Akif Nağı: "Prezidentin tələbinə cavab verməmək isə siyasi mədəniyyətin aşağı olması kimi dəyərləndirilə bilər"
Azərbaycan Prezidenti İlham Əliyev oktyabrın 7-də Nazirlər Kabinetinin 2016-cı ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında çıxışı zamanı ABŞ-da Kerri tərəfindən səslənən son bəyanat haqda fikirlərini açıqlayıb:
"Amerikadan səslənən son bəyanat sadəcə olaraq Ermənistanın işğalçı siyasətinə dəstək verməkdir. Siz yəqin ki, Amerikadan səslənən son bəyanatı da eşitmisiniz, oxumusunuz, Azərbaycan ictimaiyyəti də bunu bilir. Bu, yumşaq desək, təəccüb doğuran bir bəyanatdır. Azərbaycanı münaqişənin həll olunmamasında günahlandırmaq ən azı insafsızlıqdır. Digər tərəfdən, bax, bu bəyanat o biri bəyanatlarla necə uzlaşır?! Axı, Amerika, Rusiya, Fransa prezidentlərinin dəfələrlə bəyan etdikləri bir tezis var: "status-kvo qəbuledilməzdir". Biz bunu alqışlayırıq. Düzdür, bu sözdən sonra heç bir praktik iş aparılmır. Amma, hər halda, bu sözün artıq ortaya çıxması bizim böyük uğurumuzdur. Belə bir ciddi bəyanat ola-ola, "hər iki tərəf günahkardır, tərəflər buna hazır deyil, bu məsələ Fələstin-İsrail münaqişəsindən də mürəkkəbdir" demək sadəcə olaraq Ermənistanın işğalçı siyasətinə dəstək verməkdir. Bunun başqa izahı ola bilməz.
Düzdür, indi müxtəlif bəyanatlar verilir ki, bu ifadələr kontekstdən çıxarılıb, düzgün başa düşülməyib. Biz hər şeyi yaxşı başa düşürük və bu gün internet dövründə yaşayırıq. Haradasa bir kəlmə deyilirsə, dərhal onun əks-sədası olur. Biz belə bəyanatları qəbul etmirik. Hesab edirik ki, tezliklə bu ifadələrə ən yüksək səviyyədə düzəliş edilməlidir. Əks təqdirdə, burada vasitəçilik missiyası şübhə altına düşə bilər. Bu ancaq rəsmi qaydada səslənən bir tezis idi".
Göründüyü kimi, Prezident ABŞ tərəfindən səsləndirilən rəsmi bəyanata ən yüksək səviyyədə düzəliş edilməsini tələb edib. Maraqlıdır ki, üstündən 5 gün keçməsinə baxmayaraq, ABŞ-dan heç bir reaksiya yoxdur. ABŞ-ın bu hərəkətini necə dəyərləndirmək olar?
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, ABŞ-ın bütün hərəkətləri Ermənistanı dəstəkləməyə yönəlib: "Bu məsələyə Kerrinin ermənipərəst olması kontekstində yanaşılmamalıdır. Düzdür, o, vaxtilə erməniləri çox müdafiə edib. Ancaq son məsələdə vəziyyət başqadır. Con Kerri ABŞ-ın siyasətini ifadə edən adamdır. Onun səsləndirdiyi bəyanatlar ABŞ-ın rəsmi mövqeyini ifadə edir. Bu səbəbdən də Prezident haqlı olaraq ABŞ-dan ən yüksək səviyyədə izahat istədi. Görürsünüz ki, reaksiya yoxdur. Çünki deməyə söz tapa bilmirlər. Hətta hansısa formada ifadə edib Kerrinin mövqeyini malalamağa çalışsalar belə, birmənalı şəkildə bilinməlidir ki, ABŞ-ın dövlət siyasəti bundan ibarətdir. Prezident elə həmin tədbirdə dedi ki, bağlı qapılar arxasında bizə təzyiqlər edilir. Həmin təzyiqi edənlərdən biri də ABŞ-dır. Bəlli olur ki, onlar bizdən Qarabağı unutmağı tələb edir. Bir daha xatırladıram ki, ABŞ-ın hansı səviyyədə ifadə edəcəyi mövqedən asılı olmayaraq, Kerrinin fikirləri həmin ölkənin bizə yönəlik siyasəti kimi ciddiyə alınmalıdır. Prezidentin tələbinə cavab verməmək isə siyasi mədəniyyətin aşağı olması kimi dəyərləndirilə bilər".
Məhəmmədəli QƏRİBLİ