Mehman Muradlı: "Bundan Pakistan heç nə itirən deyil"
Pakistana Kollektiv Təhlükəsizlik Müqaviləsi Təşkilatı (KTMT) Parlament Assambleyasında (PA) müşahidəçi statusunun verilməsi məsələsi Ermənistan nümayəndə heyətinin səyi nəticəsində Şuranın gündəliyindən çıxarılıb.
"Sputnik Ermənistan"ın verdiyi məlumata görə, bu barədə KTMT PA-da Ermənistan nümayəndə heyətinin rəhbəri Eduard Şarmazanov bildirib. Onun sözlərinə görə, Ermənistan tərəfi Rusiya Dövlət Dumasının sədri Vyaçeslav Volodinə bununla bağlı məktubla müraciət edib. Məktubda Ermənistan tərəfinin mövqeyi əks olunub.
Şarmazanov bildirib ki, Pakistan Ermənistanın müstəqilliyini tanımır, bundan əlavə, Qarabağ münaqişəsinin nizamlanması prosesində birmənalı olaraq Azərbaycanı dəstəkləyir.
Onun sözlərinə görə, Pakistan aprel hadisələri zamanı Azərbaycanı dəstəkləyib.
Bu məktubun müzakirəsi zamanı Pakistana Kollektiv Təhlükəsizlik Müqaviləsi Təşkilatı (KTMT) Parlament Assambleyasında (PA) müşahidəçi statusunun verilməməsi barədə qərar qəbul edilib.
KTMT-nin bu məsələdə Ermənistanı haqlı çıxarmasını və haqq işi dəstəklədiyinə görə Pakistanı hətta müşahidəçi qismində üzvlüyə qəbul etməməsini necə qiymətləndirmək olar?
Beynəlxalq hüquq üzrə mütəxəssis Mehman Muradlı qəzetimizə açıqlamasında bildirdi ki, KTMT-nin bu qərarı qeyri-obyektivdir və heç bir beynəlxalq hüquq normalarına sığmır:
"KTMT Rusiyanın nəzarəti altında olan bir qurumdur. Rusiyanın Ermənistana münasibəti hamıya bəllidir. Faktiki olaraq onları eyni dövlət saymaq olar. Bu yaxınlarda birgə ordu yaratmaqla bu dostluğu daha da möhkəmlətdilər. Pakistan Ermənistanın müstəqilliyini tanımır və onunla heç bir münasibət qurmur. Bu, əslində, tamamilə doğru mövqedir. Çünki atom silahına malik olan böyük bir müsəlman ölkəsi etdiyi hərəkəti məntiqi cəhətdən əsaslandırır. Pakistan Azərbaycana dəstək verdiyini heç vaxt gizlətmir. Aprel müharibəsi zamanı onun Azərbaycanı dəstəkləməsi niyə KTMT-yə qeyri-adi görünüb? Həmin ölkə o zaman da standart mövqeyinə sadiq qalıb. Yaxşı olardı ki, KTMT Ermənistanı başqa ölkənin torpağını işğal etdiyinə görə həmin quruma qəbul etməyə idi. Edilən hərəkətin adı haqsızlıqdır və beynəlxalq hüququn tapdanmasıdır. Bundan Pakistan heç nə itirən deyil. KTMT kimi qurum böyük bir ölkəni itirmiş oldu, özü də Ermənistan kimi bir əlaltıya görə".
Məhəmmədəli QƏRİBLİ