Arzuxan Əlizadə: "Sarkisyanın məlum açıqlamasından sonra Hamburq danışıqlarından imtina edilməlidir"
Məlum olduğu kimi, Ermənistan prezidenti Serj Sarkisyan Rusiyanın "Sputnik" agentliyinə müsahibəsində Dağlıq Qarabağı ya müstəqil dövlət kimi, ya da Ermənistana birləşmiş şəkildə görmək istədiyini bildirib.
Ermənistan prezidenti onu da əlavə edib ki, o, Azərbaycanla "istənilən səviyyədə" görüşə və təmas xəttində insidentlərin araşdırılmasına dair mexanizmi "istənilən vaxt" imzalamağa hazırdır. Lakin bir şərtlə ki, belə təmaslar Qarabağ probleminin nizamlanmasına kömək etsin: "Biz heç vaxt hansısa görüşdən imtina etməmişik. İstər prezidentlər səviyyəsində olsun, istər xarici işlər nazirləri. Lakin həmişə bunun tərəfdarı olmuşuq ki, belə görüşlər fayda versin. Yoxsa belə görüşlərdən nə fayda?".
Sarkisyan onu da bildirib ki, Qarabağ problemi ancaq kompromislər və Minsk Qrupunun işləyib hazırladığı üç prinsip əsasında həll edilməlidir. "Əlbəttə, həll yolu var və biz başa düşürük ki, bu, kompromislərə əsaslanmalıdır. Bu, elə hal deyil ki, Ermənistan, Azərbaycan, yaxud Dağlıq Qarabağ qalib gəlsin".
O da məlumdur ki, Azərbaycan və Ermənistan xarici işlər nazirlərinin ATƏT-in Minsk Qrupu həmsədrlərinin iştirakı ilə 8-9 dekabr tarixlərində Hamburqda görüşü gözlənir. Ancaq nəzərə alsaq ki, Sarkisyan Dağlıq Qarabağın ya müstəqil dövlət olmasını, ya da Ermənistana birləşdirilməsini bəyan edib, o zaman Almaniya görüşündən hansısa müsbət nəticə gözləməyə dəyərmi? Məsələyə münasibət bildirən AMİP-in baş katibi Arzuxan Əlizadənin sözlərinə görə, indiki situasiyada danışıqlarda hansısa müsbət dinamikanın özünü göstərəcəyindən danışmaq yersizdir: "Sarkisyanın məlum açıqlamasından sonra ümumiyyətlə Almaniya danışıqlarına getmək lazım deyil. Necə deyərlər, bundan birbaşa imtina etmək lazımdır. Düzdür, rəsmi Bakı Sarkisyanın məlum açıqlamasına öz münasibətini bildirib. Ancaq təəssüflər olsun ki, həmsədrlərin heç biri buna münasibət bildirməyib. Əslində, Ermənistan prezidentinin belə bir açıqlama ilə çıxış etməsi yeni deyil. O dəfələrlə bəyan edib ki, Dağlıq Qarabağ ya müstəqil olmalıdır, ya da Ermənistana birləşdirilməlidir. Sarkisyan son müsahibəsində də, bir növ, əvvəlki mövqeyini təkrarladı. Bu da, faktiki olaraq, bəri başdan danışıqların nəticəsiz olacağını bəyan etmək deməkdir. Belədirsə, o zaman danışıqlara getməyin bir anlamı qalmır. O üzdən, Hamburq danışıqlarından imtina edilməlidir. Hərçənd, xarici işlər nazirlərinin görüşü o demək deyil ki, prezidentlər səviyyəsində mütləq hansısa görüş keçiriləcək".
Vidadi ORDAHALLI