Təbriz Musayev: “Birləşmiş Ştatlar layihənin həyata keçəcəyindən əmin olduğu üçün ayrılan qrantı iki dəfə artırıb”
Birləşmiş Ştatlar hökuməti Ermənistanın cənubundan keçəcək TRIPP marşrutunun inkişafı üçün yaradılmış TRIPP+ fondunun maliyyəsini iki dəfə artıraraq 402 milyon dollara çatdırıb.
ABŞ Dövlət Departamentinin Avropa və Avrasiya məsələləri üzrə Bürosu yanvarın 30-da TRIPP+ fonduna 201 milyon dollar həcmində qrant ayırıb. Məlum olub ki, bu vəsaitin 2036-cı il dekabrın 31-dək istifadə olunması planlaşdırılırdı. Ancaq iyulun 16-da qrantın həcmi artırılıb və ABŞ hökuməti fonda ümumilikdə 402 milyon dollar ayırmağı öhdəsinə götürüb. Ayrılmış vəsaitlərin əsas hissəsinin Ermənistanda istifadə olunması planlaşdırılır.
Maraqlıdır, Zəngəzur dəhlizində iş başlamamış ABŞ maliyyə yardımını niyə iki dəfə artırdı?
Sözügedən məsələyə aydınlıq gətirən İrəvan Azadlıq Təşkilatının sədri Təbriz Musayev baki-xeber.com-a açıqlamasında bildirdi ki, ABŞ-ın TRIPP+ fonduna ayrılan vəsaiti iki dəfə artırması bir neçə amillərlə bağlı ola bilər: “Demək olmaz ki, Zəngəzur dəhlizi ilə bağlı ümumiyyətlə Ermənistan hissədə hər hansı iş getmir. Yayılan məlumatlara görə, ABŞ-dan gələn mütəxəssislər erməni tərəfi ilə yolun keçdiyi ərazilərdə texniki qiymətləndirmə işinə başlayıblar. Üstəlik, ötən ayn ABŞ Dövlət Departamenti tərəfindən Zəngəur dəhlizində həyata keçiriləcək tikinti işləri üçün yaradılan "Tripp+ Enterprise Fund" fonduna Rusiya əsilli amerikalı investor Konstantin Sokolov rəhbər təyin olunub. ABŞ administrasiyası hesab edir ki, TRIPP layihəsi regionda yeni ticarət, tranzit və enerji marşrutlarının formalaşmasına təkan verəcək. Layihə çərçivəsində dəmir yolu, enerji və logistika infrastrukturunun qurulması, həmçinin Zəngəzur dəhlizi istiqamətində iqtisadi inteqrasiyanın gücləndirilməsi nəzərdə tutulur. Göründüyü kimi, dəhliz təkcə dəmir yolu ilə məhdudlaşmayacaq. Çoxşaxəli marşrut xəttinin qurulmasından söhbət gedir. Fikrimcə, Birləşmiş Ştatlar layihənin həyata keçəcəyindən əmin olduğu üçün ayrılan qırantı iki dəfə artırmağa qərar verib. Çünki ABŞ bu layihənin ciddi geosiyasi çəkiyə malik olduğunu, Mərkəzi Asiya ilə əlaqələrin qurulmasında Cənubi Qafqazın açar rola malik bir region olduğunu bilir. Bu səbəbdən də vəsaitin artırılması güman edilir. Əgər sadalanan geosiyasi, iqtisadi maraqlar olmasaydı, hər halda ABŞ bu qədər fəallıq göstərməzdi. Bunun arxasında həm də Ermənistana iqtisadi dəstək niyyəti dayanır. Ona görə ki, sözügedən vəsait Ermənistan kimi dövlət üçün kiçik vəsait deyil. Məqsəd həm də bu və ya digər formada Rusiyanın Ermənistanda təsirini azaltmaqdır”.
Vidadi ORDAHALLI
