Qabil Hüseynli: "Dəfələrlə Türkiyə rəsmiləri bəyan edib ki, sərhədlərin açılması yalnız Ermənistan Azərbaycan torpaqlarını işğaldan azad etdikdən sonra mümkündür"
Türkiyə və Ermənistan arasında sərhədin açılması iki ölkə arasında olan məsələdir. Bu sözləri NATO Parlament Assambleyasının İstanbulda keçirilən 62-ci sessiyasında NATO-nun baş katibi Yans Stoltenberq deyib.
O, sessiyanın bağlanış iclasında Ermənistandan olan millət vəkilinin "Ermənistanın Avropa İttifaqına üzvlüyə namizəd ölkə olan Türkiyə ilə sərhədinin bağlı olması onun Avropa İttifaqı ilə yaxın əlaqələr yaratmasına əngəllər yaradır. Bu məsələnin həlli barədə nə deyə bilərsiniz" sualına cavabında qeyd edib ki, bu, NATO-nu yox, Türkiyə ilə Ermənistanı maraqlandıran məsələ olduğundan, ikitərəfli səviyyədə gündəmə gətirilə bilər: "Ona görə mənim fikir bildirməyimdən söhbət gedə bilməz".
Qeyd edək ki, noyabrın 19-da başlayan NATO PA-nın 62-ci sessiyasının bağlanış iclasında Türkiyə prezidenti Rəcəb Tayyib Ərdoğan da çıxış edib.
NATO Parlament Assambleyasının İstanbulda keçirilən 62-ci sessiyasının iclası zamanı başqa gərginlik də yaşanıb.
Türkiyə xarici işlər naziri Mövlud Çavuşoğlunun çıxışından sonra iclasın sual-cavab hissəsində söz alan Ermənistan deputatı Koryun Nahapetyan Türkiyəyə qarşı ittihamlar səsləndirib. Nahapetyanın "Türkiyə İŞİD-ə dəstək verir" - deyə səsləndirdiyi fikirlərə Çavuşoğlu sərt reaksiya verib: "Müxtəlif fikirlərimiz ola bilər. Amma əvvəl dürüst olmaq lazımdır. Təəssüf ki, ermənilər heç vaxt dürüst olmurlar. Biz İŞİD-ə necə dəstək verə bilərik? Bu günə qədər hansı ölkə Türkiyənin öldürdüyü qədər İŞİD terrorçusu öldürüb? Heç də dürüst olmayan şəkildə İŞİD-ə dəstək verdiyimizi deyirsiniz" - deyə nazir erməni deputatı susdurub.
Daha sonra XİN rəhbəri Ermənistanın işğalçı olduğuna diqqət çəkərək Dağlıq Qarabağ problemindən söz açıb.
"Azərbaycanın ərazisi olan Dağlıq Qarabağın Ermənistan işğalçılarından azad edilməsi ilə bağlı BMT-nin 4 qətnaməsi, Avropa Birliyinin qəbul etdiyi qərarlar var. Azərbaycanın 20 faiz torpağını - Qarabağı mən işğal etmişəm? Siz işğal etmisiniz. Niyə Qarabağdan çıxmırsınız? Biz sizə bununla bağlı məsləhətlər verdik. Qarabağı işğaldan azad etsəniz, sərhədləri açacağımızı vəd etdik. Siz dediniz ki, Azərbaycan üçün niyə şərt qoyursunuz? Anlayın, Azərbaycan bizim qardaşımızdır. Bir millət, iki dövlətik. Azərbaycanın məsələləri bizim məsələmizdir", - deyə Çavuşoğlu vurğulayıb.
NATO baş katibi Yans Stoltenberqin Türkiyə-Ermənistan sərhədlərinin açılması ilə bağlı problemin iki ölkə arasında çözülməli olduğunu bildirməsini və bu xüsusda ölkəmizin adını çəkməməsini necə dəyərləndirilə bilər?
Politoloq Qabil Hüseynli qəzetimizə açıqlamasında bildirdi ki, NATO-nun yeni baş katibinin bu cür danışığı təəccüb doğurur: "Artıq neçənci dəfədir onun dilindən məsuliyyətsiz bəyanatlar çıxır. Hər halda, dünya miqyasında ən qüdrətli qurumlardan olan NATO-nun rəhbəri siyasi cəhətdən yetkin olmalıdır ki, onun verdiyi bəyanatlara istehza ilə yanaşılmasın. Ermənistan-Türkiyə sərhədlərinin açılması ilə bağlı məsələ, heç də onun ifadə etdiyi kimi, iki ölkənin razılığa gəlməsindən asılı deyil. Bütün dünyanın təkidlə imzalanmasını tələb etdiyi Sürix protokollarından Türkiyə məhz Azərbaycana görə imtina etdi. Dəfələrlə Türkiyə rəsmiləri bəyan edib ki, sərhədlərin açılması yalnız Ermənistan Azərbaycan torpaqlarını işğaldan azad etdikdən sonra mümkündür. Ermənistan isə bu addımı atmaq istəmir. Buna görə də hələ ki, sərhədlərin açılmasından söhbət gedə bilməz. Yaxşı olar ki, NATO baş katibi bir qədər siyasi bilgilərini artırsın".
Məhəmmədəli QƏRİBLİ