Avropa Birliyi (AB) son 10 ildir azaltdığı müdafiə xərclərini yenidən artırır. Baki-xeber.com xəbər verir ki, AB öz ordusunun yaradılması ilə bağlı 100 milyard avroya çatacaq büdcəni təsdiqləməyə hazırlaşır.
Avropa Komissiyasının son toplantısında müdafiə əməkdaşlığının gücləndirilməsi üçün 5 milyard avroluq (5.3 milyard dollar) bir müdafiə fondunun qurulması və AB-nin ortaq büdcəsindən və Avropa İnvestisiya Bankından hərbi araşdırmalara maliyyə yardımı ayrılmasını qadağan edən qaydaların ləğvi təklif edilib.
Qeyd edək ki, ABŞ-da prezident seçilən Donald Trampın seçki kampaniyası dövründə Avropa ölkələrinin müdafiə sahəsinə daha çox sərmayə qoyması və NATO-nun artıq Avropa ölkələrinin "avtomatik müdafiəçisi" olmasına qarşı açıqlamaları da AB ölkələrini müdafiə mövzusunda yeni addımlar atmağa məcbur edən faktorlardan biridir.
Almaniyanın "Süddeutsche Zeitung" qəzetinə görə, Avrokomissiyanın rəsmiləri Avropa müdafiə strategiyasının bir parçası olan bu fond üçün 25-100 milyard avro arasında maliyyə dəstəyinə ehtiyac olduğunu bildirib.
AB Komissiyasından bu istiqamətdə irəli sürülən təkliflər arasında olan "Ortaq Avropa Təhlükəsizlik və Müdafiə Birliyi"nin qurulması planının dekabr ayında baş tutacaq AB zirvəsində qəbul edilməsi gözlənir.
Avropa Komissiyası sədrinin müavini, Finlandiyanın keçmiş baş naziri Yurki Kataynen bildirir ki, bu bir AB ordusunun qurulması, ya da ictimai təhlükəsizlik əvəzinə hərbi təhlükəsizliyə pul xərcləmək demək deyil: "Getdikcə artan təhdidlərlə qarşı-qarşıyayıq və hərəkətə keçmək lazımdır".
Qeyd edilir ki, müdafiə fondunun yaradılması ilə helikopter, ya da pilotsuz uçuş aparatları kimi müdafiə proqramlarına hər zaman pul ayırmaq mümkün olacaq. Fonda Avropa İnvestisiya Bankı da dəstək verəcək. Ancaq bundan əvvəl bankın hərbi layihələri dəstəkləməsinin qarşısını alan qadağa ləğv edilməlidir ki, bunu da üzv ölkələrin əksəriyyəti dəstəkləmək məcburiyyətindədir.
Sözügedən fondla AB müdafiə sənayesi sahəsində daha aktiv hərəkət etməyi planlaşdırır. Fond üzərindən yatırılacaq investisiyaların çərçivəsi və məzmunu isə AB ölkələri tərəfindən müəyyənləşdiriləcək.
TAHİR