Aqşin Əliyev: "Bilirsiniz ki, hazırda əməliyyatların aparıldığı ərazilərin bir çoxu osmanlıların nəzarətində olub"
Türkiyə prezidenti Rəcəb Tayyib Ərdoğan Suriyanın Cerablus şəhərinin İŞİD terror təşkilatından azad edilməsi üçün keçirilən əməliyyata münasibət bildirib. Əlillərlə görüşdə çıxış edən R.T.Ərdoğan deyib ki, ordu Suriyanın şimalında Türkiyəni təhdid edən İŞİD və PKK-nın Suriya qolu PYD kimi terror təşkilatlarına qarşı əməliyyata başlayıb: "Ölkəmizə hücumlar işi bu nöqtəyə gətirdi.
Biriləri bizə meydan oxuyur ki, Türkiyə Suriyaya daxil olsa, pis olacaq. Sizə nə olacağına baxın! Türkiyəyə qarşı təhdid yaradan kim olursa olsun, ordumuz, polisimiz onun qarşısındadır. Qaziantepdə 53 vətəndaşımızın şəhid edilməsinin hesabını ağır ödəyəcəklər. Dünya terroru sadəcə qınayır, seyr edir. Heç bir dövlətin etmədiyini biz Suriya üçün etdik. Suriyadan ölkəmizə qarşı hücumlara artıq son qoyulmalıdır. PKK-nı, İŞİD-i üzərimizə salanlar artıq bu oyunun pozulduğunu görməlidir. Vətənimizi parçalaya, bu dövləti, xalqı diz çökdürə, bu xalqa boyunduruq vura bilməyəcəksiniz. Artıq heç kim Suriya məsələsini Türkiyənin daxili işlərindən kənar görə bilməz. Biz Yaxın Şərqlə, Qafqazla bir əsr əvvəl bir yerdə olduğumuzu unuda bilmərik, onlara arxa çevirə bilmərik".
Ərdoğan bir əsr əvvələ ekskurs etməklə nə demək istəyib?
Ekspert Aqşin Əliyev qəzetimizə açıqlamasında bildirdi ki, Türkiyə Suriyada hərbi əməliyyatlara başlamağa bir qədər gecikib: "Suriyadakı proseslərin mənfi təsiri ən çox Türkiyəyə dəyirdi. Bu müddət ərzində İran, Rusiya, ABŞ Suriyadakı hərbi varlığını qoruyurdu. Yalnız Türkiyə hərbi varlığını ortaya qoymamışdı. Belə ki, Suriyadakı vəziyyətdən ən çox zərər çəkən tərəf idi. Doğrudur, hərdənbir bombalamalar həyata keçirirdi. Ancaq bununla Suriyada oyunçu olmaq mümkün deyil. Ona görə də quru əməliyyatlarının keçirilməsi lazımlı idi və artıq Türkiyə bunu edir.
Türkiyə bu əməliyyatı həyata keçirməklə Suriyada hərbi varlığını ortaya qoydu. Eyni zamanda Suriyada kürd bölgəsinin yaradılmasına imkan verməyəcəyini ortaya qoydu. Bu çox ciddi mesajdır. Ərdoğanın Yaxın Şərq və Qafqazla bağlı işlətdiyi fikirlər Osmanlı Türkiyəsinin tarixinə əsaslanır. Bilirsiniz ki, hazırda əməliyyatların aparıldığı ərazilərin bir çoxu osmanlıların nəzarətində olub. Bu jesti ilə Ərdoğan həmçinin Qərbə mesaj verir ki, Türkiyə deyilən coğrafiyalarla daha yaxşı anlaşmağı bacarır. Qafqaza gəldikdə isə, burada Türkiyə ilə Rusiyanın münasibətləri daim gərgin olub. Müxtəlif ərazilər verilib və geri alınıb. Buna baxmayaraq, hazırda Rusiya ilə münasibətlərin normal olması Ərdoğanı belə bəyanat verməyə vadar edir".
Məhəmmədəli QƏRİBLİ