Elşən Mustafayev: "Ermənistanı nəyəsə məcbur etməyin yolları çoxdur"
Məlum olduğu kimi, oktyabrın 7-də Prezident İlham Əliyevin sədrliyi ilə Nazirlər Kabinetinin 2016-cı ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclası keçirilib.
İclasda çıxış edən dövlət başçısı Azərbaycan iqtisadiyyatının inkişafı, sahibkarlara dövlət dəstəyi, Konstitusiyaya əlavə və dəyişikliklərlə bağlı keçirilmiş referendum, ölkəmizin beynəlxalq mövqelərinin möhkəmlənməsi, Dağlıq Qarabağ münaqişəsinin həlli və digər məsələlərlə bağlı fikirlərini bildirib. Prezident deyib ki, Dağlıq Qarabağ məsələsinin həll olunmamasının əsas səbəblərindən biri də Ermənistana himayədarları tərəfindən yardım göstərilməsidir: "Ermənistan-Azərbaycan, Dağlıq Qarabağ məsələsinin həll olunmaması təkcə Ermənistana görə deyil. Ermənistanın böyük himayədarları var, biri ona pul, biri silah verir, biri lobbi yaradır, biri təbliğ edir.
Azərbaycan ikili standartlarla üzləşib və bu məsələnin həll olunmaması BMT Təhlükəsizlik Şurasına da şərəf gətirmir. BMT Təhlükəsizlik Şurasının qəbul etdiyi dörd qətnamə 20 ildən çoxdur ki, icra edilmir.
ATƏT-in Minsk Qrupunun həmsədri olan ABŞ-dan səslənən son bəyanat təəccüb doğurur və ABŞ, Rusiya, Fransa prezidentlərinin dəfələrlə bəyan etdikləri "status-kvo qəbuledilməzdir" tezisinə ziddir".
Prezident həmin çıxışında həm də bildirib ki, üç həmsədr ölkənin status-kvonun dəyişilməsinin vacib olmasını demələrinə baxmayaraq, onların bəyanatlarının arxasında real nəticə yoxdur.
Həmsədrlərin status-kvonun dəyişdirilməsilə bağlı verdikləri bəyanatların əməli nəticəsinin olmamasına necə yanaşmaq olar?
Azərbaycan Milli İstiqlal Partiyasının sədr müavini Elşən Mustafayev qəzetimizə bildirdi ki, həmsədrlərin heç bir konkret işi ortada yoxdur: "Missiya fəaliyyət göstərəndən bəri həmsədrlər real bir nəticə ortaya qoya bilməyib. Yalnız fərqli terminləri ortaya atmaqla diqqəti yayındırıblar. Son vaxtlar isə status-kvonun dəyişilməsinin vacib olduğu ilə bağlı səsləndirdikləri fikirlər bir qədər yaxşı qəbul olundu. Necə deyərlər, bu yalnız sözdə ifadə edildiyindən, başqa nə isə görmədik. Təbiidir ki, status-kvonun dəyişməsini istəyən bizik. Ermənilər belə qalmasında maraqlıdır. Həmsədrlər danışır, ancaq ermənilər əməl etmir. Bu hal illərlə davam edir. Deməli, nəticə əldə etmək üçün daha təsirli rıçaqlardan istifadə olunmalıdır. Belə olmayanda, sözlə əməlin uzlaşmaması təəssüraatı yaranır. Hesab edirəm ki, həmsədrlər özlərini hörmətdən salmamaq üçün bir qədər əməli fəaliyyətə keçməlidir. Ermənistanı nəyəsə məcbur etməyin yolları çoxdur. Zənn etmirəm ki, həmsədrlər bunun yollarını bilmir".
Məhəmmədəli QƏRİBLİ