Məlumat verildiyi kimi, NATO Parlament Assambleyasının İstanbulda keçirilən 62-ci sessiyası çərçivəsində qurumun müdafiə və təhlükəsizlik komitəsinin suveren ölkələrin ərazi bütövlüyünün dəstəklənməsi ilə bağlı qətnaməsi müzakirəyə çıxarılıb.
Müzakirələrdən sonra qətnamə səsə qoyularaq qəbul olunub. Sözügedən sənəddə ölkələrin ərazi bütövlüyünə hörmətlə yanaşılmasının vacibliyi ön plana çəkilir. Elə bu səbəbdən sənədin qəbulu Ermənistan nümayəndə heyəti tərəfindən narahatlıqla qarşılanıb. Özü də bu narahatlığı artıran məqamlardan biri qeyd olunan sənədin ABŞ nümayəndə heyətinin təşəbbüsü ilə qəbul edilməsidir. Ermənistan nümayəndə heyətinin sənədə etirazı isə nəzərə alınmayıb. İndi Ermənistanda hesab olunur ki, bu, ölkənin növbəti diplomatik məğlubiyyətidir. Eyni zamanda diqqət ona yönəlir ki, Qərb Rusiyanın orbitində ilişib qalan Ermənistandan tədricən üz döndərir. Bu hal isə erməni ekspertlərin özləri tərəfindən böyük narahatlıqla qarşılanır.
Düşmən ölkədə hesab edilir ki, Ermənistanın tam şəkildə Rusiyadan asılı vəziyyətə düşməsi onun Qərblə münasibətlərinə daha ciddi zərbə vurur və bu hal Qarabağ münaqişəsinə də təsirsiz ötüşmür. Erməni ekspert Lilit Gevorkyan da "168.am" saytına müsahibəsində vurğulayır ki, Ermənistan Qarabağı, ucuz enerji və böyük investisiyalar almaq ümidi ilə könüllü şəkildə Rusiyadan tam asılılığı seçib və nəticədə uduzub. Onun sözlərinə görə, Azərbaycan, Ermənistandan fərqli olaraq, Rusiya və İran üçün etibarlı tərəfdaşdır: "Hələlik Qarabağ konflikti ilə bağlı danışıqlar prosesi davam edir. Azərbaycan müharibə təhlükəsindən effektiv istifadə edəcək. İrəvan yaranmış situasiyada zəif və təcrid edilmiş kimi görünür. Moskva Ermənistanın maraqları hesabına Azərbaycanla əlaqələrini gücləndirəcək. Bugünkü xarici siyasəti ilə İrəvanın Qərbin dəstəyinə olan ümidi hədərdir.
Qərbin Rusiyanın strateji müttəfiqi olan, hakimiyyəti və müxalifəti Avrasiya inteqrasiyasını dəstəkləyən bir ölkəyə yardım üçün öz resurslarını xərcləməsi mümkün deyil. Faktiki olaraq, Ermənistanın dünyada müttəfiqi yoxdur. Dünyada neft qiymətlərinin endiyi bir zamanda Azərbaycan hələ də Qərbin strateji tərəfdaşı olaraq qalır. Azərbaycan dünya enerji bazarının konyunkturasından faydalanaraq öz mövqelərini gücləndirir. Bu, Azərbaycan hakimiyyətinin davamlı və balanslaşdırılmış xarici siyasətinin nəticəsidir. Ermənistanın təcrid vəziyyətinin artması təsadüf deyil. Bu, birbaşa İrəvanın Rusiyanın peyki olmağa izn verdiyi dövlət siyasətinin nəticəsidir. Nəticədə Ermənistan, Azərbaycandan fərqli olaraq, digər ölkələr üçün iqtisadi cəlbediciliyini itirib. Rusiyanın yeganə hədəfi Ermənistanda öz strateji obyektlərini saxlamaqdır. Bakı bundan istifadə edib, uğurlu xarici siyasət yürüdür. Aprel müharibəsindən sonra Prezident İlham Əliyev ciddi şəkildə öz siyasi mövqeyini gücləndirib. Ona görə ki, o, müəyyən əraziləri qaytarmağı bacaran ilk prezidentdir. O göstərdi ki, erməni ordusu məğlubedilməz deyil və öz ordusunun son illər ərzində modernləşməsini nümayiş etdirdi. Müharibə və böyük itkilərlə bağlı təhdid Ermənistanın xarici siyasəti dəyişməyənə qədər davam edəcək. İrəvan Rusiyanın strateji müttəfiqidir, amma bu müttəfiqin erməni planlarında Qarabağa yer yoxdur".
Əslində eyni mövqeni Ermənistanda bölüşənlərin sayı heç də az deyil. Bu mövqedə olanlar həm də onu qabardır ki, Rusiya və Ermənistanın birləşmiş ordu qüvvələrinin yaradılması da vəziyyətə hansısa ciddi formada təsir etməyəcək. Ermənistanın beynəlxalq münasibətlər və təhlükəsizlik institutunun eksperti, politoloq Ruben Mehrabyan isə hesab edir ki, Kremlin Cənubi Qafqazda hərbi-siyasi varlığını genişləndirməkdən ötrü Ermənistanı öz platsdarmına çevirmək səyləri həm bu ölkəyə, həm də bütövlükdə regiona təhlükədir. Politoloq "Azadlıq Radiosu"nun rus xidmətinə müsahibəsində birgə ordu qüvvələrinin yaradılmasını Gürcüstanın NATO ilə münasibətlərinin güclənməsinə Moskvanın cavab addımı sayır: "Bu, Ermənistanın suverenliyi hesabına edilir və onun təhlükəsizliyinə hədədir. Bütün Cənubi Qafqazın təhlükəsizliyi bundan əziyyət çəkəcək. Bu, Gürcüstanla münasibətlərdə müəyyən gərginlik yaradacaq. Faktiki olaraq, Kreml "Brejnev doktrinası"nın dəyişdirilmiş versiyasını gerçəkləşdirir. Yəni qonşu ölkələrin suverenliyini məhdudlaşdıraraq, onlardan yaxınlıqdakı regionlarda aqressiv siyasəti üçün bufer və plasdarm kimi yararlanır". Politoloqun fikrincə, rəsmi İrəvan belə durumlara bütün immunitetini itirib və bənzər hədələrə adekvat reaksiya göstərmək qabiliyyətini əldən verib: "Hökumətin əhali üçün həzm edilə bilən izahlar düşünüb tapmaqdan başqa çarəsi qalmır. O bunu ölkənin təhlükəsizliyini gücləndirmək kimi qələmə verir. Əslində isə baş verənlər bunun tam əksidir".
Politoloq bildirir ki, Ermənistanda son ilyarımdakı təlatümlərin, demək olar ki, hər biri Rusiyanın regiondakı varlığı ilə bağlıdır: "Qarabağda erməni tərəfinin çox itki verdiyi müharibə erməni cəmiyyətinin uzun müddət inandığı, "əbədi Ermənistan-Rusiya dostluğu" adlı mifi də ciddi şəkildə laxlatdı. Baş verənlər bir daha göstərdi ki, Rusiya bizim müttəfiqimiz deyil. Əslində, Rusiya öz imperiya maraqlarını qoruyur, vəssalam. Son illər Ermənistanda yetərincə ölkəni böhrana itələyən mənfi hadisələr yaşanır. Bu durumdan faydalanan təkcə bir qüvvə görürəm, o da Putin Rusiyasıdır. Onun siyasəti erməni dövlətçiliyini dağıtmaq, Ermənistanı tabe etdirmək, onu Rusiya imperiyasının quberniyasına çevirməyə yönəlib".
Tahir TAĞIYEV