Aqşin Əliyev: "Problemin həllinə birbaşa təsir etməsə də, yardımçı faktor sayıla bilərdi"
Azərbaycan Prezidenti İlham Əliyevin Ankaraya verdiyi dəstəyi türk-islam dünyası Dağlıq Qarabağ münaqişəsi ilə bağlı göstərsə, bu işğal davam etməz. Bunu jurnalistlərə Bakıda səfərdə olan Türkiyə Prezidentinin baş müşaviri Yalçın Topçu deyib. O qeyd edib ki, Ankaranın bu məsələyə münasibətini digər ölkələr də göstərməlidir.
Baş müşavirin sözlərinə görə, türk-islam dünyası ölkələri güclənməsi üçün yollar axtarmalı, bir-birinə dəstək verməlidir.
Y.Topçu bildirib ki, bütün qardaş ölkələr Azərbaycan və Türkiyə arasındakı dostluq və həmrəylikdən nümunə götürməlidir.
Türk-islam dövlətləri müşavirin dediyi istiqamətdə fəaliyyət göstərsəydi, doğrudanmı Dağlıq Qarabağ probleminin həllində fərqli mənzərə yaranardı?
Ekspert Aqşin Əliyev qəzetimizə açıqlamasında bildirdi ki, Dağlıq Qarabağ probleminin həlli yalnız münaqişə tərəflərindən asılı deyil: "Bu qloballaşmış bir problemdir. Görürsünüz ki, böyük ölkələr həmsədrlik institutları vasitəsilə münaqişənin həlli istiqamətində aparılan danışıqları da inhisara alıb. Həmin prosesə Türkiyəni buraxmadılar. Səbəb kimi Türkiyənin bizimlə çox yaxın etnik kökə bağlı olmacı göstərilir. Fikir versəniz görərsiniz ki, bəzən dini amil də belə məsələlərdə böyük rol oynayır. Ancaq özlərinə münasibətdə bunu nəzərə almırlar. Həmsədr ölkələrin hamısı xristian dövlətləridir. Məsələyə Azərbaycanın Türkiyəyə verdiyi dəstək kontekstindən yanaşılması doğrudur. Bu dostluq digər türkdilli və müsəlman ölkələri üçün nümunə rolunu oynaya bilər. Təbii ki, Dağlıq Qarabağ prosesinə təsir etmək yalnız deyilən ölkələrin səlahiyyətinə aid deyil. Ancaq verilən dəstəyin hansısa ziyanı olmaz. İslam Konfransı Təşkilatı daxilndə Azərbaycana gözəl dəstək verilir. Həmin qurum Ermənistanı birmənalı olaraq işğalçı adlandırır. Müsəlman ölkəsi kimi Pakistanın bizə verdiyi dəstəyi xüsusi qeyd edə bilərik. Dediyimiz ölkə hələ də Ermənistanla heç bir diplomatik münasibət saxlamır. Ancaq təəssüflər olsun ki, heç də bütün müsəlman ölkələri belə deyil. İran kimi müsəlman ölkəsi Ermənistana əlavə nəfəslik verir ki, bu da deyilən formadakı təəssübkeşlik anlamına gələ bilməz. İstənilən halda, türk-islam ölkələrinin bizə verdiyi birmənalı dəstəyin problemin həllinə köməyi dəyərdi. Ən azından, Ermənistanın müqavimət gücü bir qədər zəifləyərdi. Problemin həllinə birbaşa təsir etməsə də, yardımçı faktor sayıla bilərdi".
Məhəmmədəli QƏRİBLİ