İsmayıl Ağayev: "Tramp bunun fərqindədir. Erməni lobbisi bu cür təzyiq vasitələrini işə salmaqla seçki məğlubiyyətini kompensasiya etmək istəyir"
Kaliforniya ştatının ABŞ-dan ayrılması ilə bağlı referendum keçirilə bilər. Bu barədə şəhər sakinləri ştat prokurorluğuna müraciət edib. Referendumun təşəbbüskarı "Yes California" hərəkatıdır. Fəallar onların təşəbbüsünün "Calexit: Kaliforniyanın müstəqilliyi ilə bağlı 2019-cu ilin plebissiti" adı altında qeydiyyata alınmasını istəyib.
Ərizənin qeydiyyatından sonra onlar referenduma dəstək imzaları toplayacaq. Təşəbbüskarların sözlərinə görə, onlar artıq 13 min imza toplayıb.
Hərəkatın həmtəsisçisi və vitse-prezidenti Markus Ruis Evans bildirib ki, referendumun keçirilməsi haqda məsələnin gələn il qaldırılması planlaşdırılırdı, lakin Donald Trampın seçkilərdə qalib gəlməsi onları bu prosesi sürətləndirməyə məcbur edib: "Bütün bunlar realdır. Biz buna ciddi yanaşırıq".
Kaliforniyanın müstəqilliyinin tərəfdarları səsvermənin 2019-cu il martın 13-də keçiriləcəyinə ümid edir. Kaliforniyada çoxlu sayda erməninin yaşadığını nəzərə alsaq, bu təşəbbüsdə onların əlinin olması nə dərəcədə realdır?
Beynəlxalq Diaspor Mərkəzinin sədri İsmayıl Ağayev qəzetimizə bildirdi ki, bu məsələdə erməni barmağının olması inandırıcıdır: "Sual oluna bilər: niyə məhz Kaliforniya, niyə məhz bu məqamda? Bilirsiniz ki, yeni seçilən prezident lobbist qurumların əl-qolunun bağlanmasını qarşısına məqsəd qoyub. ABŞ-da fəaliyyət göstərən ən güclü lobbi təşkilatlarından biri ermənilərə məxsusdur. Onların ən sıx və kompakt məskunlaşdığı yer məhz Kaliforniyadır. Həmin ştatda olan erməni lobbisi o qədər güclüdür ki, hətta ABŞ-dakı prezident seçkilərində onların rəyi ilə hesablaşılır. Kaliforniya erməniləri dəstək verdiyi prezidentlər qarşısında şərtlər qoyur. Bu seçkidən onlar böyük məğlubiyyətlə çıxdılar. Bütün varlıqları ilə Klintona dəstək verən erməni lobbisi son nəticənin şokundan hələ də ayıla bilməyib. Tramp bunun fərqindədir. Erməni lobbisi bu cür təzyiq vasitələrini işə salmaqla seçki məğlubiyyətini kompensasiya etmək istəyir. Bu bir separatçı tələbdir. Ermənilər belə işin ustası olduqlarını tarix boyu sübut edib. Amma düşünmürəm ki, ABŞ-da onların istəyi keçərli olsun. Reallaşacağına inanmıram".
Məhəmmədəli QƏRİBLİ