Vəfa Heydərli: "Çox güman ki, ABŞ rəsmisi regionla bağlı yeni administrasiyanın siyasətinin necə olacağını açıqlayıb və bu istiqamətdə fikir mübadiləsi aparılıb"
Azərbaycan Prezidenti İlham Əliyev noyabrın 22-də ölkəmizdə səfərdə olan ABŞ dövlət katibinin Avropa və Avrasiya məsələləri üzrə köməkçisinin müavini xanım Bridget Brinki qəbul edib. Görüşdə iki ölkə arasındakı münasibətlərə dair məsələlər müzakirə olunub.
ABŞ rəsmisi noyabrın 22-də ABŞ Səfirliyinin binasında Azərbaycan müxalifətinin liderləri ilə də görüşüb. Görüşdə Xalq Cəbhəsi Partiyasının lideri Əli Kərimli, Milli Şuranın sədri Cəmil Həsənli, Müsavat Partiyasının lideri Arif Hacılı və ReAl hərəkatının icraçı direktoru Natiq Cəfərli iştirak edib.
ABŞ-da baş tutan prezident seçkilərindən dərhal sonra Azərbaycana belə bir səfərin reallaşması nə ilə izah oluna bilər?
Politoloq Vəfa Heydərli qəzetimizə açıqlamasında bildirdi ki, bu səfərə yeni seçkilər kontekstindən də yanaşmaq olar:
"Bilirsiniz ki, ABŞ-da Dövlət Departamenti həmin ölkənin xarici siyasət kursunu müəyyən edən qurumdur. Xanım Brink Avropa və Avrasiya məsələləri üzrə sahəyə məsul olan şəxsdir. ABŞ-da yeni prezident seçilib. Təbii ki, yeni administrasiyanın xarici kursunda müəyyən yeniliklər olacaq. Bu səbəbdən də, uyğun sahənin mütəxəssisi kimi, Departament rəsmisinin ölkəmizə səfəri reallaşıb. Onun ölkə başçısı tərəfindən qəbul olunması ciddi müzakirələrin aparılmasından xəbər verir. Çox güman ki, ABŞ rəsmisi regionla bağlı yeni administrasiyanın siyasətinin necə olacağını açıqlayıb və bu istiqamətdə fikir mübadiləsi aparılıb. Qonağın müxalifət partiyaları ilə görüşməsi də normaldır və burada qeyri-adi nəsə yoxdur. Çünki ABŞ özünü dünyaya demokratiya yayan ölkə kimi qələmə verir. Bu da müxalif təsisatlara da diqqətin ayrılmasını zəruri edir".
Məhəmmədəli QƏRİBLİ