Avropa Parlamenti (AP) iyulun 8-də yunan Kipri ilə bağlı Türkiyə əleyhinə qərəzli qərar qəbul edib. Avroparlamentin Qadın Hüquqları və Gender Bərabərliyi Komitəsi (FEMM) tərəfindən hazırlanan və Avropa Parlamentinin üzvü Eleonora Meletinin məruzəçisi olduğu sənəddə 1974-cü ildə Kiprdə yunan qadın və qızlarına qarşı zorakılıq iddiaları yer alır.
Avropa Parlamenti tərəfindən 575 lehinə, 33 əleyhinə və 43 bitərəf səslə qəbul edilən qətnamədə Türkiyə Silahlı Qüvvələrinin adadan dərhal və tamamilə çıxarılması tələb olunur. AP-nin Türkiyə üzrə məruzəçisi və ispaniyalı parlamentari Naço Sançez Amor səsvermədə bitərəf qalıb.
Qərarda Türkiyə "beynəlxalq hüququ pozmaqda" ittiham olunur. Qətnamədə Türkiyənin Şimali Kiprdəki hərbi mövcudluğu "qanunsuz" adlandırılır və bunun Aİ-Türkiyə münasibətlərinə maneə təşkil etdiyi iddia edilir. Qərarda həmçinin Türkiyənin beynəlxalq hüquqa əsasən qurbanlara kompensasiya ödəmək və onların hüquqlarını qorumaq öhdəliyi olduğu iddia edilir.
Əslində 1974-cü ildə Kipr adasında nə baş verib?
Kipr türk xalqı dünya tarixindəki ən qanlı qırğınlardan əziyyət çəkən xalqlardan biri olub. 1804-1974-cü illər arasında Kipr türk xalqı yunanlar tərəfindən insanlığa qarşı cinayətlərə, geniş yayılmış soyqırıma, qırğınlara və məcburi köçlərə məruz qalıb. Xüsusilə 1963-1974-cü illər arasında Kiprdə “Enosis” (adanın Yunanıstana birləşdirilməsi) məqsədi ilə qurulan EOKA terror təşkilatı və yunanların dəstəklədiyi qüvvələr Kipr türklərinə qarşı etnik təmizləmə və qırğınlar həyata keçiriblər. Bu dövrdə baş verən zorakılıqlar, o cümlədən 14 avqust 1974-cü ildə Daşkənd qırğını kimi kütləvi qətllər Türkiyənin adaya müdaxiləsinə səbəb olub və türklərə qarşı davam edən soyqırımın qarşısı alınıb. 1963-cü ildə baş verən Qanlı Milad hücumları ilə başlayan və 1974-cü ilə qədər davam edən bu dövrdə müdafiəsiz mülki əhaliyə qarşı çoxsaylı insanlığa qarşı cinayətlər törədilib. Bu qırğın cəhdləri və soyqırım faktları tarixi mənbələrdə geniş şəkildə əks olunub.
İndi Avropa Parlamentinin Türkiyəni yarım əsr bundan əvvəl yunanlara qarşı zorakılıq etməkdə ittiham etməsi məntiqsizdir və həm də bu tarixi faktların təhrif edilməsidir. Çünki tarixi faktlar da təsdiqləyir ki, əslində adada yunanlar tərəfindən türklərə qarşı kütləvi qırğınlar, zorakılıqlar törədilib. Yunanların illərlə törətdiyi qətliamlar, zorakılıqlar indi türklərin ayağına yazılır.
Digər tərəfdən, əgər doğrudan da Avropa Parlamenti bu qədər ədalətlidirsə niyə bircə dəfə olsun yaxın tarixdə Xocalıda baş vermiş azərbaycanlı dinc qadın, uşaqların qətliamını müzakirəyə çıxarmayıb? Avropa Parlamenti Xocalı soyqırımını heç vaxt gündəmə belə gətirməyib. Üstəlik bu soyqırımda birbaşa iştirak etmiş və illər sonra Ermənistan prezidenti olduqdan sonra bunu açıq aşkar etiraf edən Sarkisyanı kimi canini yüksək səviyyələrdə qəbul ediblər.
Bu faktlar bir daha Avropa Parlamentinin müstəqil qərar qəbul etmək gücündə olmadığını, erməni-yunan lobbisinin əsiri olduğunu təsdiqləyir. Avropa Parlamentində hər zaman Azərbaycan və Türkiyəyə qarşı düşmən, qərəzli münasibət bəslənilib. Bunun arxasında isə qeyd edildiyi kimi erməni-yunan lobbisi dayanır.
Tahir TAĞIYEV
