Xəzər Teyyublu: "Deputatlar bu əməli ilə Sarkisyanın da mövqeyinə tam aydınlıq gətirdilər və sübut etdilər ki, prezidentləri yalan danışıb"
Ermənistanın bir dövlət olaraq oyuncağa çevrildiyi və kənardan idarə olunduğu barədə çox deyilib. Son proseslər göstərir ki, Ermənistanda dövlət qurumları arasında rabitə də mövcud deyil. Kim necə istəyir, elə də bəyanat verir. Nəticədə prezidentlə digər rəsmilərin bildirdiyi fikir arasında təzad yaranmış olur.
Bu yaxınlarda Serj Sarkisyan "RİA Novosti"yə açıqlamasında deyib ki, Ermənistan Azərbaycanın ərazi bütövlüyünü tanıyır, lakin hesab edir ki, Dağlıq Qarabağ probleminin həllində xalqların öz müqəddəratını təyin etməsi nəzərə alınmalıdır.
Ancaq maraqlıdır ki, NATO Parlament Assambleyasının İstanbulda keçirilən 62-ci sessiyası çərçivəsində qurumun Müdafiə və təhlükəsizlik komitəsi suveren ölkələrin ərazi bütövlüyünün dəstəklənməsi ilə bağlı qətnamə qəbul edib. Toplantıda iştirak edən deputatların verdiyi məlumata görə,
komitənin iclasında işğal olunmuş ərazilər məsələsi müzakirəyə çıxarılıb. ABŞ nümayəndə heyəti üzvünün təklifi ilə belə bir məsələ qaldırılıb və nəticədə bütün suveren dövlətlərin ərazi bütövlüyünün tanınması ilə bağlı qətnamə qəbul edilib. Lakin iclasda iştirak edən erməni deputatlar bu qətnamənin əleyhinə çıxıb.
Qeyd edək ki, erməni deputatlar bundan əvvəlki müzakirələr zamanı da Ukrayna və Gürcüstanın ərazi bütövlüyünün əleyhinə səs verib. Ermənistan prezidentinin mövqeyilə deputatların əməli arasındakı təzad nədən yaranıb?
Klassik Xalq Cəbhəsi Partiyasının sədr müavini Xəzər Teyyublu qəzetimizə bildirdi ki, erməni deputatların NATO-dakı davranışları onu təəccübləndirməyib: "Həmin ölkə bütün varlığı ilə işğalçıdır. Onun bütün institutları bunu bilir və dəstəkləyir. Sarkisyan həmin işğal prosesində yaxından və fəal iştirak edən şəxsdir. Elə onun Rusiya telekanalına verdiyi müsahibənin özü belə qeyri-səmimi olub. Hər halda, jurnalist onun qarşısına əks arqument qoya bilərdi. Necə ola bilər ki, bir ölkənin torpağını işğal edən prezident həmin ölkənin ərazi bütövlüyünü tanıdığını bəyan edir? Bunun bir adı var: publikaya yalan danışmaq. Hər danışığın arxasında əməl olmalıdır. Ermənistan əməldə işğalçılığını sübut edir. Mənə elə gəlir ki, NATO-nun iclasında erməni deputatlar elə öz dövlətlərinin simasına uyğun səs verib. Çünki işğalçı ölkə başqa dövlətin ərazi bütövlüyünü tanıya bilməz. Deputatlar bu əməli ilə Sarkisyanın da mövqeyinə tam aydınlıq gətirdilər və sübut etdilər ki, prezidentləri yalan danışıb".
Məhəmmədəli QƏRİBLİ