"Türkiyəyə xəbərdarlıq edirik ki, qayda-qanunu təmin etmək məsələsində çox irəli getməsin”
Avropa İttifaqının xarici əlaqələr və təhlükəsizlik siyasəti üzrə ali komissarı Federika Mogerini və ABŞ dövlət katibi Con Kerri Brüsseldə mətbuat konfransı keçiriblər.
APA-nın "Hürriyet”ə istinadən verdiyi xəbərə görə, Türkiyədə baş verənlərə dair mövqeyini bölüşən F. Mogerini bu ölkənin Konstitusiya quruluşuna riayət edilməsinin və hüququn üstünlüyünün təmin olunmasının zəruriliyini vurğulayıb: "Türkiyədə yaşananlara dair narahatlıqları bölüşürük. Türkiyənin demokratiya, insan haqları və təməl hüquqlara riayət etməsini təmin etməliyik”.
F. Mogerini bildirib ki, Türkiyə edam cəzasını bərpa edərsə, Avropa İttifaqına üzv qəbul oluna bilməz: "Edam cəzasını tətbiq edən heç bir ölkə Avropa İttifaqına üzv ola bilməz. Türkiyə Avropa Şurasının bir parçasıdır və Avropa İnsan Haqları Konvensiyasına qoşulub”.
C. Kerri isə Türkiyənin seçilmiş liderlərinin yanında olduqlarını söyləyib. O, ABŞ və Aİ-nin Türkiyəni hüququn üstünlüyünə hörmət göstərməyə çağırdığını deyib: "Çevriliş cəhdi göstərənlərin məhkəmə önünə çıxarılmasını dəstəkləyirik. Lakin Türkiyəyə xəbərdarlıq edirik ki, çevriliş cəhdindən sonra qayda-qanunu təmin etmək məsələsində çox irəli getməsin”.
C. Kerri NATO-nun Türkiyədə baş verənləri nəzərdən keçirəcəyini də əlavə edib.
ABŞ dövlət katibi Fətullahçı Terror Təşkilatının (FETÖ) rəhbəri Fətullah Gülənin Türkiyəyə ekstradisiya olunması ilə bağlı fikirlərə də münasibət bildirib. C. Kerri Türkiyə tərəfinin təqdim etdiyi dəlillərin standartlara uyğun olacağı təqdirdə ekstradisiya razılaşmasına əməl edəcəklərini bildirib. O əlavə edib ki, ölkəsi F. Güləni Türkiyəyə verməməklə hər hansı məqsəd güdmür: "Bizə Gülənin Türkiyəyə ekstradisiyası ilə bağlı müraciət olmayıb. Prezident Rəcəb Tayyib Ərdoğan ictimaiyyət qarşısında ABŞ-dan bunu tələb etdi. Mən Türkiyənin xarici işlər nazirinə qanuni və rəsmi müraciətin olmasının vacibliyini bildirdim. Dedim ki, bizə göndərəcəkləri dosyedə ittiham deyil, dəlillər olmalıdır. Lazım olan dəilləri görməliyik. Sübutlar standartlara uyğun olsa, təbii ki, Türkiyə ilə ABŞ arasındakı ekstradisiya haqqında razılaşmanın şərtlərinə əməl edəcəyik. Rəsmi müraciət olmayıb, sübutlar təqdim edilməyib. Razılaşmanın tələblərini pozacaq heç bir hərəkət etmirik".
Qeyd edək ki, iyulun 15-dən 16-na keçən gecə Türkiyədə dövlət çevrilişinə cəhd olub.