Məlumat verildiyi kimi, Rusiya prezidenti Vladimir Putin ölkəsinin xarici siyasət konsepsiyasının təsdiq edilməsi haqqında fərman imzalayıb. Konsepsiyaya, bir sıra məsələlərlə yanaşı, Rusiyanın postsovet məkanında münaqişələrin siyasi-diplomatik yolla həllinə tərəfdar olması barədə bənd daxil edilib.
Sənəddə bildirilir ki, rəsmi Moskva Dağlıq Qarabağ probleminin mövcud çoxtərəfli danışıqlar mexanizmi çərçivəsində, ATƏT-in Minsk Qrupunun həmsədri olan digər ölkələrlə qarşılıqlı fəaliyyət, eləcə də Rusiya, ABŞ və Fransa prezidentlərinin 2009-2013-cü illərdəki birgə bəyanatlarında nəzərdə tutulmuş prinsiplər əsasında həllinə səy göstərir.
Xatırladaq ki, Rusiya, ABŞ və Fransa prezidentlərinin Qarabağ münaqişəsinə dair müxtəlif vaxtlarda bəyanatları olub. Sonuncu belə bəyanat 2013-cü ilin iyununda verilib. həmin bəyanatda da bildirilirdi ki, Dağlıq Qarabağ münaqişəsinin nizamlanması ilə məşğul olan ATƏT-in Minsk Qrupunun həmsədr ölkələri Rusiya, Fransa və ABŞ münaqişə tərəflərinin danışıqlar prosesi zamanı problemin həlli yolunu tapa bilmədiyinə görə dərin təəssüf hissi keçirir: "Əminik ki, hərtərəfli sülh nizamlanmasına aparan balanslaşdırılmış çərçivə razılaşmasının əldə olunmasında sonrakı ləngimə qəbuledilməzdir və Ermənistan və Azərbaycan liderlərini yenilənən enerji ilə əsas diqqəti hələ də açıq qalan məsələlərin həllinə yönəltməyə çağırırıq".
Prezidentlər bildirirdilər ki, verilən bəyanatlar Dağlıq Qarabağ münaqişəsinin ədalətli və davamlı nizamlanması üçün əsas olmalıdır. Birgə bəyanatda daha sonra bildirilirdi: "Biz bütün tərəflərin rəhbərlərini, xüsusilə də güc tətbiq etməmə və ya güc tətbiqi təhlükəsi, ərazi bütövlüyü, hüquq bərabərliyi və xalqların öz müqəddəratını təyin etmə hüququ prinsipləri də daxil olmaqla, Helsinki prinsiplərinə bir daha sadiq olduqlarını təsdiqləməyə çağırırıq". İndi Rusiyanın yeni xarici siyasət konsepsiyasında barəsində bəhs edilən bəyanatlar yenidən əsas diqqət mərkəzinə gəlir. Xatırladaq ki, həmin bəyanatlarda ərazi bütövlüyü məsələsi ön planda yer alır. Bu mənada Rusiya, ABŞ və Fransa prezidentlərinin mövqeyi, əslində, Bakının maraqlarına cavab verir. Lakin ekspertlər hesab edir ki, birgə bəyanatlar praktik iş görüləcəyi halda təsiredici olacaq. Müşahidəçilərin fikrincə, istənilən halda, ATƏT-in Minsk qrupu ölkələri həmsədrlərinin bəyanatı, Ermənistanın mövqeyindən daha çox, Azərbaycanın Dağlıq Qarabağ münaqişəsindəki mövqeyini əks etdirir. İndi bu məsələnin Rusiyanın yeni xarici siyasət konsepsiyasında əsas yerlərdən birini tutması Qarabağ münaqişəsinin həllində müəyyən yeniliklərə səbəb ola bilər. Məhz belə bir vaxtda Rusiya xarici işlər nazirinin müavini Qriqori Karasin bildirir ki, Moskva tərəfindən Ermənistan-Azərbaycan münaqişəsinin tezliklə sülh yolu ilə həll edilməsi istiqamətində səylər davam etdiriləcək və münaqişənin həllində təsirli tədbirlərin görülməsi üçün dəstək göstəriləcək. O, ümumiyyətlə, Rusiya ilə Azərbaycan arasında münasibətləri də yüksək qiymətləndirir. Karasin bildirib ki, iki ölkə arasında münasibətlər bütün sahələrdə inkişaf edir və rəsmilər arasında mütəmadi təmaslar gündəlikdə olan məsələlərin həllinə töhfə verir. O, gələn il Moskvada Rusiya-Azərbaycan diplomatik münasibətlərinin qurulmasının 25 illiyinin qeyd ediləcəyini və bu xüsusda nazir Elmar Məmmədyarovun rusiyalı həmkarı tərəfindən bu ölkəyə səfərə dəvət edildiyini bildirib. Bütün bunlar fonunda Rusiya yaxşı bilir ki, Azərbaycan üçün əsas məsələ Qarabağ münaqişəsinin tənzimlənməsidir və Moskva bu istiqamətdə əməli addımlar atsa, konfliktin həll prosesi sürətlənəcək.
Xatırladaq ki, bundan əvvəl erməni politoloq Riçard Kirakosyan da qeyd olunan xüsusda maraqlı açıqlamalar vermişdi. O qeyd edirdi ki, Rusiya Azərbaycanla münasibətlərini yaxşılaşdırmaqda davam edir: "Bu, Qarabağ üçün təhlükəlidir. Xüsusilə ABŞ-la münasibətlərin yoluna qoyulması Rusiyanın əl-qolunu açacaq. Amerika və Rusiya qarşılıqlı güzəştə gedə və müəyyən ərazilərdə bir-birinin hakimliyini tanıya bilər. Belə olarsa, Rusiyanın Cənubi Qafqazda təkbaşına hərəkət etməsinə Amerika razı olacaq. Bu isə Moskvanın Qarabağ məsələsində birtərəfli təşəbbüslərlə çıxış etməsinə imkan yaradacaq. Xüsusilə münaqişə zonasına öz sülhməramlılarını yerləşdirmək istəyəcək. Son nəticə Azərbaycanın xeyrinə olacaq. Baş verənlər Ermənistanın regionda təklənməsinə səbəb ola bilər. Bu isə, ərazilər qaytarılmayacağı halda, müharibənin tezliklə başlanması deməkdir. Biz Qarabağda yeni müharibəni gözləməli və buna hazırlaşmalıyıq".
Nahid SALAYEV