Elşən Manafov: "Azərbaycan enerji təhlükəsizliyi ilə bağlı siyasətində də region dövlətlərinin maraqlarını nəzərə alır və..."
"Azərbaycan və Türkiyənin birgə enerji layihələri dünya üçün böyük əhəmiyyət daşıyır". Bunu Azərbaycan Prezidenti İlham Əliyev İstanbulda keçirilən 23-cü Dünya Enerji Konqresində deyib.
Dövlət başçısı çıxışında qeyd edib ki, belə bir tədbirin Türkiyədə keçirilməsi mühüm hadisədir: "Dünya Enerji Konqresinin Türkiyədə keçirilməsi çox əlamətdar hadisədir, Türkiyənin dünya enerji siyasətindəki rolunu göstərir və bu rol getdikcə artır və Türkiyə enerji təhlükəsizliyi məsələlərinin həllində çox önəmli addımlar atır. Türkiyənin inkişafı, sabitliyi nəinki Türkiyəni sevən ölkələrə, ona dost olan ölkələrə, bütün dünyaya lazımdır. Çünki Türkiyə bu gün dünyanın enerji siyasətinin müəyyən edilməsində çox önəmli rol oynayır. Bu ilin iyulunda Türkiyə çətin bir sınaqdan şərəflə çıxdı. Türkiyə xalqı Prezident Rəcəb Tayyib Ərdoğanın ətrafında sıx birləşərək, böyük qəhrəmanlıq göstərərək dövlət çevrilişinə cəhdin qarşısını aldı, dövlətçiliyi qorudu, Türkiyənin xoşbəxt bu gününü və gələcəyini qorudu. Biz Azərbaycanda sizinlə fəxr edirik. Bir çox önəmli enerji layihələrimizi biz Türkiyə ilə bərabər icra edirik və bu enerji layihələri dünya üçün böyük əhəmiyyət daşıyır".
Bütövlükdə dövlət başçısı iki ölkənin birgə enerji layihələrinin dünya üçün böyük əhəmiyyət daşıdığını deyərkən nə demək istəyib? Sözügedən məsələni dəyərləndirən politoloq Elşən Manafov buna bir neçə aspektdən yanaşır: "Prezident İlham Əliyev həmin konfransdakı çıxışı zamanı bildirib ki, Azərbaycan və Türkiyənin enerji layihələri Türkiyə və Avropa üçün çox ciddi əhəmiyyət kəsb edir. Rusiya Avropanın enerji təminatında müəyyən mənada Azərbaycanı və Türkmənistanı rəqib dövlətlər kimi görür və bu müəyyən qısqanclıq yarada bilər. Ancaq Azərbaycanın xarici siyasəti keçmiş postsovet məkanındakı dövlətlərin xarici siyasətindən fərqlidir. Azərbaycan dövləti yürütdüyü xarici siyasətdə Qərbin maraqlarına cavab verən mövqe sərgiləmir. Rəsmi Bakı balanslaşdırılmış siyasət yeridir. Bu mənada Azərbaycan və Rusiya arasında münasibətlər qarşılıqlı anlaşma və qarşılıqlı mənfəət prinsipləri üstündə qurulub. Azərbaycan hakimiyyəti postsovet məkanındakı digər ölkələrdən fərqli olaraq Rusiyada qıcıq yaradacaq kəskin hərəkətlərə yol vermir. Dövlətimiz enerji təhlükəsizliyi ilə bağlı siyasətində də region dövlətlərinin maraqlarını nəzərə alır və çalışır ki, Türkiyənin və eləcə də Avropanın enerji təhlükəsizliyi sahəsindəki məsələlərin həllində Rusiya və İranda ciddi qıcıq yarada biləcək addımlar atılmasın. Düşünmürəm ki, Rusiya məlum TAP və TANAP layihələrinin həyata keçməsində ciddi problemlər yaratsın. Hər halda problemlərin həlli istiqamətində razılaşdırılmış və balanslaşdırılmış siyasət göz qabağındadır. TAP və TANAP layihələrinin həyata keçməsinə Rusiya ciddi problem yaratmayacaq. Ən azı nəzərə almaq lazımdır ki, Avropanın enerji təminatı ilə bağlı məsələlərdə Rusiyanın imkanları TAP və TANAP layihələrinin imkanlarından kifayət qədər böyükdür. Ancaq Avropa və Türkiyə TAP və TANAP layihələrinin həyata keçirilməsində maraqlıdır".
Vidadi ORDAHALLI