Qabil Hüseynli: "Ermənistan münaqişənin sülh yolu ilə həllinə dair onsuz da zəif olan şansları heçə endirir"
Məlum olduğu kimi, Ermənistan prezidenti Serj Sarkisyan "Rossiya seqodnya" BİA-nın baş direktoru Dmitri Kiselyova "Sputnik Armeniya" və RİA "Novosti" üçün müsahibə verib.
Sarkisyan müsahibəsində Dağlıq Qarabağ münaqişəsinin nizamlanması üçün kompromislərin mümkünlüyündən, "İsgəndər" raketlərinin Ermənistanda yerləşdirilməsindən və digər mövzulardan danışıb.
Sarkisyan bildirib ki, Qarabağ problemi ancaq kompromislər və Minsk Qrupunun işləyib hazırladığı üç prinsip əsasında həll edilməlidir: "Əlbəttə, həll yolu var və biz başa düşürük ki, bu, kompromislərə əsaslanmalıdır. Bu, elə hal deyil ki, Ermənistan, Azərbaycan, yaxud Dağlıq Qarabağ qalib gəlsin".
Ermənistan prezidenti İrəvanın ancaq Minsk Qrupu həmsədrlərinin bəyan etdiyi üç prinsip - ərazi bütövlüyü, xalqların öz müqəddəratını təyin etməsi və güc tətbiqindən imtina əsasında danışıqlara qayıtmağa hazır olduğunu deyib: "Ermənistan Azərbaycanın ərazi bütövlüyünü tanıyır, ancaq hesab edir ki, Dağlıq Qarabağ probleminin həllində xalqların öz müqəddəratını təyin etməsi hüququ da nəzərə alınmalıdır".
Sarkisyan deyib ki, danışıqlarda dəfələrlə münaqişənin nizamlanmasının baza prinsipləri üzrə razılaşmaya yaxınlaşmaq mümkün olub. Bu plana görə, erməni tərəfi hazırda nəzarətində saxladığı əraziləri boşaltmalıdır: "Ancaq elə birinci bənddə yazılıb ki, Dağlıq Qarabağın yekun hüquqi statusu referendumla həll edilməlidir. Bu plan ona görə baş tutmadı ki, hər dəfə Azərbaycan tərəfi yeni şərtlər irəli sürdü".
Xatırladaq ki, "Rossiya seqodnya" BİA-nın baş direktoru D.Kiselyov Azərbaycan Prezidenti İlham Əliyevdən də müsahibə götürüb. Həmin müsahibə oktyabrın 9-da "Sputnik Azərbaycan" və RİA "Novosti"də yayımlanıb.
Sarkisyanın sülh danışıqları ilə bağlı yekun nəticənin baş tutmamasında Azərbaycanı günahlandırması erməni məkrinin daha bir təzahürüdür.
Politoloq Qabil Hüseynli qəzetimizə açıqlamasında bildirdi ki, Ermənistan prezidenti, hər dəfə olduğu kimi, həmin müsahibədə də qeyri-səmimidir: "Danışıqlar prosesində qeyri-konstruktivliyi daim Ermənistan nümayiş etdirib. Danışıqlar prosesilə bağlı Azərbaycan mövqeyini qəti bəyan edib. Sarkisyan yenə də Qarabağın statusuna eyham vurur. Ancaq bilməlidir ki, bununla bağlı İlham Əliyev elə onun müsahibə verdiyi kanala həmin subyektə ən yüksək status verməyə hazır olduğumuzu bildirdi. Sarkisyanın həmin kompromisi sükutla qarşılaması bir daha sübut edir ki, Ermənistan işğalçı siyasətindən əl çəkən deyil.
Bu arada onu da xatırladaq ki, aprel toqquşmaları zamanı Ermənistan öldürülmüş 56 hərbçidən yalnız 18-nin işğal edilmiş Dağlıq Qarabağın erməni icmasının üzvü olduğunu rəsmən etiraf edib. Yerdə qalan hərbçilər Ermənistanın müxtəlif bölgələrini təmsil edirdilər.
Ermənistanın təmas xəttinə yaxın ərazidə keçirdiyi hərbi təlimlər təxribat kimi qiymətləndirilib, bununla bir daha sübut olunur ki, Ermənistan işğalçı siyasətindən əl çəkmək istəmir. Bu addımlar sülh danışıqlarını açıq-aydın sabotaj edir və münaqişənin sülh yolu ilə həllinə dair onsuz da zəif olan şansları heçə endirir.
Son aylar Dağlıq Qarabağda atəşkəs rejiminin pozulması təəccüblü deyil. Atəşkəs rejiminin pozulması daha çox Ermənistanın işğal altındakı ərazilərdə keçirdiyi hərbi təlimlərin qızğın vaxtına - oktyabrın sonlarına təsadüf edib. Beləliklə, Ermənistanın hərbi güc nümayişi nəinki sülh danışıqlarını əngəlləyir, üstəlik, regionda silahlanma səylərinin artması təhlükəsi yaradır. Amma Ermənistanın bu addımları onun təhlükəsizliyinə yardım göstərmir. Əksinə, Dağlıq Qarabağda döyüşlərin başvermə risqinin artması ilə Ermənistan dövləti milli təhlükəsizliyini təhdid altına qoyur".
Məhəmmədəli QƏRİBLİ