Məhərrəm Zülfüqarlı: “Ermənistandakı indiki siyasət Rusiyanın düşdüyü ağır vəziyyətlə əlaqədardır”
Ermənistanın Baş naziri Nikol Paşinyan Rusiya Prezidenti Vladimir Putinə İrəvanın Avropa inteqrasiyası kursunu davam etdirəcəyini şəxsən bildirdiyini açıqlayıb. Paşinyan brifinq zamanı Ermənistan xalqının bu istiqamətdə seçim etdiyini vurğulayıb: “Rusiya prezidentinə dedim ki, biz Avropa inteqrasiyası yolunu elan etmişik və bu yolla irəliləyəcəyik. Xüsusilə də Ermənistan xalqı bu kursu dəstəklədikdən sonra”.
Paşinyan Ermənistan məhsullarının Avrasiya İqtisadi İttifaqı bazarında üzləşdiyi məhdudiyyətlərə toxunaraq, mövcud problemlərin qısa müddətdə aradan qaldırılmamasının ciddi nəticələr doğura biləcəyini deyib: “Əgər bu problem vaxtında həll olunmasa, hesab edirəm ki, bu, Aİİ-nin sonunun başlanğıcı ola bilər”.
Görünən odur ki, Rusiyanın Ermənistana yönəlik iqtisadi, siyasi təzyiqləri Paşinyanı çəkindirmir. Açıq deyir ki, İrəvan Avropa inteqrasiyası kursunu davam etdirəcək. Açıq deyir ki, belə getsə bu, Aİİ-nin sonunu gətirəcək.
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Paşinyanın hakimiyyətə gəlməsindən başlayaraq bu günə qədər yeritdiyi Qərbpərəst siyasətin bundan sonra da davam edəcəyinə kimsənin şübhəsi yoxdur: “Çünki Paşinyan hakimiyyətə küçədən, cəmiyyətin dəstəyi ilə, mitinqlərlə gəlib. Digər tərəfdən erməni xalqı uzun müddət Rusiyanın girovluğunda olduğunu başa düşdü. Bundan sonra əlaltı olmaq, kiminsə siyasətinə görə özünü qurban vermək fikrində deyil. Belə bir mühitin yaranmasında da əsas rolu Azərbaycanın 44 günlük Vətən müharibəsindəki qətiyyətli qələbəsi oldu. Çünki buna qədər Paşinyan manevr edirdi. Hətta 2019-cu ilin avqustunda Xankəndidə dedi ki, “Qarabağ Ermənistandır”. Ancaq Vətən müharibəsində Azərbaycanın şanlı qələbəsindən sonra vəziyyət dəyişdi. Paşinyan 2022-ci ilin oktyabrında Praqada bəyan etdi ki, Qarabağ Azərbaycanın tərkib hissəsidir. Paşinyan bəyan etdi ki, Ermənistanın mövcudluğu beynəlxalq müstəvidə tanınan sərhədlərə əsaslanmalıdır. Əks təqdirdə onu da itirəcək. Rusiyaya gəldikdə isə, Ermənistandakı indiki siyasət Moskvanın düşdüyü ağır vəziyyətlə əlaqədardır. Rusiya elə bir tələyə sürükləndi ki, indi nə ondan çıxa bilir, nə də müharibəni dayandıra bilir. Nə də geri çəkilə bilir. Qəribəsi bundadır ki, uzun illər imperiya siyasətinə görə başqa xalqları qıran Rusiya bir diktatorun ağılsız siyasəti ilə öz millətini qırır. O cümlədən, Ukraynada yaşayan etnik rusları da qırmaqdan çəkinmir. Rusiyanın mühüm strateji və iqtisadi obyektlərinin hər gün bonbalandığı bir vaxtda yeni bir vəziyyət yaranıb. Artıq Rusiyanın əvvəlki imkanları yoxdur ki, əvvəllər forpostu olan Ermənistanı yenidən geri qaytarsın. O cümlədən, əvvəlki kimi öz siyasətinə uyğun istifadə edə bilsin. Bu baxımdan Paşinyanın açıq siyasət yeritməsi təbiidir. Rusiyayönümlü namizədlərin seçkidə məğlubiyyəti, daha sonra onların həbsə atılması onu göstərir ki, Nikol öz siyasətində bundan sonra da qətiyyətlə hərəkət etmək fikrindədir. Ona görə də cəsarətli addımlar atır. Avropa İttifaqı ilə əlaqələri genişləndirir, Rusiyanın iqtisadi təzyiqlərindən çəkinmir. Bu da Azərbaycanın xeyrinədir. Çünki indi bir sıra Azərbaycanda olan ruspərəst qüvvələr buna tamamilə başqa don geyindirirlər. Paşinyanın Azərbaycana qarşı cinayətlər törətmiş insanlara qarşı yeritdiyi həbs və digər hərəkətlərinə tənqidi yanaşırlar. Əlbəttə ki, bütün bunlar Rusiyanın təsirindən irəli gəlir. Ona görə də biz ayıq olmalıyıq ki, bunlar Azərbaycanın mənafeyinə qarşı hərəkət edə bilməsinlər”.
Vidadi ORDAHALLI
