Əli Orucov: "Ermənilərin məhz hazırda məsələyə belə həssas yanaşması baş verən reallıqlarla bağlıdır"
Dağlıq Qarabağda hətta razılaşdırılmış bəzi rayonlar var ki, ermənilər həmin bölgəni tərk etməlidir. Bunu Türkiyə prezidenti Rəcəb Tayyib Ərdoğan İstanbul Konqres Mərkəzində baş tutan İslam Əməkdaşlıq Təşkilatı İqtisadiyyat və Ticarət Əməkdaşlığı Daimi Komitəsinin (İSEDAK) 32-ci toplantısından sonra azərbaycanlı jurnalistin sualını cavablandırarkən deyib.
Onun sözlərinə görə, BMT-nin qəbul etdiyi qətnamələr yerinə yetirilməlidir: "Ermənistan işğal etdiyi torpaqları tərk etməlidir. Bu mövzuda BMT Təhlükəsizlik Şurasının qərarları var. Bütün bu qərarlarla bərabər, Dağlıq Qarabağda hətta razılaşdırılımış bəzi rayonlar var ki, ermənilər həmin bölgəni tərk etməlidir. Bu torpaqların əsl sahibi azərbaycanlılardır. Azərbaycanlıların bu ərazilərdə məskunlaşması lazımdır. İşğalla heç nəyə nail olmaq olmaz. Biz Türkiyə olaraq işğala qarşıyıq.
Bu mövzuda vasitəçilər var. Onlar öhdələrinə düşəni etməlidir. Arzum budur ki, işğal tez bir zamanda bitsin və azərbaycanlı qardaşlarımız torpaqlarına qovuşsun".
Qeyd edək ki, Ərdoğanın bu cür sərt çıxışı Ermənistan daxilində böyük rezonansa səbəb olub, sanki yaralarının qaysağını qoparıb. Ermənistan KİV-i və siyasətçiləri Ərdoğanı məlum çıxışına görə tənqid etmək üçün növbəyə düzülüb.
Erməniləri bu çıxış niyə belə narahat edib?
Azərbaycan Milli İstiqlal Partiyası Siyasi Şurasının üzvü Əli Orucov qəzetimizə açıqlamasında bildirdi ki, ermənilərin narahatlığı başadüşüləndir: "Bilirsiniz ki, onlar millət olaraq bizi türklərdən ayırmır. Hətta müraciət formasında bizə də türk deyirlər. Düşmənçilik paralel aparılır. Erməni diasporu və dövləti həm qondarma "soyqırım"ı gündəmdə saxlayır, həm də Dağlıq Qarabağı. Türkiyənin dövlət rəhbəri səviyyəsində belə açıq danışması təbii ki, onları narahat etməlidir. Çünki Türkiyə olduqca böyük ölkədir, güclü təbliğat vasitələrinə malikdir. Ərdoğanın həmin münasibəti ildırım sürətilə bütün dünyaya yayıldı. Türkiyə prezidenti əslində bu fikirləri hər zaman ifadə edib. Ermənilərin məhz hazırda məsələyə belə həssas yanaşması baş verən reallıqlarla bağlıdır. Danışıqlar prosesindən yayınmağa çalışan Ermənistanın üzərinə ciddi basqı var. Qarşıda xarici işlər nazirlərinin görüşü planlaşdırılır. Rusiya ilə birgə ordu yaratmağa razılıq vermələri Qərb tərəfindən birmənalı qarşılanmayıb. Məhz belə həssas məqamda Ərdoğanın onluğa vura bilməsi onları bərk narahat edib. Onların verdiyi reaksiya adekvat sayıla bilməz. Çünki Ərdoğan həqiqəti ortaya qoyub. Həqiqəti inkar etmək isə yalnız ermənilərin özü üçün cəzbedici görünə bilər. Dünyaya bunu həzm etdirmək çətindir".
Məhəmmədəli QƏRİBLİ