QƏRİBLİ