Üzeyir Cəfərov: "Birgə hərbi birləşmənin yaradılması işğalçı erməni silahlı qüvvələrinə əlavə dəstəkdir"
Rusiya prezidenti Vladimir Putinin Rusiya və Ermənistan qoşunlarının birləşmiş qruplaşmasının yaradılması haqqında sazişi təsdiqləməsi çox təhlükəli bir tendensiyadır, Cənubi Qafqazı təhdid edən bir situasiya yaradır.
Hazırda Rusiya Ermənistanı pulsuz silahla təchiz edir, son aylarda isə Ermənistana orta mənzilli "İsgəndər-M" tipli ballistik raketlər, TOS tipli ağır odsaçan silahlar və digər taktiki raketlər göndərib. Buna baxmayaraq, Rusiya Ermənistanla birgə ordu yaratmaq qərarında sona qədər israrlı oldu. Razılaşmanın predmetində bildirilir ki, həmin ordunun tərkibində Rusiya tərəfdən Ermənistanda dislokasiya olunan 102-ci ordu, Ermənistan tərəfdən isə Naxçıvanla sərhəddə yerləşən 4-cü ordu birləşməsi iştirak edəcək. Ermənistan tərəfdən Naxçıvanla həmsərhəd əraziyə yaxın ordunun bu layihəyə daxil edilməsi hansı məqsədi daşıya bilər?
Hərbi ekspert Üzeyir Cəfərov qəzetimizə açıqlamasında bildirdi ki, Ermənistan tərəfi həmin birgə qrupa 4-cü ordusunun daxil edildiyini təsdiqləyir: "Bəli, həmin ordu birləşməsi isə Ermənistanla Naxçıvan arasındakı sərhəddə dislokasiya olunur. Bu, Azərbaycan üçün yaxşı heç nə vəd etmir. Bilirsiniz ki, həmin birgə qoşuna erməni general rəhbərlik edəcək. Ermənistanda Rusiyanın 102-ci ordusu olduğu halda, belə bir qərarın verilməsinə nə zərurət vardı? Bu qərarla onlar həm Türkiyə amilini nəzərə alıb, həm də Naxçıvanda yaradılan Ümumqoşun Ordusuna cavab xarakterli addım atıb.
Rusiya bir tərəfdən üzdə Türkiyə ilə Azərbaycanla yaxınlaşır, o biri tərəfdən isə Ermənistanı işğalçılığa həvəsləndirən addımlar atır. Türkiyə və Azərbaycan rəhbərliyi Rusiyanın Ermənistanla birgə hərbi birləşmə yaratmaq məsələsinə ciddi reaksiya verməli və Moskvanı bu işdən çəkindirməyə çalışmalıdır. Birgə hərbi birləşmə məsələsinin üzərindən sükutla keçmək olmaz. Çünki bu məsələnin reallaşması gələcəkdə bizim üçün böyük təhdidlər, təhlükələr vəd edir. Birgə hərbi birləşmə regiona əlavə gərginlik gətirəcək.
Rusiyanın 102-ci hərbi bazası ən müasir silahlarla, texnika ilə təmin olunub. Ermənistanın hansısa bir korpusu ilə birgə hərbi birləşmə yaratmaq əslində Rusiyadan çox, Ermənistana lazımdır və sərf edir. Təəssüf ki, Rusiya da işğalçı Ermənistana bu dəstəyi verir. Unutmaq olmaz ki, gələcəkdə Ermənistanla Azərbaycan arasında hərbi əməliyyatlar başlayanda Ermənistan Rusiya ilə yaratdığı birgə hərbi birləşmədən də istifadə edə bilər. Birgə hərbi birləşmənin yaradılması işğalçı erməni silahlı qüvvələrinə əlavə dəstəkdir".
Məhəmmədəli QƏRİBLİ