Rusiyanın çağırışı və Türkiyənin Əsədlə əməkdaşlıq dilemması...
"Atlas" Araşdırma Mərkəzi: "Hazırda Türkiyə ilə Əsəd rejiminin maraqları uzlaşdığı üçün onlar koordinasiyalı şəkildə fəaliyyət göstərməyə məcburdur"
Rusiya Xarici İşlər Nazirliyi Türkiyənin Suriya sərhədlərində apardığı hərbi əməliyyata reaksiya verib. Moskvadan verilən bəyanatda Rusiyanın Suriya-Türkiyə sərhədindəki durumdan dərin narahat olduğu bildirilib.
Rusiya XİN-i Ankaranın Cerablusdakı əməliyyatı Dəməşqlə koordinasiya etməli olduğunu qeyd edib.
Xatırladaq ki, Türkiyə Silahlı Qüvvələri Cerablusun İŞİD-dən azad edilməsi üçün "Fərat qalxanı" adlı genişmiqyaslı hərbi əməliyyata başlayıb. Əməliyyat çərçivəsində ağır artilleriya Suriyaya yeridilib.
Göründüyü kimi, Rusiya Türkiyədən Suriyadakı əməliyyatlar zamanı Əsədlə koordinasiyalı qaydada işləməyi tələb edir. Türkiyə buna gedəcəkmi?
"Atlas" Araşdırmalar Mərkəzindən qəzetimizə verilən məlumatda bildirilir ki, Türkiyənin bu fəallığı bütün dövlətlərin maraqlarına uyğundur: "ABŞ-ın vitse-prezidenti Co Bayden Ankarada oldu. Çox güman ki, bu məsələ ilə bağlı danışıqlar aparılıb. Bu, ABŞ-Türkiyə münasibətlərinin istiləşməsi baxımından da vacibdir. Eyni zamanda Türkiyənin bu əməliyyata başlaması Rusiya və İranın da maraqlarına cavab verir. Çünki Türkiyənin Suriyadakı quru əməliyyatını həyata keçirməkdə əsas məqsədi bu ölkənin ərazi bütövlüyünü qorumaqdır. Bu, Suriya prezidenti Bəşər Əsədin də maraqlarına xidmət edir. Baxmayaraq ki, onun Türkiyə və prezidenti ilə ciddi fikir ixtilafları var. Amma Əsəd də bilir ki, Türkiyənin bu əməliyyatı həyata keçirməkdə məqsədi Suriyanı parçalamaq yox, onun ərazi bütövlüyünü qorumaq, İŞİD və silahlı kürd varlığını ortadan qaldırmaqdır. Türkiyə İŞİD üzərində qələbə çalarsa, bölgədə nəzarətini gücləndirərsə, beynəlxalq aləm Türkiyənin Suriyada aktiv oyunçu olacağını qəbul edəcək. Böyük dövlətlər Türkiyə ilə hesablaşmaq məcburiyyətində qalacaq. Çünki Türkiyə ordusu bölgədə möhkəmləndikdən sonra bir müddət oradan çıxmayacaq. Buna görə də böyük dövlətlər Türkiyə ilə hesablaşmaq məcburiyyətində qalacaq. Türkiyə bu ərazidə terrorla mübarizəni daha aktiv şəkildə həyata keçirə bilər. Təbii ki, hazırda Türkiyə ilə Əsəd rejiminin maraqları uzlaşdığı üçün onlar koordinasiyalı şəkildə fəaliyyət göstərməyə məcburdur. Əks halda, Türkiyənin həmin ölkəyə müdaxiləsi alınmazdı".
Məhəmmədəli QƏRİBLİ
