Qabil Hüseynli: "İrəvan Dağlıq Qarabağdakı separatçıları özünün əlaltısı yox, müstəqil oyunçu kimi bizə və beynəlxalq aləmə sırımaq istəyir"
Azərbaycan xarici işlər naziri Elmar Məmmədyarov Bosniya və Herseqovinadan olan həmkarı İqor Çrnadakla görüşdən sonra keçirilən mətbuat konfransında deyib ki, biz imitasiya üçün danışıqlar aparmırıq. Nazir Ermənistan tərəfinin hələ də Hamburq görüşü ilə bağlı cavab vermədiyini bildirib.
"Onlar görüşdən də qaçırlar. Demək sülh prosesinə dəstək vermirlər", - deyə nazir qeyd edib.
Ermənistanın təklif olunan yeni formatla da bağlı qeyri-konstruktiv davranması nə ilə bağlıdır?
Politoloq Qabil Hüseynlinin sözlərinə görə, Ermənistan bütün görüşlərlə bağlı narazılıq ifadə edir: "Əvvəl onlar Kazan sülh müqaviləsinin bağlanması ilə bağlı edilən təzyiqdən narazılıq edirdi. Çünki orada yeddi rayonun geriyə qaytarılması nəzərdə tutulurdu. Dağlıq Qarabağın statusunun həll edilməsi isə sonrakı mərhələyə saxlanırdı. Bu nöqteyi-nəzərdən Ermənistan guya, rusların dediyinə görə, acıq edib və danışıqlardan çəkindiyini bildirirdi. Sonra ona müəyyən təzyiqlər edildi. Hamburq variantı təklif olunub. Ancaq Elmar Məmmədyarovun açıqlamasından sonra belə başa düşüldü ki, Ermənistan bu görüşdən də boyun qaçırır. Birinci məqsəd odur ki, guya İrəvan Dağlıq Qarabağın əvəzinə qərar verə bilməz, hətta onlar hipotetik olaraq danışıqlar prosesində Bakı ilə nəyəsə razılaşsalar, Xankəndinin "yox" cavabı həlledici olacaq. Bununla İrəvan Dağlıq Qarabağdakı separatçıları özünün əlaltısı yox, müstəqil oyunçu kimi bizə və beynəlxalq aləmə sırımaq istəyir. İrəvanın ikinci məqsədi elə həmin beynəlxalq vasitəçilərlə həmrəylik nümayiş etdirməkdir. Çünki, təəssüf ki, həmsədrlər, özəlliklə də rusiyalı həmsədr tez-tez "danışıqlar prosesinə Xankəndinin də qoşulmasına ehtiyac var" deyir. Ermənistan hakimiyyəti anlayır ki, növbəti hərbi toqquşma qaçılmazdır. Bu səbəbdən də çıxılmaz durumdadır".
Məhəmmədəli QƏRİBLİ