Sahil Kərimli: “Bu Azərbaycanın dünya miqyasında nə qədər böyük bir oyunçu olduğunun əsas göstəricilərindən biridir”
ABŞ Prezidenti Donald Tramp Azərbaycan Prezidenti İlham Əliyevi Mayamidə keçiriləcək G20 zirvəsinə dəvət edib. Bu barədə Qırğızıstanın ABŞ-dakı fövqəladə və səlahiyyətli səfiri Edil Baisalov mediaya açıqlamasında bildirib.
Qeyd edək ki, G20 liderlərinin sammiti bu il 14-15 dekabr tarixlərində Mayamidə keçiriləcək.
Politoloq Sahil Kərimli baki-xeber.com-a bildirdi ki, ABŞ prezidentinin bu dəvəti Azərbaycan üçün bütün mənalarda faydalı olacaq.
“Amerika prezidenti Donald Trampın dekabrda keçiriləcək G20 sammitinə Azərbaycan prezidentini dəvət etməsi ilk növbədə Amerika kimi super gücün, yəni dünyanın nəhəngi olan bir ölkənin Azərbaycana olan xüsusi diqqətin, hörmətin və ehtiramın nümunəsidir. Bu xüsusilə də Azərbaycan Prezidenti İlham Əliyevə olan rəğbətindən irəli gələn bir addımdır. Amerika-Azərbaycan əlaqələri xüsusilə də Trampın həm birinci, həm də indiki hakimiyyəti dövründə çox yaxşı olub.
Bu münasibətlər hazırkı Tramp administrasiyası dövründə yüksək xətlə inkişaf edib və Amerika-Azərbaycan əlaqələri durmadan irəliyə doğru inkişaf edir. Xüsusilə də Amerika prezidenti Donald Trampın Azərbaycan prezidenti İlham Əliyevə olan xüsusi rəğbəti, Azərbaycana göstərilən diqqət, Azərbaycanın Cənubi Qafqazdakı əvəz edilməz tərəfdaşlığı və güc mənbəyi olması, əlbəttə ki, Amerika Birləşmiş Ştatlarının ölkəmizə olan marağını durmadan artırır. Təbiidir ki, G20 sammitində Azərbaycan prezidentinin iştirakı da dünya əhəmiyyətli bir hadisədir. Hesab edirəm ki, bu gün ölkəmizin dünya miqyasında artan nüfuzu, möhkəmlənən yeri və rolu danılmazdır və bu rol gələcəkdə də möhkəmlənəcəkdir. Onu da vurğulamaq lazımdır ki, bu tədbirə Amerika prezidenti tərəfindən eyni zamanda bir sıra türk dövlətlərinin-Qazaxıstan və Özbəkistanın da dəvət olunması, türk birliyinə, Türk Dövlətləri Təşkilatına olan münasibətin təzahürüdür. Bu təşkilatın üzvü olan sadaladığım bu ölkələrə, xüsusilə də Azərbaycana diqqət təbiidir ki, xüsusi önəm daşıyır. Bu eyni zamanda dünyaya və beynəlxalq aləmə olan mesaj kimi qiymətləndirilməlidir”. S.Kərimlinin sözlərinə görə, Azərbaycanın Türk Dövlətləri Təşkilatında birləşdirici rol oynaması, bu təşkilat çərçivəsində ölkəmizin bu əlaqələrin möhkəmləndirilməsinə vermiş olduğu töhfə də ciddi vurğulanmalıdır. “Hesab edirəm ki, Amerika Birləşmiş Ştatlarının prezidentinin bu addımı, xüsusilə də Azərbaycana göstərilən bu diqqət, bu jest yüksək qiymətləndirilməlidir. Bu Azərbaycanın dünya miqyasında nə qədər böyük bir oyunçu olduğunun əsas göstəricilərindən biridir”-deyə S.Kərimli vurğuladı.
İradə SARIYEVA
