Aqşin Əliyev: "Gördünüz ki, danışıqlar prosesində bir balaca pressinqlə qarşılaşan kimi Sarkisyan meydana erməni terrorçularını çıxartdı"
Rusiya Siyasi Araşdırmalar İnstitutunun direktoru Sergey Markov Azərbaycan Respublikasının Prezidenti yanında Strateji Araşdırmalar Mərkəzinin təşkil etdiyi beynəlxalq konfransda ölkəsinin Ermənistana "İsgəndər" operativ-taktiki raket kompleksi satması ilə bağlı sualı cavablandırarkən deyib ki, Rusiya müxtəlif dövlətlər, o cümlədən münaqişədə olan ölkələrlə hərbi-texniki münasibətlər qurub.
S.Markov xatırladıb ki, Ermənistanın Kazan prinsiplərinə əməl etməməsi olduqca təəccüblüdür: "Rusiyada güclü erməni lobbisi var. Biz silah satmasaq, ABŞ satacaq, bu halda Azərbaycan və Ermənistan da itirəcək, çünki eyni silahları iki dəfə baha almalı olacaq. Rusiyanın əsas məqsədi kompromislərə nail olmaqdır. İkitərəfli güzəştlər olmalıdır. Hazırda bunun üçün yaxşı imkanlar var. Kazan formulu əsasında Qarabağ münaqişəsi həll edilə bilər. Ermənistan Qarabağ ətrafındakı rayonları azad etməlidir, Azərbaycan və Türkiyə isə Ermənistanın və Dağlıq Qarabağın blokadasını aradan qaldırmalıdır.
Kazan prinsiplərinə əsasən 7 rayonun Azərbaycana qaytarılması nəzərdə tutulurdu. Lakin hazırda Ermənistan hakimiyyəti çətin durumla üzləşib, onlar xalqı inandıra bilmirlər ki, bu lazımdır. Dağlıq Qarabağ münaqişəsi dondurulmuş münaqişə deyil, istənilən vaxt yenidən alovlana bilər. Ona görə də biz münaqişənin həll edilməsi istiqamətində səylərimizi artırmalıyıq".
Ermənistan hakimiyyəti Kazan prinsiplərilə bağlı xalqı inandıra bilmir, yoxsa inandırmaq istəmir?
Ekspert Aqşin Əliyev qəzetimizə açıqlamasında bildirdi ki, Markovun dediklərində çox ciddi həqiqət var: "Hesab etmək olar ki, Kazan görüşü digər görüşlərlə müqayisədə daha məhsuldar olub. Ortada hansısa bir irəliləyiş nəzərə çarpıb. Markov danışıqların detallarını tam açmır. Yalnız deyir ki, 7 rayon Azərbaycana qaytarılmalı idi. Ancaq bunun hansı şərtlər daxilində baş verəcəyindən danışılmır. İstənilən halda, Ermənistan bu prinsiplərdən qaçır. Görünən budur ki, həmin detallara riayət etmək istəmir. Xalqı inandırmağa gəldikdə isə, Sarkisyan buna heç cəhd də etməyib. Bu səbəbdən də "inandıra bilmədi" fikrini kənara qoymaq lazımdır. Sarkisyan Dağlıq Qarabağ münaqişəsi fonunda hakimiyyətə gəlib. Yəni onların Qarabağda qazandığı müvəqqəti uğur siyasətlə heç bir əlaqəsi olmayan adam kimi onu da hakimiyyətə gətirdi. Həmin dalğanın üzərində hakimiyyəti ələ keçirən hərbi xunta indi hansısa güzəştə getmək barədə düşünmür. Bu səbəbdən də danışıqlarda qeyri-konstruktivlik nümayiş etdirir. Bu başgirələmə ilə hakimiyyətin ömrünü uzatmaq istəyirlər. Ən əsası da məqsədləri budur ki, güzəştə onların hakimiyyəti dönəmində deyil, başqa vaxt gedilsin. Gördünüz ki, danışıqlar prosesində bir balaca pressinqlə qarşılaşan kimi Sarkisyan meydana erməni terrorçularını çıxartdı. İrəvanın mərkəzində mitinqlər təşkil etdirdi, əyalətdə terrorçular polisə basqın etdi. Məqsəd güzəştdən yayınmaq idi. Ermənistan hakimiyyəti daim bu taktikadan istifadə edib. 90-cı illərin sonunda parlamentin gülləbaran edilməsi də buna misaldır".
Məhəmmədəli QƏRİBLİ