İbrahim Rüstəmli: “...Azərbaycan ordusunun irəliyə daha bir addım atmasından ötrü uğurlu şans olacaq”
"The Guardian" qəzetinin məlumatına görə, Ukrayna ilin sonuna qədər ən azı 7 NATO ölkəsi ilə əsas müdafiə müqavilələri bağlamağa ümid edir. Bu, Kiyevin xarici siyasətinin yeni bir aspektini vurğulayır və onun yalnız hərbi texnika alıcısı deyil, həm də təchizatçı ola biləcəyini nümayiş etdirməyə yönəlib.
Son aylarda Kiyev altı ölkə ilə "pilotsuz təyyarə müqavilələri" bağlayıb.
Azərbaycanla da müqavilə imzalanıb.
"Təşəbbüs "pilotsuz təyyarə müqaviləsi" adlanır, lakin əslində o, yalnız dronlardan daha çox şeyi əhatə edir... daha da əhəmiyyətlisi, bu, təcrübə və bilik, Ukraynadakı sistemi təşkil edən bütün komponentlərə çıxışı əhatə edir", - deyə Ukrayna Təhlükəsizlik Şurasının katibinin müavini David Aloyan bildirib.
Azərbaycan özü dron istehsalına başlayır. Bu barədə baki-xeber.com-a şərh verən hərbi ekspert İbrahim Rüstəmli bildirdi ki, ümumiyyətlə Azərbaycan öz Silahlı Qüvvələrini qurmaq üçün ilk növbədə beynəlxalq əlaqələrinə xüsusi diqqət yetirib. “Azərbaycan dünyanın inkişaf etmiş ordulara sahib ölkələri ilə çox tərəfli əlaqələr qurub. Burada kadr hazırlığı, silah cəbhəxanasının formalaşdırılması, dil hazırlıqları, taktiki-strategiya hazırlıqlar və sairdən söhbət gedir. Yəni informasiya təhlükəsizliyi kimi vacib məsələlər böyük önəm daşıyır. Azərbaycanın beynəlxalq əlaqələrinin inkişafında əsas yeri ölkəmizin müasir tələblərə cavab verən silahlarla öz ordusunu təmin etməsidir. Yəni bu mənada Azərbaycanın ən böyük müttəfiqi olan Türkiyə Cümhuriyyəti ilə əlaqələrimiz xüsusi önəm daşıyır. Bəli, bu gün Azərbaycan Ukrayna ilə uçan pilotsuz aparatların istehsalı ilə əlaqədar müəyyən danışıqlar aparıb və razılaşma razılaşmaları əldə edib. Baxın, burada ən önəmli məsələ ondan ibarətdir ki, Ukrayna müharibə şəraitində öz ordusunu qurur və inkişaf etdirir. Eyni zamanda Ukrayna Rusiya kimi böyük bir hərbi potensiala və insan resurslarına malik bir ölkə ilə müharibə apara-apara öz hərbi, silah sənayesini də gücləndirir. Təbii ki, bu gün Rusiya ərazisinə endirilən zərbələrin əsasında ən önəmli yeri uçan pilotsuz aparatlar tutur. Bu mənada fikrimcə, Ukraynanın həm müharibə aparması, həm müharibə apara-apara öz ordusunu ayağa qaldırması, həm eyni zamanda silah cəbhəxanası, silah sənayesi institutunu genişləndirməsi, perspektivləri müəyyənləşdirilməsi, bütün bunlar Ukraynanın müharibə təcrübəsindən irəli gələn əsas məsələlərdən biridir. Ona görə də, bu gün artıq Ukraynanın uçan pilotsuz aparatlarla bağlı çox böyük uğurlara imza atması, hətta öz kadrlarını bir sıra xarici ölkələrə göndərməsi və təcrübə mübadiləsi aparması və sair. bütün bunlar əlbəttə, Ukraynanın son dövrlərdə əldə etdiyi uğurlardan qaynaqlanır. Ümumiyyətlə, insan resursları, insan kapitalı bütün resurslardan və bütün kapitallardan önəmlidir və önəmli olmalıdır da. Yəni bu gün Ukrayna belə deyək, dronlardan çox o dronları istehsal edən beyinlər ilə daha çox pul qazanır, daha çox şanslar əldə edir. Yəni bu mənada Azərbaycanın Ukrayna ilə müvafiq istiqamətdə əlaqələr qurması gözlənilən idi və burada qeyri-adi heç nə yoxdur. Azərbaycan beynəlxalq hüququn tələbləri çərçivəsində hərəkət edir və öz cəbhəxanasını, silahlı qüvvələrini beynəlxalq hüququn tələbləri müstəvisində reallaşdırır. Yəni mən elə bilirəm ki, bu təcrübədən istifadə etmək Azərbaycanın ordu, silahlı qüvvələr quruculuğu təcrübəsinə daha böyük təcrübə qatacaq və bu ölkəmizi daha bir addım irəliyə aparacaq. Mən bunu alqışlayıram”.
İ.Rüstəmli qeyd etdi ki, çünki qloballaşan dünyada indi artıq müharibə də siyasi xarakter daşıyır. Ekspert hesab edir ki, artıq müharibənin konfiqurasiyası, xarakteri, öz mübarizə prinsipləri dəyişib. “Ona görə də belə bir dünyada istənilən yeniliklə yaxından tanış olmaq və o yeniliyi mütləq öz həyatımıza tətbiq etməliyik. Mənə elə gəlir ki, Azərbaycanın Ukrayna ilə bağlı bağladığı bu müqavilə, əldə etdiyi bu razılaşma Azərbaycan ordusunun irəliyə daha bir addım atmasından ötrü uğurlu şans olacaq”-deyə İ.Rüstəmli əlavə etdi.
İradə SARIYEVA
