Qabil Hüseynli: "Nə zaman Türkiyəyə təzyiq etmək lazım olursa, bu proses işə salınır"
Misir parlamentinin 300-dən çox deputatı qondarma "erməni soyqırımı" qətnaməsinin layihəsini dəstəkləyib. Bu barədə erməni KİV-nin istinad etdiyi "Middle East Confidential" Yaxın Şərq nəşri məlumat yayıb.
Nəşrin məlumatına görə, "1915-ci ildə Osmanlı imperiyasında erməni soyqırımı"nın tanınması və qınanmsına dair sənədin layihəsi bu ilin sonuna qədər qəbul edilə bilər.
"Erməni soyqırımının tanınması Türkiyə prezidenti Rəcəb Tayyib Ərdoğanın bu yaxınlarda Misir hakimiyyətinin Gülən hərəkatını dəstəklədiyinə dair verdiyi bəyanatlar fonunda daha aktual səslənib. Ərdoğanın bəyanatı noyabrın 11-də "Al-Jazeera" telekanalının efirində göstərilib", - nəşr yazır.
Qeyd edilir ki, Misir və Türkiyə hakimiyyəti arasında münasibətlər ən aşağı səviyyədədir. Misir Türkiyəni ikili standartlarda ittiham edir, Türkiyə isə rəsmi Qahirənin ölkədə dövlət çevrilişinə cəhd edən Fətullah Gülənin (FETÖ) hərəkatının üzvlərini dəstəklədiyini bildirir.
Misirin bu hərəkətini necə qiymətləndirmək olar?
Politoloq Qabil Hüseynli qəzetimizə açıqlamasında bildirdi ki, Misirin bu hərəkəti doğrudan da utancvericidir: "Çünki bir müsəlman ölkəsinin belə haqsız işə qol qoymağa meylli olması çox düşündürücüdür. Bunun dərin kökləri var. Misirin hazırkı siyasi elitasının anti-Türkiyə əhvalına köklənməsinin iki əsas səbəbi var. Bunlardan biri Misirdə hakimiyyətə gələn "Müsəlman qardaşları" hərəkatı ilə bağlı Ərdoğanın sərgilədiyi mövqedir. Türkiyə həmin məsələdə sona qədər Mursini dəstəklədi. Hətta onun çevrilişlə devrilməsinə sərt etiraz etdi. Bu da, faktiki olaraq, indiki Misir hakimiyyətinə meydan oxumaq deməkdir. Bu yaxınlarda Türkiyədə baş verən dövlət çevrilişinə hərbi cəhddən sonra bütün dünya üzrə FETÖ-çuların zərərsizləşdirilməsinə başlandı. Gülənin Misirdə güclü dayaqlarının olduğunu bilən Türkiyə Şimali Afrika ölkəsindən konkret addımlar tələb etsə də, buna heç bir məhəl qoyulmadı. Fikir versəniz görərsiniz ki, qondarma "soyqırım"ın tanınmasından dünya ölkələri Türkiyəyə qarşı bir qalxan kimi istifadə edir. Nə zaman Türkiyəyə təzyiq etmək lazım olursa, bu proses işə salınır".
Məhəmmədəli QƏRİBLİ