Türkiyədə iyulun 15-dən 16-na keçən gecə uğursuzluqla nəticələnən hərbi çevriliş cəhdinin üstünü 1-ci Ordu komandiri general Ümid Dündarın açdığı ortaya çıxıb.
Baki-xeber.com xəbər verir ki, çevrilişçilər generalla əlaqə saxlayaraq onlara qoşulmağı tələb edib, əks halda həbs olunacağını bildiriblər. Onlar üçün 1-ci Ordu İstanbul və Ankarada nəzarəti ələalmaq üçün çox əhəmiyyət daşıyırdı. Ancaq general onların tələbini rədd edib.
Çevrilişçilərə "Yox” deyən Dündar dərhal polisi məlumatlandırıb. Sonra isə Mərmərədə olan prezident Rəcəb Tayyib Ərdoğaıa əlaqə saxlayaraq onu dəstəklədiyini bildirib.
General Ərdoğana Ankara hava limanının mühasirəyə alındığını, oraya getməməyi, İstanbula gəlməyi təklif edib. General prezidenti burada qoruya biləcəyini deyib. Məhz bundan sonra Ərdoğanın təyyarəsi İstanbula doğru yola çıxıb.
Generalın bu addımından sonra çevrilişçilərin planı da pozulub. Belə ki, səhərə saat 05:00-da hərəkətə keçməyi planlaşdıran çevrilişçilər planların dəyişmək məcburiyyətində qalıb və əvvəlcədən planlaşdırılan vaxtdan 8 saat əvvəl hərəkətə keçiblər.
Baki-xeber.com xəbər verir ki, çevrilişçilər əvvəlcədən planları baş tutsaydı, bir çox yüksək rütbəli məmurun həbsini də planlaşdırırmış.
CHP-li bir deputatın açıqlamalarına görə, Türkiyə parlamentinin bütün deputatlarının həbsilə bağlı əvvəldən qərarda çıxarılıbmış.
Baki-xeber.com xəbər verir ki, Türkiyə daxilində davam edən əməliyyatlar çərçivəsində ümumilikdə 103 general və admiral həbs edilib. O da məlum olub ki, həbs olunan İncirlik bazasının türk komandiri general Bəkir Ercan Van, çevriliş cəhdi müvəffəqiyyətsizliyə uğrayandan sonra ABŞ-dan sığınacaq isəyib.
Baki-xeber.com xəbər verir ki bu barədə "New York Times” qəzeti məlumat yayıb.
Qəzetin iddiasına görə, ancaq ABŞ rəsmiləri generalın sığınacaq tələbinə mənfi cavab verib, bundan sonra ABŞ-a getmək ümidini itirən general həbs olunub.
Bundan başqa prezidentin Mərmərədə qaldığı otelə basqın edənlər arasında olan və sonra həbs edilən bir hərbçi ilə də bağlı ortaya maraqlı faktlar çıxıb. Bildirilir ki, Aydın Özsıcak adlı hərbçi bir müddət əvvəl helikopter qəzasında həlak olan Türkiyədə tanınmış siyasətçı Muhsin Yazıçıoğlunun ölüm işində də adı keçirmiş.
Məlumata görə, Muhsin Yazıçıoğlunun helikopteri düşdükdən sonra hadisə yerinə birinci bir neçə hərbçi gedib, onların arasında Aydın Özsıcak da olub. Onlar helikopterindəki izləmə cihazını söküblər. Buna görə, sonradan onlara cinayət işi açılıb və həbs ediliblər.
Ancaq otelə basqın hadisəsi göstərir ki, o vaxt həbs edilmiş Aydın Özsıcak azadlıqdadır, həm də öz işinin başındadır. Onun kim tərəfindən və necə həbsdən yayındırılması isə hələlik məlum deyil.
Bu arada Türkiyədə hərbi çevriliş cəhdinin 3 səhifə və 20 maddədən ibarət olan planı da tapılıb. Trend-in "Milliyyət" qəzetinə istinadən verdiyi məlumata görə, planda hərbi çevriliş planının məqsədi, vəzifələri, eləcə də üsyançıların irəliləyəcək istiqamətləri göstərilib.
Türkiyənin Baş naziri Binali Yıldırım Nazirlər Kabinetinin iclasında bildirib ki, dövlət çevrilişinə cəhd nəticəsində 208 nəfər ölüb, onlardan 60 nəfəri polis, üçü hərbçi, 145-i isə mülki şəxsdir. 1491 nəfər xəsarət alıb.
O, dövlət çevrilişinə cəhdə görə, 7500 nəfər tutulduğunu bəyan edib.
"Türkiyə KİV-lərinə təşəkkürümü bildirirəm. İlk vaxtlardan onlar demokratiyanın tərəfində oldu. Türkiyə xalqı küçələrə axışdı və dövlətin maraqlarını qorudu. Dövlət çevrilişinə cəhd terrorizmlə mübarizəyə və ölkənin xarici çağırışlara qarşı durmaq bacarığına təsir etməyəcək" – deyə baş nazir bildirib.
B.Yıldırım Türkiyənin hava məkanının bir hissəsinin də uçuşlara bağlandığını deyib.
Məlumata görə, prezident Rəcəb Tayyib Ərdoğanın əmri ilə hava məkanına nəzarət üçün F-16 qırıcıları patrul keşiyi çəkir. İstanbula əlavə olaraq 1500 xüsusi təyinatlı göndərilib. Küçələrdə zirehli avtomobillər də patrul keşiyi çəkir.
Bu arada Türkiyənin hərbi və məhkəmə-hüquq sistemində "Fətullahçı Terror Təşkilatı”na mənsub olduğu iddia edilən şəxslərə qarşı əməliyyatlar da davam edir (APA). Türkiyə DİN-dən bildiriblər ki, nazirlik sistemində ümumilikdə 8 min 777 məmur vəzifədən kənarlaşdırılıb. Onların arasında 1 vilayət valisi, mərkəzi aparatdakı 29 vali, 52 mülki müfəttiş, 16 hüquq müşaviri, 1 baş müdir, 2 idarə rəisi də var.
Hərbi çevriliş cəhdi ilə əlaqədar 2745 hakim və prokuror da vəzifədən çıxarılıb. İşdən uzaqlaşdırılanların həbsinə başlanıb. Həbs olunan hakim və prokurorların sayının 3 minə çatacağı bildirilir. Bu miqdar Türkiyədəki hakim və prokurorların beşdə birini təşkil edir.
Türkiyə Hakimlər və Prokurorlar Ali Şurasının məlumatına əsasən ölkədə 10 min 72 hakim və 4 min 921 prokuror var.
Dövlət çevrilişinə cəhdlə əlaqədar 30 vali və yerli icra hakimiyyəti orqanının təqribən 300 nümayəndəsi də vəzifəsindən azad edilib (Trend).
Bundan başqa, Maliyyə Nazirliyinin 1500 əməkdaşı müvəqqəti olaraq vəzifələrinin icrasından kənarlaşdırılıb. Qurumda qiyamçıların aşkarlanması üzrə araşdırmalar davam edir.